5
Allar deoa ḳas dosh hukum
1 Musa nobie tamam Boni Israilre dola ḳoraila, tarare ḳoila, “O Boni Israil, ami oḳon zeta hukum-ahkam ar ain-ḳanun tumrare zanaimu, ita tumra kial ḳori hunio, hunia dilo gatia rakio ar amol ḳorio.
2 Amrar Mabud Allae Tur faṛo amrar loge eḳ oada-chukti boail ḳorsoin.
3 Ou chukti tain amrar moy-murobbir loge na ḳoria, amrar loge ḳorsoin, amra zoto zon ono zinda asi, amrar loge ḳorsoin.
4 Mabude ou faṛor ufre nuror agunir maz taki tumrar loge samna-samni batchit ḳorsoin.
5 Tumra agunir ḍore hou shomoy faṛor ufre uṭlae na, erlagi ami tumra ar Mabudor mazḳano ubaia, tan mukor buli tumrare hunaisi. Tain ḳoisla,
6 “Ami Alla-u tumrar Mabud. Mishor deshor gulami taki ami-u tumrare ḳalas ḳori anchi.
7 “Amar bodla tumra dusra kunu devta manio na.
8 “Puja ḳorar kiale tumra kunu murti banaio na, asman, zomin ba fanir tole zotota ase, ita kunutar surote murti banaio na.
9 Tumra itar puja ḳorio na, itar sheba-zoton ḳorio na. Mono rakio, ami Alla-u tumrar Mabud, kunu shorik shoijjo ḳori na. Amare zera mane na, ami tarar gunar shaza dei, tarar foyla siṛi taki sair siṛi aolad forzonto shaza dei.
10 Oile zera amar ashik bonia amar hukum-ahkam amol ḳore, ami tarar azar azar oarish forzonto amar obiram maya-mohobbot deḳaimu.
11 “Beḳama kunu ḳarone tumrar Mabud Allar nam muko loio na. Ḳeu zudi kamoḳa Mabudor nam loy, te kunumonte-u amar shaza taki rehai faito nae.
12 “Ar tumrar Mabud Allar hukum mafik, Zummabarre fobitro din manio.
13 Haftar soydin tumra ḳam-ḳaz ḳorio, tumrar dorḳari hoḳol ḳam shario.
14 Oile shat nombor din oilo Zummabar, tumrar Mabud Allar name ziraibar din. I din tumra, tumrar fua-fuṛin, gulam-bandin, goru-gadain, tumrar gaut ba ṭauno roura musafir ba bin-deshi, ḳeu kunuzator ḳam-ḳaz ḳorio na. Tumar gulam-bandie-o tumar laḳan ziraiba.
15 Mono rakio, Mishor desho taḳte tumra-o ola gulam aslae, ar tumrar Mabud Allae tan bolala-mozbut kudroti atdi tumrare azad ḳori anchoin. Erlagi tain hukum disoin, tumra Zummabarre fobitro din mantae.
16 “Tumrar Mabud Allar hukum mafik tumrar ma-bafre ijjot ḳorio. Teu tumrar Mabud Allae ze desh dira, hou desho tumrar hayati baṛibo ar tumrar balai oibo.
17 “Kun ḳorio na.
18 “Zina ḳorio na.
19 “Suri korio na.
20 “Ḳeuror birudde misa shakki dio na.
21 “Foror bour bae lalos ḳorio na. Foror gor-baṛi, zomi-mirash, gulam-bandi, goru-gada, ba kunu zinishor bae lalos ḳorio na.
22 “Mono rakio, shoyong Mabude tumrare Tur faṛor ufror hou nuror aguin taki, megor ḳalni ar goin andarir bitre taki, kub zure zure ou hukum disoin. Ḳali ou hukum-ahkam saṛa tumrare ar kunuta ḳoisoin na. Bade ou kalam oḳolre dui ṭukra fattoror ufre tan kudroti ate lekia amar ato disla.
23 Oile tan nuror tozollie zebla faṛ zoler, ermaze tumra nizor ḳane hunlae, hou andarir bitre taki Mabudor golar aoaz, hunia tumrar hoḳol ḳandanor amir oḳol, tumrar moy-murobbi oḳol amar gese uṭia aila,
24 aia ḳoila, amrar Mabud Allae didar dia tan zalal ar mohima amrare deḳaisoin, nuror aguin taki baroil tan golar aoaz amra hunchi. Ar oḳon amra buzlam, kunu adom zate Alla Pakor loge batchit ḳorar bade-o, i Adom basia roy.
25 Oile oḳon ḳene amra ino mortam? Kudroti i aguine to amrare zalailibo, amra zudi aro besh ḳori amrar Mabud Allar golar aoaz hunat roi, te to nirgat moron oibo.
26 Amrar laḳan ila ar kunu Adom zat asoin ni, zera nuror aguin taki zinda Alla Pakor golar aoaz hunar bade-o zita ase?
27 Te amrar Mabud Allae zotota bataisoin, tan ḳandat gia afne-u ota hunia aioukka. Tain afnar gese zeta zanaiba, afne aia ota amrare hunaiba. Teu amra ota amol ḳormu.
28 “Ar hou shomoy tumra zebla amar loge matirae, shoyong Mabude ita hunla, hunia amare ḳoila, ou manush oḳlor mat-ḳota to ami hunchi, tara tumare zeta ḳoisoin ita hoḳolta-u bala.
29 Hasau zudi tara amare ola ḍorain, hamesha amar hukum-ahkam mania solar kiali oin, te tara ar tarar aolad oḳlor siroḳalin balai oibo.
30 “Oḳon tumi lamat zao ar tarare ḳo, tarar tambut firia zaitagi.
31 Oile tumi ono amar ḳandat roio. Ami tumare amar hoḳol hukum-ahkam, ain-ḳanun ar shoriot bataimu, tumi gia tarare ota hikaibae. Teu ami tarare ze deshor doḳoldari diar, hou desho gia hari tara ota amol ḳorba.
32 “Erlagi-u tumrar Mabud Allae tumrare zeta hukum-ahkam disoin, ita zoton ḳoria adae ḳorio, itar til foriman her-fer ḳorio na.
33 Tain ze fote solar lagi hukum disoin, ṭik ou fote solio, teu tumra zane basbae, tumrar balai oibo, ar tumra ze deshor doḳoldari faibae, hou desho tumrar hayati bout lamba oibo.