32
Hozrot Musa (a:)or gaoa gozol
1 O asman, ḳan fatia huno ami zeta gai,
O zomin, tumi-o huno ami za batai.
2 Amar talim lamouk megor fuṭar laḳan,
kuar moton foṛouk amar mukor boyan.
Ḳesma gashor ufre fuṭa fuṭa meg oia foṛouk,
noya sera gasor ufre shantir meg oia lamouk.
3 Ami to elan ḳormu amar Mabudor nam,
tumra-o gaio Allar mohima gan.
4 Tain-u to asroy ṭilla, nikut tan ḳam,
hok-hasa tan fot shoṭik tamam.
Sol-soturi nai tan, hok-halal ase shorboda,
hok insaf forezgari ase shotota.
5 Ta-o tan ḳobis bondae ḳorse beimani,
dilor ḳarafie tara bonche ḳolonkini.
6 Haere ammok nadan, haere be-aḳol,
ouni tumra bodla dilae, Mabudor danor?
Taine-u tumrar foyda ḳorra Foroar digar ni?
Boail ḳorla tumrar Israil zati.
7 Iad ḳoro tumra hou agor amolor mat,
mono raḳo kita oisil furan zomanat.
Baf-dadare zikar ḳori itihash huno,
buṛa-buṛir muk taki hoḳolta zano.
8 Allatalae dila zebla zomin baṭia,
nanan zatire dila bag-baṭura ḳoria.
Boni Israilor foriman to zana asil tan,
erar ongsho algai toia baki korla dan.
9 Mabudor ḳas shompotti to tan nizor proza,
Iakub bongsho Israil zati afon samana.
10 Tarare tain tukai faila morubumir desho,
nirai-nirzon desh ar bag-shinghor gorzono.
Kudroti ḍaḳnadi guria zoton ḳorila,
sokur monir laḳan-u tarare basaila.
11 Sile zela nizor badar baichchare nasae,
aste aste uṛi uṛi ḍaḳnare laṛae,
ḍaḳna melia baichchainre ufre tule,
tulia hari uṛal dia loia loia gure,
12 Mabude eḳla oula ḳori tarare nila,
kunuzator deb-debi tan loge asil na.
13 Faṛe faṛe uṛai uṛai nila tarare,
faṛia deshor doḳol dila Boni Israilre.
Ḳetor bala foshol dila ḳaibar lagi,
faṛia saḳor mou ḳabaila faṭa-sifa taki.
Ḳabaila malike zoytunor tel,
luar laḳan shokto maṭit tel foli gelo.
14 Ḳabaila tarare tain gorur dudor doi,
sagol-meṛar dud-o ḳaila zanio nichchoy.
Muṭa-taza meṛar gust ḳaila moza ḳori,
Bashon deshor goru-ḳoshi kaila ruṭidi.
Taza-fusṭo gomor ruṭi anguror shorbot,
ḍemdi uṭa angur oilo Allar niamot.
15 Bade tara lat marila feṭla bonia,
Boni Israile lat marla tarar fao dia.
Ḳaia ḳaia feṭ fulaia marlo oḳon lat,
faurililo hou Allare zein dila bat.
Foyda ḳorra Allar log tara saṛi dilo,
asroy ṭilla Allare tara huru mono ḳorlo.
16 Deb-debir puja ḳoria zalailo aguin,
eḳ Alla saṛia tara bozilo hoguin.
Gusar aguin zalailo tan arshor maze,
murti puja gin ḳoroin mohan Alla Pake.
17 Butor name boli dilo tanre saṛia,
but to kunu Alla nae ta-o failo puja.
Noya noya devta zeta ḳoydin taki sine,
baf-dadar osin devta oḳon tara boze.
18 Zonom data bafor laḳan zein asroy ṭilla,
tanre tumra fauria hari korlae obohela.
19 Aolador ou halot dekia muk firailla Mabude,
rage-gusae aguin oila tarar-u bod amole.
20 Gusa ḳori Mabude ḳoila muk firailam ami,
tarar hesh dosha kita ami nichchit zani.
Deḳmu saia tarar hoḳol beimanir shaza,
be-foti beiman zate buzba nizor dosha.
21 Zeṭa Alla nai ila devtar puja ḳoria,
amar bitre dise tara gusa tulia.
Zeṭa zati nai ila zati dia ingsha ḳoraimu,
ammok zati dia tarar gusa tulaimu.
22 Amar gusar aguin oḳon dau dau ḳori zoler,
maṭir tolor fatalre-o zalaia sarḳar ḳorer.
Hara zogot ar foy-foshol zalai korbo sali,
faṛor tolat aguin zolbo, zolbo duil bali.
23 Laḳo laḳo bifod dimu hoḳoltar ufor,
amar tamam tir marmu feṭor buke ḳormu ḳator.
24 Ufashi nidane tara hukai hukai morba,
gozobi bemaror loge duk-toklif faiba.
Dat ala zongli foshu faṭaimu ami,
bishakto shob hafor fale diba ḳamṛani.
25 Bare gele morba tara toluaror tole,
goro roile morba hoḳol zanor ḍor-ḳofe.
Zuan fua zuan fuṛin dudor hurutta,
binashi gozobe morba daṛi sul faḳna.
26 Ḳoislam ami uṛai marmu Boni Israilre,
itar nam fusilaimu manshor mon tone.
27 Oile amar zana ase dushmonor bab-shab,
beṭagiri korba tara oibo tarar lab.
