1 Bade Iusufe tan baṛir ḳadimre ou laḳan hukum dila, “I manush oḳlor bostat zoto dan zaga oy, boria dilao ar zarzir ṭeḳa tar bostar muko toio. 2 Oile ou huru zonor bostar muko tar ṭeḳar loge amar rufar baṭi-o toio.” Iusufe tare zela ḳoila, he oula ḳorlo. 3 Bador din biane-u tara gada loia bidae oila. 4 Tara ṭaun taki tuṛa duroi zaite-u Iusufe tan baṛir ḳadimre ḳoila, “Zoldi kori erar ḳore douṛaia gia, erar lagal faia harle ḳoibae, tumra ufoḳaror bodla ḳene ḳeti korlae? Amar munibor rufar baṭi kene suri korlae? 5 Ou baṭit ḳoria to tain shorbot-fani kain ar todbiror ḳam-o ḳoroin. Tumra ita kub oinnae ḳorso.”

6 Hi kadime tarar ḳoredi gia lagal faia ou laḳan ḳoilo. 7 Oile tara ḳoila, “Huzur ila mat ḳene matira? Afnar gulam oḳole kunu laḳan-u ita ḳam ḳorto nae. 8 Deḳoukka, agorbar amrar bostar muko ze ṭeḳa faislam, ita amra Kenan desh tone hirbar afnar gese firot anchi, te amra kunu afnar munibor baṛi tone shuna-rufa suri kormu ni? 9 Afnar i gulam oḳlor maze zar gese ou baṭi faiba, tare marilaiba ar amra-o huzuror gulam oizimu.” 10 Teu ḳadime ḳoilo, “Bala ḳota, te tumra zela ḳoilae, oula-u ouk. Zar gese ou baṭi milbo, ḳali tare amar gulam banaimu ar baki hoḳol ḳalas faibae.” 11 Ou tara zoldi kori hoḳlor bosta maṭit lamaia kullo. 12 Ar ḳadime boṛo bai tone huru bai tori hoḳlor bosta tukaile-o heshe Bin-Iaminor bostat hi baṭi millo. 13 Teu tara zarzir finnor ḳafoṛ faṛilla, bade hirbar gadar fiṭit gaiṭ bandia ṭauno ailo.

14 Teu Ehuda ar tar baiain Iusufor baṛit gela, i shomoy tain hono asla. Tara tan samne gia maṭit foṛla. 15 Iusufe tarare ḳoila, “Tumra ita kita ḳorlae? Ami zen hoḳolta gontam fari, ita tumra zano na ni?” 16 Ehudae ḳoilo, “Huzuror gese amra kita ḳoimu? Kita zuaf dimu? Ar kila amrare be-ḳosur ḳoitam? Allae-u tan gulam oḳlor dush deḳai disoin, te zar gese i baṭi milche, he ar amra hoḳole-u huzuror gulam oilam.” 17 Oile Iusufe ḳoila, “Na, na, ami i kam kunu laḳan-u ḳortam nae. Zar gese ou baṭi milche, he-u amar gulam oibo, baki shob sohi-salamote tumrar bafor gese zaogi.”

18 Teu Ehudae Iusufor ḳasat gia ḳoilo, “Huzur afne to Feraunor homan, te doya ḳori afnar gulamre ekkan mat matar shuzug deukka. Afnar gulamor ufre gusa oin na zen. 19 Huzure age i gulam oḳolre zikaisla, tumrar baf ba kunu bai asoin ni. 20 Amra zuaf dislam, amrar murobbi baba zinda asoin, ar tan heshḳali boyoshor egu fua ase. Tar bai morigese, ar he eḳ maʼr eḳ fut gotike babae tare kub maya ḳoroin. 21 Bade afnar i gulam oḳolre ḳoisla, tare amar gese loia aio, ami tare nizor souke deḳmu. 22 Hi shomoy amra huzurre ḳoislam, babare toia he aito farto nae ar toia aile-o baba mara zaiba. 23 Oile afne i gulam oḳolre ḳoisla, tumrar huru baire loge na anle, tumra ar amar samne aio na. 24 Erlagi amra firia gia afnar gulam, amrar babare huzuror hoḳol ḳota hunaislam. 25 Bade babae ḳoila, tumra hirbar gia amrar lagi aro tuṛa dan loia anogi. 26 Teu amra ḳoilam, amrar huru baire loge dile amra zaimu, arnae amra gia hi manshor samne muk deḳaitam nae. 27 Ou afnar gulam, amrar babae ḳoila, tumra to zano, amar i bibir torofa dugu fua asil. 28 Erar eḳzon amar sokur samon taki bar oia gelo, ar to kunudin tare deḳlam na, ami buzlam zen, nisoy kunu zanuare tare siṛi-biṛilaise. 29 Oḳon tumra ere-o amar ges tone nilegi ar er kunu ḳeti oile, tar duke tumra amare ou faḳna sule ḳoyboro haraibae. 30 Erlagi oḳon zudi afnar gulam, amar babar gese ami zai ar tan i fuare loge na deḳoin, te er zanor loge tan zan ekḳano banda gotike, 31 tare na deḳle, tain nisoy mara zaiba. Afnar gulam, amrar murobbi baf bout duke faḳna sul loia ḳoyboro hamaiba. 32 Ar afnar gulam ami, amar babar gese tar lagi zamin oia ḳoisi zen, tare firaia ante na farle, hara zindegi bora ami tumar gese dabit roimu. 33 Te huzur ami minoti koriar, tar bodla ami afnar gulami kormu ar tare afne erar loge zaibar dilaukka. 34 Ere loge na nia ami kila babar gese zaimu? Naile babar zanor shorbonash amar nizor souke deḳon lagbo.”