7
Deshor bidormir loge dusti korio na
1 Hozrot Musae aro ḳoila, “Huno, tumra ze desh doḳol ḳorat zairae, tumrar Mabud Allae-u tumrare hono niba ar bout zatire tumrar samne taki kedaia hari ita doḳol ḳoraiba. Tain Hiṭṭi, Girgashi, Amuri, Kenani, Farizi, Hibbi ar Zibuzi zatire ḳedai diba, i shato zati-u forimane tumra taki boṛo ar bolala.
2 Tumrar Mabud Allae zebla itare tumrar ato shofia diba, ou shomoy tumra tarare ekkebare binash ḳorilio, tarar loge kunu chukti korio na, ar kunu doya-maya deḳaio na.
3 Itar loge bia-shadir befare kunu chukti korio na. Tumrar fuṛintore tarar fuaintor gese bia dio na, ar tarar fuṛinre-o tumrar fuaintor lagi anio na.
4 Ḳaron itae tumrar fua-fuṛinre amar ges taki horaia deb-debir puja ḳoraibo. Teu Alla Mabude tumrar ufre gusa oia, loge loge-u tumrare binash ḳorba.
5 Erlagi tumra tarar hoḳol puja-monḍop bangilio, pujar zaga oḳol binash ḳorio, Ashera-debir nishana kuṭi kaṭia falaio, ar hoḳol zator murtire aguindi zalaio.
6 Mono rakio, tumra-u oilae Alla Mabudor fobitro proza. Duniar hoḳol zatir maz taki tain-u tumrare nizor proza ar ḳas shompod hishabe alog korsoin.
7 “Ḳene alog korsoin? Oinno zati taki tumrar manush beshi, otar lagi ni? Na, muṭe-u na. Tumra to hoḳol zati taki kom aslae.
8 Ta-o tain tumrare kub maya-mohobbot ḳoroin, ar tumrar baf-dada oḳlor gese ze ḳosom ḳorsla, otar lagi-u tumrare alog korsoin. Mabude tan kudroti at lagaia tumrare bar ḳoria anchoin, Mishoror bashsha Feraunor at taki ar gulamir desh taki tumrare azad ḳorsoin.
9 Oḳon tumra mono rakio, tumrar Mabud Alla-u oila asol Mabud. Tain-u siroḳalin hok-halal. Zera ashik oia tane mohobbot ḳore ar tan hukum-ahkam mane, tain tarar azar azar siṛi forzonto nizor oada ḳora zoban ar doya boail raḳoin.
10 Oile zetae bod shaosh ḳoria tan bae fis dilae, tain itare binash ḳoria zoldi kori bodla dein.
11 Erlagi aiz tumrare ze hukum-ahkam, niom-ḳanun ar shoriot diram, ita kub kial ḳoria amol ḳorio.
Allar hukum manar furuskar
12 “O Boni Israil, tumra ou hukum-ahkamor ḳota ḳan fatia huno, ar ita kial ḳori amol ḳoro. Teu tumrar Mabud Allae tumrar baf-dadaintor loge, tan doya-mayar befare ḳosom ḳaia ze oada-chukti korsla, ita tumrar loge boail raḳba.
13 Tain tumrare maya-mohobbot ḳorba, rohom-borkot diba ar tumrar manshor foriman baṛaiba. Tumrare ze desh dibar lagi tumrar moy-murobbir gese ḳosom ḳaisla, ou desho tumrare rohom-borkot diba. Tumrare aolad baṛai diba, tumrar baganor fol-mul, ḳetor foshol, anguror rosh, zoytunor tel, goru-basur, meṛa-sagol hoḳoltare baṛai diba.
14 Hoḳol zati taki tumra beshi rohom-borkot faibae, tumrar beṭain-beṭin ba tumrar foshur falor ḳeu aṭkura roito nae.
15 Alla Mabude tumrare hoḳol laḳan bemar taki basaiba. Mishor desho tumra zeta ḳoṭin bemar-azar deḳso, ita tumrare dita nae, ḳali tumrar dushmon oḳolre diba.
16 Tumrar Mabud Allae zoto zatir manshore tumrar ato shofiba, itare tumra ekkebare shesh ḳorilaio, kunu doya ḳorio na, ar tumra itar devtare puja ḳorio na, arnae ita tumrar fotor ḳaṭa oiba.
17 “Tumra hoyto mone mone ḳoibae, amra kilaḳan tarare ḳedaia dimu? Ita zatir manush to forimane amra taki bakka beshi.
18 Oile tumra itare ḍoraio na. Feraun ar asta Mishor deshor ufre tumrar Mabud Allae kita ḳorsoin, ita tumra faurio na.
19 Mabude ḳoto boṛo boṛo gozob-mosibot ḍalia tarare binash ḳorsoin, ita to nizor souke-o deḳso. Tan bout kudroti kam, bout laḳan nishana deḳso, tan bolala mozbut at dia tumrare bar ḳoria anchoin, ita hoḳolta mono rakio. Ar tumra oḳon zeta zati oḳolre dekia ḍorairae, itar ufre-o tumrar Mabud Allae ṭik oula goṭaiba.
20 Erbade-o tumrar ges taki lukaia zeguin zita roiziba, tumrar Mabud Allae bingulor fal faṭaia ita hoḳolṭire binash ḳorba.
21 Te tumra itare ḍoraio na, zano to, tumrar Mabud Alla zein tumrar loge boshot ḳoroin, ein boṛo boyonkor ar mohan.
22 Tumrar Mabud Allae tumrar samne taki aste aste ota zatire ḳedai diba. Oile hoḳolṭire to tumra eḳloge ḳedaitae fartae nae, ḳedaile zongli zanuare tumrar sairobae boriziba.
23 Ta-o tara ekkere binash oar ag forzonto tumrar Mabud Allae tarare bezuita oshantit falaia tumrar ato shofia binash ḳoraiba.
24 Tarar raza-bashsha oḳolre-o tumrar ato shofiba, tumra dunia taki itar nam miṭailibae, itare binash ḳorar ag forzonto ḳeu aia tumrar samne ubanir takkot oito nae.
25 “Tumra itar murti oḳolre agunit falaia zalailio. Tarar gotror shuna-rufar bae lalos ḳorio na, arnae fando foṛbae. Mono rakio, tumrar Mabud Allae itare ginnain.
26 Ginnar kunu zinish tumrar goro haraile tumra-o otar laḳan bonizibae. Borong tumra-o itare kub ginnaio ar tuchcho ḳorio, ita to lannoti.