31
Hozrot Iakub (a:) hour baṛi taki bagila
1 Bade Iakubor ḳano ailo Labonor fuainte matira zen, “Iakube amrar bafor hokkolta nisegi, ar amrar bafor mal dia-u he maldar oigese.”
2 Ar Iakube-o kial ḳorla, tanbaedi Labonor agor hi monor bab ar nae.
3 Mabude Iakubre ḳoila, tumi tumar baf-dadar desho nizor manshor gese firia zaogi. Ami tumar loge taḳmu.
4 Ou Iakube ḳobria faṭaia Lea ar Rahelare bondo tan foshur falor gese anaia ḳoila,
5 “Ami tumartanor bafor muk dekia buziar, tan agor hi monor bab amar bae nae, oile amar bafor Mabud Alla amar loge loge roisoin.
6 Tumitain to zano zen, ami amar hoḳol shokti dia-u tan ḳoto gulami korsi,
7 ta-o tain amare ṭogisoin ar dosh-doshbar ḳoria amar beton bodlaisoin, oile Allae amar kunu ḳeti oite disoin na.
8 Tain zebla ḳoila, tumar beton oibo, fuṭa fuṭa rongor foshu, teu falor hoḳol foshue ou laḳan baichcha dilo. Hirbar tain zebla ḳoila, tumar beton oibo ḍura-ala foshu, teu falor hoḳol foshue ḍura-ala baichcha dilo.
9 Allae ou laḳan ḳori tan falor foshu ania amare disoin.
10 “Eḳbar foshuinte fal ḳaoar shomoy ami kuabe deḳlam, meṛi-sagintor ufre ze faṭa oḳol uṭira, iguin ḍura-ala, sitra ar fuṭa fuṭa rongor.
11 Kuabor maze Allar firistae amare ḍakila, ‘Iakub!’ Ami koilam, ‘Ounu ami.’
12 Tain ḳoila, ‘Tumi souk tulia deḳo, meṛi-sagintor ufre zeta faṭain uṭira, hokkolṭi ḍura-ala, sitra ar fuṭa fuṭa rongor. Labone tumar loge zeta zeta ḳorse, ita hoḳolta-u ami deḳsi.
13 Ami hou Betelor Alla, zeno tumi kuṭir ufre tel ḍalia amar name ḳosom ḳorslae. Oḳon solo, i desh saṛia tumar zonom maṭit firot zao.’ ”
14 Ou Lea ar Rahelae ḳoila, “Babar shompottir kunu dabi ar amrar roilo ni?
15 Tain to amrare begana manush mono ḳoria, amrare besilaisoin ar amrar hokkolta-u ḳailisoin.
16 Erlagi Allae amrar babar samana tone zotota nisoin, i hokkolṭi-u oḳon amrar ar amrar aolador oise. Te Allae tumare zela hukum ḳorsoin, tumi-o oula ḳoro.”
17 Bade Iakube tan huruttain ar bibintore uṭor ufre tulia,
18 Foddon-Iramo tan ḳamail foshu oḳol ar mal-samana hokkolta loia, Kenan desho tan baf Isʼhakor gese roana dilaila.
19 Hou shomoy Labone tan meṛaintor ruma ḳaṭar lagi gesla, ar ou faḳe Rahelae tan bafor murti oḳol suri korilila.
20 Iakube tan zaoar ḳota Orami Labonre na zanaia tanre ṭogila.
21 Ar tain hokkolta loia bagia, Furat gang faroia Giliodor faṛor samnedi zaoat roila.
Houre Hozrot Iakub (a:)re dorat aila
22 Zaoar tin din bade Labone hunla zen, Iakub bagia gesoingi.
23 Ou tain ḳesh-kuṭumre loia, Iakubor ḳore oia shat dinor fot gia, Giliodor faṛo tarar lagal faila.
24 Oile raitor bala Allae kuabe Orami Labonor gese aia ḳoila, “Ḳobordar! Iakubre bala-bura kunta-u ḳoio na.”
25 Iakube faṛor maze tambu gaṛisla, ar Labone gia tanre ono-u lagal failila, teu Labon ar tan ḳesh-kuṭum oḳole-o Giliodor hou faṛor maze tambu gaṛila.
26 Bade Labone Iakubre ḳoila, “Tumi kene ita ḳorlae? Amare ṭogia amar fuṛintore ḳene zuddor bondir laḳan loia ailae?
27 Ḳene tumi duka dia amare na zanaia, lukaia bagia ailae? Amare zanaile to ami kushi-bashi koria, dutara ar mondira bazaia gan gaia, tumare bidae dilam one.
28 Tumi amar fuṛintore ar natinoshare-o hunga dite-o dilae na, be-aḳolor moto ḳam ḳorlae.
29 Oḳon ami to tumrar ḳeti kortam farmu, oile tumrar baf-dadar Allae goto rait amare ḳoisoin, ‘Ḳobordar! Iakubre bala-bura kunta-u ḳoio na.’
