Allar fobitro gor banani (35:1—40:38)
35
Zummabaror hukum-ahkam
1 Musa nobie Boni Israilor hoḳol gusṭire dola ḳoria ḳoila, “Mabude hukum disoin, tan ou hukum-ahkam amol ḳorar lagi.
2 Tumra haftar soydin ḳam ḳorio, oile shat nombor din Mabudor name fak-fobitro din, aramor din, Zummabar. I din ze manshe ḳam ḳorbo, tare marilibae.
3 Zummabare tumrar ḳeuror goro aguin zalaio na.”
Allar goror lagi lilla deo
4 Hozrot Musae Boni Israilre ḳoila, “Mabude hukum disoin,
5 tumra zarzir dilor kushi mafik Mabudor name lilla loia ao. Anar shomoy oula siz oḳol lilla anio:
shuna, rufa, fitol;
6 lilua, baingoni, lal rongor suta;
dami suti kafoṛ ar sagolor ruma;
7 lal rong lagail meṛar samṛa, fuʼr samṛa;
babla laḳṛi;
8 serag zalanir lagi zoytunor tel;
kelafoti shomzibar telor moshla ar agor-kushboy bananir moshla;
9 imamor efron ar bukur ufror tolit laganir lagi akik moni ar hoḳol nomunar dami fattor.
10 “Tumrar maze zara bala ustad ḳarigor, tara aia ou hoḳolta banaiba, zela Mabude hukum disoin:
11 Allar gor, goror sal, huk, freim, batti, kuṭi, kuṭir tolor sungi;
12 shahadot shonduk, shondukor ḍaḳna, shonduk boia neoar benda;
shondukre agla dibar forda;
13 benda shudda ṭebul, ṭebulor ufror hoḳol siz, Mabudor namor fobitro ruṭi;
14 for dibar lagi serag dani, er logor hoḳol siz ar serag oḳol, serag zalanir tel;
15 agor-kushboy zalanir ṭebul, ikan boia neoar benda;
kelafotir tel, kushboy-ala agor, Allar goror duaror forda;
16 zalail kurbani dibar kurbani kana;
er fitolor zali ar boia neoar benda;
kurbani kanar hokkol mal-samana;
uzur gamla ar gamla toar soki-kaṭ;
17 uṭanor fordain, kuṭin ar kuṭir tolor sungi;
uṭano hamanir geiṭor forda;
18 goror fereg ar doṛi, uṭanor fereg ar doṛi;
19 pak zagat imamoti kamor lagi, imam Harunor fobitro lebas, ar tan fuaintor-o imamotir lebas.”
20 Musa nobir boyan bade Boni Israilor hoḳol gusṭi bidae oigela.
21 Gia tarar dilor eshki mafik zarzir ichchae Allar Milon-tambu bananir lagi, imam Harunor fak-fobitro lebasor lagi ar ebadot ḳamor lagi hoḳol nomunar mal-samana loia aila. Allar name lilla dibar lagi ota loia tara azir oila.
22 Beṭain ba beṭintor maze zarar mone sailo, tara ita dila. Tara zarzir ḳafoṛor fing, ḳanor iaring, angṭi, golar har, ar hoḳol zator shunar goyna ania Mabudor name dulona kurbani hishabe dila.
23 Ar zerar gese lilua suta, baingoni, lal suta, dami suti kafoṛ, sagolor ruma, lal rong kora meṛar samṛa, fuʼr samṛa asil, tara ita hoḳolta loia aila.
24 Zerar gese rufa ar fitol asil, tara-o ita ania Mabudor name lilla dila. Allar goror ḳamo laganir zuka babla laḳṛi zerar gese asil, tara-o ita loia aila.
25 Zeta beṭinte suta bananit ustad, tara nizor ate lilua, baingoni, lal rongor suta, ar dami suti kafoṛ banaia anla.
26 Ar suta banaora zeta beṭintor dilor maze eshki foyda oilo, tara sagolor ruma dia suta banaila.
27 Murobbi oḳole efron ar bukur ufror tolit laganir lagi, akik moni ar dami dami fattor loia aila.
28 Serag zalanir tel, ḳelafoti shomzibar tel, agor-kushboy bananir moshla ar zoytunor tel-o anla.
29 Mabude Musar mazdi zeta zeta ḳorar hukum disla, ita fura ḳorar lagi Boni Israilor hoḳol beṭain-beṭinte, zarzir kushi mafik lilla loia azir oilo.
Batselol ar Aholiab Allar fosond ḳora ḳarigor
30 Bade Musae hoḳol Boni Israilre ḳoila, “Mabude Ehuda gusṭir Huror nati, Urir fua Batselolre fosond ḳorsoin.
31 Tain ere nizor ruhu mubarok dia kamil banaia, hoḳol laḳan ḳarigori kamor aḳol-buddi, biddae ustadi kamor ḳemota disoin.
32 Erlagi ein ḳarigori kam ḳorar bala nizor aḳol ḳaṭaia shuna, rufa, fitolor ufre shundor shundor noksha banaita farba.
33 Dami dami fattor ḳaṭa, laḳṛir ufre noksha, ar hoḳol nomunar ator ḳam ḳorta farba.
34 Ar oinno manshore-o ita ḳam hikanir lagi Batselol ar Dan gusṭir Ohisamaḳor fua Aholiabor dilo Mabude aḳol disoin.
35 Tain erare nanan zator nokshar ḳam, lilua, baingoni, lal sutadi kafoṛ bain ḳora, noksha ḳora, silai kora, ar dami suti kafoṛ silai korar-o aḳol disoin. Tara hoḳol nomunar ator ḳam ḳorta farba, ar nizor mon taki nanan nomunar noksha banaita farba.”