Fobitro Tourat Shorif foyla sifara
Foyda Nama
Siloṭi bashae torjoma
Forisiti
Tourat Shorifor 5 ḳan sifarar maze foyla sifara oilo ‘Foyda Nama’. Ou sifarar foyla ayato ase “Foyla-u Alla,” ar hesh ayato ase Hozrot Iusuf (a:)or mout. Ar hasau amra dunia foyda tone Hozrot Iusuf (a:) forzonto bout nobir boyani i sifarat fai. Foyda Namar mul bishoy oilo, Adom zatie Iblis-Shoytanor bul foramish hunia hari naforman bonigela. Bade Alla Pake ou naformani taki mukti faoar lagi eḳ fot deḳaila, zate Adom zati hirbar tan didar-doroshon faita faroin.
Ou fotre dui nomunae deḳail oise. Foyla, Allae nanan nobir loge tan didar faoar oada-chukti korla, ar hou nobir ummote-o er niamot-fozilot faila. Ar dusra nomuna oilo, Alla Pake oada ḳorla, tan faṭail hou nobi oḳlor silsila taki ola eḳ fobitro zon i duniat aiba, aile en usillae duniar hoḳol zatie Allar doya ar rohom-borkot faiba, manshe dunia ar aḳerato nazat faiba. Zemon, Adom-Haoar samne tain Shoytanre ḳoila, “Beṭi manshor bongshe tumar ḳolla guṛa ḳorbo” (3 ruku 15 ayat). Mani, hou fobitro zone Shoytanor hoḳol ḳemota ar bol-shoktire binash ḳorba, ein zonom loiba eḳ beṭi manshor goro, bade arok kitabo Allae zanaisoin en zonom oibo abiati eḳ shoti narir goro. Ar Hozrot Ibrahim (a:)re ḳoila, “Tumar bongshor usillae duniar hoḳol zatie borkot hasil ḳorba” (22:18 ayat). Bade tain Hozrot Ibrahimre zanaisoin, hou fobitro aolad aiba tan huru fua Hozrot Isʼhak (a:)or fua Iakub nobir ḳandano.
Allae Hozrot Iakub (a:)re noya nam disla Hozrot Israil, erlagi Iakubor bongshodorre ḳoa oy ‘Boni Israil’, mani Hozrot Israilor aolad oḳol. Foyda Nama sifarar hesh ongshot ase, Hozrot Iusuf (a:) kila Mishor desho gulam bonla ar bade Mishor deshor raza bonia nidanor at taki zan basanir lagi, tan nizor baba ar baiainre-o ou Mishoro anchoin. Ou nomunae Boni Israil Mishoro boshot ḳora shuru oilo.
Ermaze ase,
Hozrot Adom (a:)—Duniar foyda 1—5 ruku
Hozrot Nuh (a:)—Fanir gozob 6—10 ruku
Hozrot Ibrahim (a:)—Allar oada 11—23 ruku
Hozrot Isʼhak (a:)—Hirbar Allar oada 24—26 ruku
Hozrot Iakub (a:)—Boni Israilor shuru 27—36 ruku
Hozrot Iusuf (a:)—Boni Israil Mishor desho aila 37—50 ruku
Hozrot Adom (a:) (1:1—5:32)
1
Asman-zomin foyda
1 Foyla-u Allae asman ar dunia foyda ḳorla.
2 Duniai niraḳar ar ḳali asil, goin fanir ufre fura andair asil. Allar ruhu er ufre solasol ḳorta.
3 Bade Allae formaila for ouk, ar for oilo.
4 Allae deḳla for bala. Tain andair taki forre alga ḳoria
5 er nam raḳla din, ar andairor nam raḳla rait. Hainja gelo, bian-o gelo, ikṭa oilo foyla din.
