38
Zalail kurbani kana ar uzur fanir gamla banaila
1 Zalail kurbanir lagi babla laḳṛidi fas at lamba, fas at fash ar tin at ubi dia sairkuni kori ekkan kurbani kana banaila.
2 Er sairo kunar ufre laḳṛidi sairṭa hing dila. Ou hing banaila sanir ufror kunar laḳṛi kudia, erlagi i astaḳan eḳ siz oilo. Bade fura kurbani kana fitoldi lefaila.
3 Kurbani kanar sali tular boṛo samos ar sali toar gamla, lou toar baṭi, gust tular boṛo ḳaṭa-sif, angra toar fatil, hoḳolta fitoldi banaila.
4 Kurbani kanar lagi fitoldi ekkan zali banaila, banaia i zalire kurbani kanar bitoror mazḳanor sairo galar taṛiar tole lagaila.
5 Ar benda haranir lagi zalir sairo kunat sairṭa ḳoṛa lagaila.
6 Boia neoar benda banaila babla laḳṛidi, banaia duiogu fitoldi lefaila.
7 Ar kurbani kanare boibar lagi er kunar ḳoṛar bitre ou benda haraila. Kurbani kana banaila toḳtadi, ar er bitre faḳ raḳla.
8 Uzur fani toar lagi fitolor ek gamla banaila. Ebadoti kamor lagi zeta beṭin Milon-tambur duaror ḳasat aita, tarar fitolor aynadi i gamla ar er soki-kaṭ toiar ḳora oilo.
Allar goror uṭan
9 Batselole Allar goror sairo galabae uṭanor zaga raḳla. Uṭanor dokkin galar eḳ-sho at zagar lagi dami suti kafoṛdi forda banaila.
10 I forda ṭananir lagi bishgu kuṭi banaila. Kuṭir tolat dibar lagi fitolor bishgu sungi banaila, ar forda ṭananir lagi rufar ḳoṛa ar bandibar tar banaila.
11 Uṭanor uttor galar eḳ-sho at zagar lagi bishgu kuṭi, kuṭir tole dibar lagi fitolor bishgu sungi, ar forda ṭananir lagi rufar ḳoṛa ar bandibar tar banaila.
12 Fosim galar foinchash at uṭanor lagi forda, doshgu kuṭi, doshgu sungi, forda ṭananir lagi rufar ḳoṛa ar bandibar tar banaila.
13 Fub galar uṭan-o foinchash at asil.
14 Uṭanor geiṭor ek galar lagi fonro at lamba forda, tinṭa kuṭi, kuṭir tolor tingu sungi,
15 ar dusra galat-o ou laḳan ḳori tinṭa kuṭi, tinṭa sungi ar fonro at forda banail oilo.
16 Uṭanor sairo galar hokkol fordain dami suti kafoṛdi banail oilo.
17 Kuṭir tolor hokkol sungi fitolor, forda ṭananir ḳoṛa ar bandibar tar oilo rufar, kuṭir mata-o rufadi fesail oilo. Uṭanor sairo galar hokkol kuṭit rufar tardi banda oilo.
18 Uṭanor geiṭor lagi dami suti kafoṛdi ekkan forda banail oilo. Bade lilua, baingoni, lal sutadi noksha ḳora oilo. Forda ḳan bish at lamba, ar uṭanor baki fordar laḳan iṭa-o fas at usa deoa oilo.
19 Er sairo kuṭi ar sungi fitolor, kuṭir ḳoṛa ar bandar tar rufar, kuṭir mata-o rufadi fesai deoa oilo.
20 Allar gor ar uṭanor sairo galar kuṭir fereg oḳol fitoldi banail.
Allar goror mal-samanar hishab
21 Allar gor mani ou shahadot tambu banaite zeta mal-samana lagsil, imam Harunor fua Isamaror zimmae Lebi kandanor manshe itar hishab raḳla. Musa nobie ou hishab raḳar hukum disla.
22 Mabude Musare zelaḳan hukum disla, i hukum mafik Ehuda gusṭir Urir fua Batselole ita hokkolta banaila, tain asla Huror nati.
23 Dan gusṭir Ohisamaḳor fua Aholiabe Batselolre shaijjo ḳorla. Hoḳol zator ator ḳam ar noksha bananir ḳamo tain ustad asla. Dami suti kafoṛor maze lilua, baingoni, lal sutadi noksha ḳorar ḳamo-o tain ustad asla.
24 Dulona kurbani taki faoa untish mon shat-sho tish tola shuna ou ebadot ḳana banaite lagse. I maf oilo ebadot ḳanar tolar mafe.
25 Boni Israilor manush gonibar bala zerare gona oisil, tarar ges taki eḳ-sho mon eḳ azar shat-sho fosottoir tola rufa faoa gesil, i maf oilo ebadot ḳanar mafe.
26 Gona oise oula manush, mani bish boros ba er saite beshi boyosh ala, hou soy laḳ tin azar shaṛe fas-sho manshe ebadot ḳanar mafe mata fisu ada tola ḳori rufa disil.
27 I rufa taki eḳ-sho mon rufa dia ebadot ḳana ar fordar kuṭir tolor sungi banail oisil. Eḳ eḳ sungit eḳ mon rufa dia muṭ eḳ-shogu sungi banail oise.
28 Ar baki eḳ azar shat-sho fosottoir tola rufa kuṭir ḳoṛa, kuṭir mata fesani, ar bandibar tar bananit lagse.
29 Dulona kurbani taki lillar fitol dola oisil shottoir mon dui azar sair-sho tola.
30 Ita dia Milon-tambur duaror sungi, fitolor kurbani kana, er fitolor zali ar kurbani kanar hokkol siz banail oise,
31 uṭanor sairo galar sungi, geiṭor sungi, tambu ar uṭanor sairo galar kuṭir fereg banail oise.