Fobitro Injil Shorif 24 nombor sifara
Dusra Hannan
Forisiti
Alla Pakor hukume siṭir aḳare ou sohifa leḳsoin, Hozrot Isa al-Mosir sahabi Hozrot Hannan (ra:). Hozrot Isae dunia taki toshrif neoar onuman 50–60 bosor bade ou sohifa leḳa oise. Ikan oilo tan leḳa dusra siṭi. Ita leḳar ḳalo al-Mosir bad-baki hoḳol sahabir mout oigesil, ḳali tain zinda asla, erlagi tan forisoy oigese, ‘hou murobbi’ name.
I sohifar maze Begom Sayebani koia zen gese leḳsoin, ein ashole kunu manush nae, hou zomanar eḳ zomat. Begomor aolad bolte, zomator shodoishsho. Ar Begomor boin, leḳokor elaḳar zomat. Tain mumin bai oḳlor gese minoti korra, eḳe-oinne maya-mohobbot ḳorar lagi. Ar bonḍo moulana oḳlor talim taki hushiar oar lagi koira. Itae ḳoita, Hozrot Isa roḳto-mangshor kunu manush nae, tain ḳali ruhu, erlagi roḳto-mangshor shorile amra zekunu nafak kam ḳortam fari, itae kunu oshubida nae, ḳali ruhu oilo dami. I sohifar 7 ayato ase, “Zetae ḳoin, manush surote Hozrot Isa al-Mosi duniat aisoin na, ila mat zegie mate he oilo hou dukabaz ar Kane-Dorjal.”
Ermaze ase,
(1) Salam zanani 1:1-3 ayat
(2) Hoke ar mohobbote solo1:4-11
(3) Bidayi salam 1:12-13
1
Salam zanani
1 Ami hou murobbie ita leḳram, Allar fosondor hou Begom Sayebani ar tan aolad oḳlor gese. Allai hokor ḳatire ami zarare mohobbot ḳori, ḳali ami nae, aro zoto manshe Allai hok zanchoin tara hoḳole zare mohobbot ḳoroin, ou tumrar gese leḳram.
2 Ou hok to oḳon amrar bitre boshot ḳore ar hor-hamesha amrar loge roibo.
3 Hok ar mohobbotor ḳatire, gaibi baf Alla Pak ar ou bafor ḳas mayar zon Ibnulla, ein-u Isa al-Mosi, erar torof taki rohomot, meherbani ar shanti amrar loge roibo.
Hoke ar mohobbote solo
4 Gaibi bafe zela hukum disoin, hou hukum mafik afnar ḳoyzon fua-fuṛin Allai hokor fote soler dekia ami kub kushi oisi.
5 O mayar Sayebani, afnar gese amar eḳṭa onurud ase, amra zanu forteḳe eḳe-oinnore mohobbot ḳori. Ar ou ze onurud ami koriar, iṭa to noya kunu hukum nae, borong mulo taki-u amra ou hukum faislam.
6 Allar hukum mafik sola-u oilo mohobbot. Tumra foyla taki ze hukumor ḳota hunia airae, olaḳan mohobbotor fote solo.
7 Duniat oḳon bout laḳan dukabaz bar oisoin. Zetae ḳoin, manush surote Hozrot Isa al-Mosi duniat aisoin na, ila mat zera mate era oilo hou dukabaz ar Kane-Dorjal.
8 Te tumra hushiar roio, zate tumrar menotor fol na araia shullo-ana furuskar ḳamaitae faro.
9 Zeta manshe al-Mosir deoa talimor shima faroi zain, tan talimor bitre roin na, tarar dilor bitre Alla nai. Oile ze manush tan talimor ufre tir roy, tar dilor maze gaibi baf ar tan ḳas mayar zon Ibnulla, i duiozon-u asoin.
10 Kunu ustad tumrar gese aile he zudi ou laḳan talim na dey, te tare salam ḳorio na, ar tumrar baṛit asroy-o dio na.
11 Tare zegie salam ḳorbo, he to ogur bod ḳamor bagi oibo.
Bidayi salam
12 Tumrar gese to amar aro bout ḳota leḳar asil, oile ḳagoz-ḳolome hoḳolta leḳtam sairam na. Borong amar kial oilo, ami nize aia tumrar loge boia samna-samni gof ḳormu, teu hoḳlor bitoror kushi miṭbo.
13 Afnar ze boinre Allae fosond ḳorsoin, tan aolad oḳole afnare salam zanaira. Amin.