42
Hozrot Iusuf (a:)or dosh bai Mishoro gela
1 Iakube-o hunla Mishor desho dan ase, ou tan fuaintore ḳoila, “Tumra egue arogur mukor bae sai roiso ḳene?
2 Huno, ami hunchi, Mishor desho dan ase, tumra hono gia amrar lagi kisu dan loia ano, teu amra i moron takia zane basmu.”
3 Ou Iusufor dosho baie dan loia anar lagi Mishoro gela.
4 Oile Iakube Iusufor afon maʼr feṭor bai Bin-Iaminre tarar loge zaite dila na, tain ḳoila, er kunu bifod oizito fare.
5 Dan ḳoridor lagi Kenan desh taki zera Mishoro gelo, Israilor fuain-o tarar dolor logo oia gela, ḳaron Kenan desho-o aḳal asil.
6 I shomoy Iusuf-u asla Mishor deshor hokkoltar malik. Deshor hoḳol manshor gese tain-u dan besta. Teu Iusufor baiain-o tan gese gia, tara matare maṭit lagaia tanre ijjot ḳorla.
7 Iusufe tan baiaintore dekia-u sinilila, oile na sinar ban ḳoria, tain kub ḳoṛa golae tarare zikaila, “Tumra kuai taki aiso?” Tara ḳoila, “Amra Kenan desh tone aisi, dan nibar lagi.”
8 Iusufe tan baiainre hasaror sinle-o, baiainte tanre sinla na.
9 Tain erare loia kuabe zeta deḳsla, hou ḳota tan mono oilo. Ou tain erare ḳoila, “Tumra to guia! Amrar deshor fak-fuḳor ota deḳat aiso.”
10 Tara ḳoila, “Ji na huzur, afnar i gulam oḳole ḳali dan loat aisi.
11 Amra to hoḳol eḳ bafor aolad ar saichcha manush; afnar i gulam oḳol kunu guia nae.”
12 Iusufe hirbar tarare ḳoila, “Na, na, tumra amar deshor fak-fuḳor deḳat aiso.”
13 Tara ḳoila, “Afnar gulam oḳol, hoḳole milia baro bai. Amra Kenan deshor eḳ bafor aolad. Amrar huru bai oḳon babar gese roise, ar aroḳ bai nae.”
14 Iusufe tarare ḳoila, “Na, na, ami ṭik-u ḳoisi, tumra guia-u!
15 Te tumrar forikka ola-u oizauk: ami Feraunor zanor ḳosom ḳori koiar, tumrar huru bai ono na aile, tumra-o in tone saṛa faitae nae.
16 Tumrar eḳzonre faṭaia, tumrar hou baire anao ar baki hoḳole bondi ro. Ou forikkae tumrar mator hasa-misa buzmu. Tare na anle, ami Feraunor zanor ḳosom ḳori koiar, tumra nisoy guia!”
17 Ar Iusufe tin din tarare azot ḳanat bondi kori toila.
18 Heshe tin dinor din, Iusufe tarare ḳoila, “Huno, ami to Allare ḍorai, tumra baste saile, ami zela ḳoi, oula ḳoro.
19 Tumra hasaror saichcha manush oile, tumrar eḳ bai azoto taḳouk ar baki hoḳole tumrar aḳali foribaror lagi dan loia zaogi.
20 Tumrar mat hasa ki na iṭa buzar lagi, tumrar huru baire amar gese loia aio. Teu tumra mortae nae.” Ou tara-o razi oila.
21 Bade tara mata-mati korla, “Hasau to, amrar hi bair loge zeta ḳorsi ita oinnae. He amrar gese ḳaz-minoti korle-o, amra tar mato ḳan disi na. Erlagi amrar ufre i mosibot aise.”
22 Teu Rubene tarare ḳoila, “Ami to tumrare ḳoislam, tar ufre kunu zulum ḳorio na, tumra hunlae na. Deḳo, oḳon tar lour hishab-nikash dite or.”
23 Oile Iusufe zen tarar mat buzra, ita tara zanlo na. Ḳaron tain mat buzaora eḳzonre maze rakia, tarar loge matta.
24 Teu Iusufe tarar ges tone horia gia ḳandita lagla. Bade hirbar aia tarar loge matila ar tain Shimionre doria tarar samne-u bandailla.
25 Bade Iusufe tarar bostar maze dan boraia, zarzir ṭeḳa tar bostat firai dia, erar fotor ḳanir mosa deoar lagi hukum dila. Ar oula ḳora oilo.
26 Heshe tara zarzir gadar fiṭit danor gaiṭ bandia roana oila.
27 Foto ziranir zagat gia zebla eḳzone gadare ḳaoanir lagi bosta kullo, ar deḳlo, bostar muko tar ṭeḳar kuti.
28 Ou he tar baiainre ḳoilo, “Deḳo, deḳo, amar ṭeḳa amar bostat firot deoa oise.” Dekia-u tarar zan uṛi gelo ar ḍoraia ḳafte ḳafte ḳoilo, “Allae amrare ita kita ḳorla?”
29 Bade Kenan desho gia tarar baf Iakubor gese azir oia, ita hoḳolta hunaia ḳoila,
30 “Hi deshor malike, amrare kub ḳoṛa golae ḳoisoin, amra guia oia hi desho gesi.
31 Amra ḳoisi, amra hok manush, kunu guia nae.
32 Amra barozon bai, eḳ bafor baro fua, oile amrar eḳzon nae ar hoḳol tone huru bai oḳon Kenan desho babar gese roise.
33 Ou hi manshe, zein hi deshor malik, tain amrare ḳoila, ‘Ami oula buzmu zen, tumra hok manush. Tumrar eḳ baire amar gese toia, tumrar aḳali foribaror lagi dan loia zao.
34 Ar tumrar huru baire amar gese loia aio. Teu ami buzmu, tumra hok manush, kunu guia nae. Bade ami tumrar baire firai dimu ar tumra i desho ḳay-ḳarbar ḳortae farbae.’ ”
35 Bade tara bosta tone dan ḍalte-u deḳoin, tarar hoḳlor ṭeḳar kuti bostar maze roise. Ita dekia tarar bafe ar tara-o ḍoraigela.
36 Teu bafe tarare ḳoila, “Tumra amare aolad saṛa banaiso. Iusuf nae, Shimion-o nae ar oḳon tumra hirbar Bin-Iaminre-o nitae sairae. Ita hoḳolta-u amar zulum.”
37 Rubene tan bafre ḳoila, “Ami Bin-Iaminre tumar gese firaia ante na farle, tumi amar duio fuare kun ḳorilio. Tare tumi amar ato saṛi deo, ami tare tumar gese firaia anmu.”
38 Iakube ḳoila, “Na, amar i fua tumrar loge ditam nae. Tar bai morigese, ar oḳon he eḳla zita ase. Tumrar zaoar foto zudi tar kunu bifod oy, te ou faḳna sule bout duk dia tumra amare ḳoyboro haraibae.”