46
Hozrot Iakub (a:) Mishor desho aila
1 Israile tan hokkolta loia bar oigela. Ar Ber-Shebat aia tan baf Isʼhakor Allar name kurbani korla.
2 Bade raitor bala Allae Israilre didar dia ḳoila, “O Iakub, Iakub!” Tain zuaf dila, “Ounu ami.”
3 Allae formaila, “Ami Alla, tumar bafor Mabud. Tumi Mishoro zaite ḍoraio na, hono ami tumar eḳ biraṭ zati foyda ḳormu.
4 Ami tumar loge loge Mishoro zaimu, ar ami-u tumare hirbar firaia anmu ar tumar fua Iusufe tumar souk muzaia dibo.”
5 Bade Iakube Ber-Sheba taki roana oila. Feraune tarare neoar lagi zeta gaṛin disla, Israilor fuainte otat ḳori tarar bafre ar tarar bou, fua-fuṛinre loia gela.
6 Heshe Iakub, tan fuain ar tan fura gusṭi, foshur fal oḳol ar Kenan desho ḳamai kora hokkol don-doulot loia Mishoro fosla.
7 Ou laḳan Iakube tan fua-fuṛin, nati-natin, fura gusṭir hokkolre loia Mishoro faroigela.
8 Boni Israil, mani Iakub ar tan aolad oḳol zera Mishoro gesla, tarar ḳandan-nama oilo: Iakubor boṛo fua Ruben;
9 ar Rubenor fuain: Honuk, Falu, Hasir ar Kormi.
10 Shimionor fuain: Zimuel, Zamin, Ohod, Zakin, Shuhor, ar Kenani bour torofa Shoul.
11 Lebir fuain: Zarsun, Kahat ar Marari.
12 Ehudar fuain: Eir, Onon, Shela, Firuz ar Zarah. Oile Onon ar Eir Kenan desho-u mori gesla. Firuzor fuain: Hasir ar Hamul.
13 Isaḳoror fuain: Tola, Foa, Zashub ar Shimron.
14 Sobulonor fuain: Sered, Elon ar Zoholel.
15 Tara oila Lear huruttain, Foddon-Iramo Lear torofa Iakubor i huruttain ar tan fuṛi Dinar zonmo oisil, era hokkoltae tetrish zon.
16 Sadur fuain oila: Sifon, Hogi, Shuni, Ishbun, Eiri, Orudi ar Oreli.
17 Ashiror fuain: Imna, Zisba, Zisbi, Boria ar tarar boin Sera. Boriar fuain: Hebor ar Molkiel.
18 Tara oila Zilpar huruttain, Labone tan fuṛi Lear loge ou bandi Zilpare disla, era hoḳol-u tair torofa Iakubor huruttain, ou shullo zon.
19 Iakubor bibi Rahelar fuain oila: Iusuf ar Bin-Iamin.
20 Iusufor fuain Manosha ar Afraim Mishor desho zonmisla. Erar ma oila Oun mondiror babon-ṭakur, Puṭiferar fuṛi Asonot.
21 Bin-Iaminor fuain: Bela, Beḳor, Oshbel, Gera, Naman, Ehi, Rush, Muppim, Huppim ar Ord.
22 Tara oila Rahelar torofa Iakubor huruttain, ou souddo zon.
23 Danor fua: Hushim.
24 Noftalir fuain: Johoshiel, Guni, Izer ar Shillem.
25 Tara oila Bilhar huruttain, Labone tan fuṛi Rahelar loge ou bandi Bilhare disla. Era hoḳol-u tair torofa Iakubor huruttain, ou shat zon.
26 Iakubor nanan torofar zonmor zara Mishoro aila, tan fuaintor bou bad dia era hoḳole milia soyshoṭṭi zon asla.
27 Mishor desho Iusufor duizon fua zonmisla. Era shoho Iakubor foribaror zara Mishoro aila, tara muṭ shottoir zon.
28 Er age Iakube Ehudare Iusufor gese faṭaila, Gushono zaoar fot sinar lagi, teu tara hokkol ono gia fosla.
29 Ar Iusufe-o guṛar gaṛi hazaia tan baf Israilor loge Gushono deḳa ḳorat gela, ar tanre dekia-u ainja ḳori golat doria bout shomoy ḳandila.
30 Teu Israile Iusufre ḳoila, “Tumi zen zinda aso re fut, iṭa nizor souke deḳlam. Oḳon shantie-u mortam farmu.”
31 Ou Iusufe tan baiaintore ar tan bafor logor hoḳolre ḳoila, “Ami gia Feraunre zanaimu, amar baiain ar amar bafor baṛir hoḳol, Kenan desh tone amar gese aichchoin.
32 Tarar ḳam oilo foshu fala. Tara to sagol-meṛa faloin, ar tarar foshur fal oḳol ar hokkol mal-samana loia aichchoin.
33 Feraune zebla tumrare zikaiba, afnara kita ḳam ḳoroin?
34 Ou shomoy tumra ḳoio, afnar i gulam oḳole ar tarar baf-dada oḳole-o huruman tone-u foshu falia basoin. Teu tumra Gushono roitae farbae. Ḳaron foshu falra manshore Mishori oḳole gin ḳoroin.”