30
Agor-kushboy zalanir ṭebul
1 Mabude Musare ḳoila, “Agor-kushboy zalaibar lagi tumi babla laḳṛidi ekkan ṭebul banaio.
2 Igu oibo sairkuna ala, eḳ at lamba, eḳ at fash, dui at ubi. Asta ḳan-u hing shudda ekḳano lagail roibo.
3 Er ufror sani, sanir sairo kinara ar hing, hoḳolta ḳaṭi shunadi lefibae. Sairo kinaro shunar noksha ḳoraibae.
4 Er dui kinaror nokshar tole dugu ḳori shunar ḳoṛa lagaio. I koṛar bitre benda haraia ogu boia neoa oibo.
5 I benda guin babla laḳṛidi banaia shunadi lefaio.
6 Shahadot shondukor ḍaḳnar ḳasat ze fordaḳan ase, ou ṭebul er samne rakio. Ou zagat ami tumare didar dimu.
7 “Forteḳ din biane serag guin zuit-zait ḳorar bala, Harune ou ṭebulor ufre kushboy-ala agor zalaibo.
8 Hainja bala serag zalanir shomoy, he hirbar agor-kushboy zalaibo. Tumrar oarishor for oarish dori Mabudor samne hor-hamesha ou agor-kushboy zolbo.
9 I agor-kushboy zalanir ṭebulor ufre dusra kunuzator kushboy zalaio na. Kunu zalail kurbani, dan-gomor sodga, ba shorbot-fanir sodga dio na.
10 Gunar mafir kofora hishabe, Harune bosoro eḳbar gunar koforar kurbanir lou, ṭebulor hing oḳlor ufre lagaite oibo. Teu ikan Mabudor name moha-fobitro oibo. Oarishor for oarish dori fordan imame bosoro eḳbar ou laḳan ḳorte oibo.”
Zanor bodla rufa
11 Bade Mabude Musare ḳoila,
12 “Tumi zebla Boni Israilor manshor foriman gonbae, ou shomoy tara hoḳole-u zarzir zanor bodla rufa dite oibo, zate i gonar lagi tarar ufre kunu gozob na ae.
13 Tarare gonar bala oula bodla loio, gona oise dolo zera hamaiba, era ebadot ḳanar mafe ada tola rufa diba. Forteḳ bish rotie eḳ tola gonio. I rufa oibo Mabudor.
14 Bish boros ba er beshi boyoshor zekunu zon gona shesh oa dolo hamaile, en zanor bodla Mabudre ou rufa diba.
15 Zanor bodla deoar shomoy doni oḳole ou ada tolar beshi dita farta nae, ar goribe-o ḳom dile oito nae.
16 Tumi Boni Israilor ges taki zanor bodla ou rufa nia, amar goror ḳamo lagaio. Tumrar zanor bodla i rufae, Boni Israil oḳolre Mabudor dorbaro iad ḳorai dibo.”
Uzur fanir gamla banaio
17 Mabude Musare ḳoila,
18 “Uzu ḳorar lagi tumi fitolor eḳṭa gamla, ar gamla toar lagi fitolor ekkan soki-kaṭ banaio. Milon-tambu ar kurbani kanar mazḳano fani boria ogu toio.
19 I fanidi Harun ar tar fuainte uzu ḳorba.
20 Tara zate na moroin, erlagi forteḳbar Milon-tambut hamaibar bala ou fanidi uzu ḳorte oibo. Imam hishabe Mabudor name agunit deoa zekunu kurbani adae ḳorar shomoy-o uzu ḳorte oibo.
21 Tara zane basia roar lagi ou uzu ḳorba. I hukum tarar lagi hor-hamesha salu roibo, oarishor for oarish dori boail roibo.”
Ḳelafoti shomzibar tel
22 Mabude Musare ḳoila,
23 “Tumar nizor gese kushboydar bala bala moshla oḳol dola ḳoro. Tumi fas-sho tola mura namor ator, aṛai-sho tola kushboy-ala ḍailchini, ar aṛai-sho tola bos,
24 shadaron ḍailchini fas-sho tola, ar zoytunor tel sair sher dola ḳorio. I maf oilo ebadot ḳanar mafe.
25 Ou moshla oḳol dia agor-kushboy moshla bananir ḳarigoror niome tumi kelafoti shomzibar tel banaio, i tel to fobitro.
26 Ou tel dia tumi Milon-tambu, shahadot shonduk,
27 ṭebul, ṭebulor ufror hoḳol samana, serag danir hoḳolta, ar agor-kushboy zalanir ṭebul,
28 kurbani kana ar er mazor hoḳol samana, uzur gamla ar er tolor soki-kaṭ hoḳoltare fusia fak-fobitro ḳorio.
29 Teu i hoḳolta moha-fobitro samana oibo. Ita samana ḳeu soile, he-o moha-fobitro oizibo.
30 “Tumi Harunre ar tar fuainre amar imamotir ḳamor lagi kelafotir tel dia fak-fobitro ḳorio.
31 Ar Boni Israilre zanai dio, oarishor for oarish dori iṭa-u oibo amar ḳelafoti shomzibar fobitro tel.
32 I tel manshor gotro deoa zaito nae. I niome tara zate ar kunu tel na banae. I tel to fobitro. Tumra iṭare fak-fobitro mono ḳoria ijjot ḳorte oibo.
33 Ḳeu zudi i laḳan tel toiar ḳore, ba imam sab saṛa ar ḳeu i tel gotro maḳe, te tare nizor zati taki fusilibae.”
Agor-kushboy bananir niom
34 Mabude Musare ḳoila, “Tumi nizor gese kisu kushboy-ala moshla: guggulu, noki, kunduru ar ḳaṭi loban dola ḳorio. Dola ḳoria ota homan homan ḳori mishaio.
35 Ar zera agor-kushboy banain, tararedi ou ḳam ḳoraio. Itar loge nun mishaio, ita oibo nirbezal ḳaṭi fak-fobitro agor.
36 Ou agoror tuṛa guṛa nia Milon-tambur shahadot shondukor samne toio. Hono ami tumare didar dimu. Tumra i agorre moha-fobitro samana mono ḳorio.
37 Ou moshla dia i niome ḳeu zate tar nizor lagi kunu agor-kushboy na banae. Ita to Mabudor name fak-fobitro siz, ikan kial rakio.
38 Kushboydar siz mono ḳoria ḳeu zudi ita toiar ḳorilae, te tare i zati taki fusilibae.”