30 Tumar bafor baṛit zaoar lagi mone ḳandisil ḳori, tumi bagia aiso manlam, te amar devta oḳol ḳene suri korlae?”
31 Iakube zuaf dila, “Ami ḍoraislam, mono ḳorslam, afne zur ḳoria afnar fuṛintore, amar ges tone ḳaṛia raki diba.
32 Te oḳon zar gese afnar devtain faiba, tare zita raḳtam nae. Amrar ḳesh-kuṭmor samne hokkolta tallash ḳoria zudi afnar kunta fain, taile neukkagi.” Hou murti oḳol zen Rahelae suri korsoin, ita to Iakube zanoin na.
33 Ou Labone Iakub, Lea ar duio bandir tambut hamaia hoḳolta tukaia kunta na faia, heshe Lear tambu tone Rahelar tambut gia hamaila.
34 Rahelae i murti oḳol nia uṭor goddir bitre toia, tain ou goddir ufre boila. Labone tan tambur hoḳolta tukaia hono-o ita faila na.
35 Ar Rahelae tan bafre ḳoila, “Bazan ami uṭia ubaitam fariar na ḳori afne bezar oin na zen, beṭiara bemaror lagi amar shoril ḳaraf.” Ou Labone hi murti oḳol ar tukaia faila na.
36 Heshe Iakube gusa oia Labonre siṛaia ḳoila, “Amar oforad kiano? Ami kita dush ḳorsi, afne amar ḳore oia oula ḳedanit aila?
37 Amar hoḳol mal-samana aulaia afnar goror kun zinishḳan faila? Faile ita afnar-amar ḳesh-kuṭmor samne raḳoukka, tara amrar bisar ḳorba.
38 Ami i bish boros afnar loge aslam. Er maze afnar kunu meṛi ba sagir feṭor baichcha nosṭo oise na ba afnar falor kunu meṛa-o ami kaisi na.
39 Ar zongli zanuare mara kunu foshu-o afnar gese anchi na, ita ami nize-u furia disi. Dino ba rait kunu foshu suri oile, afne amar ges taki boria loisoin.
40 Ami oula din ḳaṭaisi, dino zolchi gorome ar raite ḳafsi shite. Amar sokut gum aito na.
41 Ze bish boros afnar baṛit roisi, er souddo boros ami afnar dui fuṛir lagi gulami korsi, ar soy boros gese afnar foshur lagi. Er maze afne dosh-doshbar amar beton-o bodlaisoin.
42 Alla Pak, zanre amar baf Isʼhake Mabud hishabe ḍoraita, zein amar dada Ibrahimor-o Mabud, tain zudi amar loge na taḳta, te hasau oḳon afne amare ḳali ate bidae dila one. Allae amar menot ar duk deḳsoin. Erlagi-u tain ḳail rait afnare domḳaisoin.”
Hozrot Iakub (a:)or loge houror chukti
43 Labone Iakubre zuaf dila, “I fuṛin amar-u fuṛin, ar ou huruttain amar-u natinosha, ar i foshur fal oḳol-o amar. Tumi ono zotota deḳrae, hoḳolta-u amar, ta-o amar fuṛintore ba tarar huruttaintore ami ar kita ḳormu?
44 Ao, amra duiozone eḳ chukti korilai. Ou chuktir nishanaṭa tumar-amar maze shakki roibo.”
45 Ou Iakube eḳ fattor loia kuṭi gaṛila.
46 Ar tan ḳesh-kuṭum oḳolre ḳoila, “Afnara-o fattor anoukka.” Teu tara-o fattor ania eḳ biṭa banaila, heshe ou biṭar gese ḳani kaila.
47 Labone hou biṭar nam raḳla Zigor-Sahoduta [mani, shakki-biṭa] oile Iakube er nam raḳla Gol-ed.
48 Labone ḳoila, “Ou biṭa oḳon tone tumar-amar shakki oilo.” Erlagi ou biṭar nam oilo Gol-ed,
49 ar ou kuṭir nam oilo Mispa [mani, faharar zaga]. Labone ḳoila, “Amra zebla horia zaimugi ou shomoy Mabude-u tumar-amar fahara diba.
50 Tumi zudi amar fuṛintore duk deo ba amar fuṛin saṛa ar ḳeurore bia ḳoro, taile kunu manush amrar loge na roile-o Alla amrar shakki roila.”
51 Labone Iakubre aro ḳoila, “Ou biṭa bae ar ou kuṭir bae sao, iṭa tumar-amar mazḳano ami gaṛlam.
52 I duioṭa tumar-amar shakki roilo. Tumi-o ingsha ḳori ou biṭa ar kuṭi ḍingaia aibae na ar ami-o burair niote ita ḍingaia zaitam nae.
53 Ibrahimor Alla, Nahuror uforala ar tarar bafor uforalae tumar-amar bisar ḳorba.” Ar Iakube, tan baf Isʼhake zanre ḍoraita tan name ḳosom ḳorla.
54 Iakube hou faṛor ufre kurbani koria tan ḳesh-kuṭum oḳolre ḳaoar daoat dila. Ḳaoa-daoa shesh ḳoria hari tara hou faṛor maze rait roila.
55 Bador din fozore Labone tan fuṛintore ar natinoshare hunga dia dua ḳorla, heshe tan baṛi muka fot dila.