6 Bade Allae formaila, fanir maze gumbuzor laḳan faḳ zaga ouk, ar fani dui bag oizauk.
7 Ar Allae faḳ zaga foyda ḳoria, tolor ar ufror fani alga ḳorla. Ar oula oilo.
8 Allae gumbuzor laḳan ze zaga banaila, tar nam raḳla asman. Hainja gelo, bian-o gelo, ikṭa oilo dui nombor din.
9 Erbade Allae formaila, asmanor tolor fani eḳ zagat dola ouk, ar hukna zaga deḳa zauk. Ar oula oilo.
10 Allae hukna zagar nam raḳla zomin ar zomail fanir nam doria. Tain deḳla ita bala.
11 Bade Allae formaila, zomino gash folouk; ar hoḳol zator bisala lota-fata gas-gasalir zonom ouk. Ar zominor ufre hoḳol zator folor gas-o ouk, era nizor zatmoto fol dorbo ar folor maze zarzir bis-o taḳbo. Ar oula oilo.
12 Zomino gash folilo, hoḳol zator bisala lota-fata gas-birik zonmilo. Zominor ufre hoḳol zator folor gas oilo zetae zarzir zatmoto fol dore, hi folor maze zarzir bis-o ase. Allae deḳla ita bala.
13 Hainja gelo, bian-o gelo, ikṭa oilo tin nombor din.
14 Bade Allae formaila, asmanor maze oula serag oḳol ouk, zara rait taki dinre alga ḳore. Ita alga alga din, bosor ar id-utshobor nishana oibo.
15 Asman taki tara duniair ufre for dibo. Oula-u oilo.
16 Allae duiṭa boṛo serag banaila, ermaze boṛoṭare dinor ufre bashshai korar lagi ar huruṭare raitor ufre. Ita saṛa tain tera oḳol-o foyda ḳorla.
17 Tain erare asmanor maze boaila zate tara duniait for dey.
18 Era din ar raitor ufre bashshai kore, andair taki forre alga ḳore. Allae deḳla ita bala.
19 Hainja gelo, bian-o gelo, ikṭa oilo sair nombor din.
20 Bade Allae formaila, fanir maze zandar oḳol fale fale bori zauk, ar duniair ufre asmanor maze fakin uṛouk.
21 Ar Allae doriar biraṭ zandar oḳol, ar fanir maze fal bandia gurra hoḳol zator zandar foyda ḳorla, ar hoḳol zator faki-o foyda ḳorla. Tain deḳla ita bala.
22 Tain tara hoḳolre ou laḳan borkot nazil ḳorla, tumra folala oia baṛo ar doriar fani bori zao, duniair maze faki oḳol-o baṛouk.
23 Hainja gelo, bian-o gelo, ikṭa oilo fas nombor din.
24 Erbade Allae formaila, maṭi taki oula zandar ouk zarar nizor zat oḳolre baṛaibo, erar maze fala heman, maṭit solra huru-muru zandar ar zongli zanuar oḳol-o. Oula-u oilo.
25 Allae duniair maze hoḳol zator zongli zanuar, fala heman ar maṭir maze buke solra zandar banaila. Tain deḳla ita bala.
26 Erbade Allae formaila, ao amrar surote amrar loge mil rakia manush banai. Tara doriar mas, asmanor faki, zanuar, maṭir maze buke solra zandar, ar asta duniair ufre bashshai korouk.
27 Tain tan nizor surote manush foyda ḳorla, ekkere nizor moto ḳori foyda ḳorla, foyda ḳorla beṭa ar beṭi.
28 Ar tarare borkot nazil ḳoria ḳoila, tumitain folala oia baṛia duniai borizao. Duniaire shashon ḳoro, ar doriar mas, asmanor faki, maṭir ufre solra hoḳol zandaror ufre bashshai koro.
29 Erbade Allae formaila, huno, duniar ufror hoḳol zator bisala gas-birik, ar hoḳol zator folor gas zarar nizor zatmoto fol dore zar folor maze tarar nizor bis ase, ita hoḳolta ami tumrar ḳanir lagi dilam.
30 Duniar forteḳ zanuar, asmanor fakin, maṭir maze buke solra zandar, ita hokkol zandaror ḳanir lagi ami hoḳol lota-fata ar gash dilam. Oula-u oilo.
31 Allae tan foyda ḳora hoḳolta deḳla, ita hoḳolta-u kub bala oise. Hainja gelo, bian-o gelo. Ikṭa oilo soy nombor din.