Na buzia ḳoibo tara zitse nizor bole,
Mabud ita kuntat nae zitsi kole-bole.
28 Bisar-bibek kuaia oḳon name Israil zati,
aḳol-buddi araia tara oise be-foti.
29 Aḳol taḳle buzto tarar nizor durdosha,
bibek kaṭai zan basaia roito hamesha.
30 Eḳ dushmone aia kila azar zon ḳedae,
dui sifaire dekia ḳene dosh azar douṛae.
Nizor asroy ṭilla zudi tarare na besita,
shoyong Mabude zudi saṛia na dita.
31 Dushmonor asroy ṭilla oto mozbut nae,
tara-u ikan shikar ḳori hoḳolre hunae.
Amrar asroy ṭilla to bout boṛo boloban,
tarar muke gaia ita zofe tan shunam.
32 Mabude bataira oḳon tarar ḳetor ḳota,
Sadum ṭaun taki aise itar anguror lota,
Amura shohor taki itae angur fol faise,
bish ar tittae i folor soṛi furafur oise.
33 Anguror shorbot zela nag-naginir bish,
alod hafor bish-o ola marattoḳ zinish.
34 Amar gese ita gozob tumrar lagi kaṛa,
amar banḍaro toa shob sil-sappoṛ mara.
35 Naformanir shaza deoa amar-u ḳam,
amol mafik bodla dimu tamam insan.
Shomoy oile fislizibo dushmonor fao,
mosibotor din tarar nozdik zanilao.
Ṭik kori toa ase tarar ḳamor bodla,
zoldi kori faiba nizor amol-nama zela.
36 Mabude deḳba zebla bol-shokti nai,
tan bondar bol-takkot gesegi fuṛai.
Gulam kiba azad bonda hoḳol-u mazur,
dekia tain fokko loiba afon gulamor.
Maya-doya ḳorba Allae tan gulamre,
mazur taki shobol ḳorba doya-rohome.
37 Ḳoiba tain hou shomoy kuai gela hita,
otodin bozisla tara zeta devta.
Bagia gelogi kuai tarar asroy fahaṛ,
tarar hoḳol deb-debi oshaṛor oshaṛ.
38 Ḳoi gela hou deb-debi zetae ḳaisla sorbi,
sorbi ala bolir gust ḳaisil besh ḳori.
Zeta devtain ḳaisil sodgar shorbot,
oḳon tara basauk aia tarar ummot.
Shaijjo ḳorouk na aia tumrar hou ṭakur,
asroy dey na ḳene naforman bodkur.
39 Sinta-babna ḳoria deḳo hou tain-u ami,
ami saṛa Mabud nai ikan zancho ni.
Ami-u marilai ami-u basai,
ami-u to zoḳom ḳori ami dei balai.
Ama taki basailito shaiddo ase ḳar,
hayat moutor malik ami Allahu Akbar.
40 Arshor bae at tulia ḳosom ḳaia ḳoi,
siroḳalin zinda ami zanio nichchoy.
41 Dar zebla dimu amar soḳsoḳa toluar,
ḳaim ḳorat lagmu zebla amar ray-bisar.
Hou shomoy shaza dimu amar hoḳol dushmonre,
amare ginnanir bodla dimu tarare.
42 Tir-donuke lou ḳaia ḳorbo matlami,
amar toluare-o to lou ḳaibo zani.
Murda ar bondi oḳlor lou he ḳaibo,
dushmonor gust ḳaia feṭ fulaibo.
Lamba-suli sifair ḳolla ḳaibore muke,
tarar ḳolla sibai kaibo amar donuke.
43 Mayar prozar loge oia asman kushi o,
behestor hoḳol firistae tane soizda deo.
Zogotor tamam zatie gao gunogan,
Allar hoḳol bondar loge lo tan moha nam.
Tan gulamor lour bodla oḳon loiba tain,
dushmonre shaza dia saf ḳorba zomiḳan.
Tan bondae Kenan desho failiba rehai,
gunar kofora dia diba tar bodlai.
44 Musa nobi ar tan ḳadim Nunor fua Iusa gia hoḳol manshor gese ou gozolor shob ḳota zanaila.
45 Musae hoḳol Boni Israilor gese gia ita hoḳolta ḳoia hari,
46 ḳoila, “Ami ou zoto hushiarir ḳota tumrare zanaisi, ita tumrar dilo gatia rakio, ita to tumrar birudde shakki bonia roibo. Ar tumrar aolad oḳolre hukum dio, ou shoriotor hoḳol hukum-ahkam kiali oia amol ḳorta.
47 Ita to aze-baze kunu mat-ḳota nae, ita oilo tumrar zindegi! Zordan gang faroia hari tumra ze deshor doḳoldari fairae, ota amol ḳorle hono tumra lamba hayati faibae.”
Hozrot Musa (a:)or aḳeri halot
48 Hou din-u Mabude Musa nobire ḳoila,
49 “Tumi gia ou Abarim faṛo uṭo, iṭa to Muab deshor Ziriho ṭaunor samne ase. Hono uṭia Nobo namor hou usa ṭillar ufre zao, ar Boni Israilre ami ze deshor malikana diram, ou Kenan desh eḳbar dekilao.
50 Tumar bai Harun zela Hur faṛor ufre uṭia harle ufat oisil, bade tar baf-dadar ḳataro gia azisil, ou Nobo faṛo uṭar bade oula tumar-o ufat oibo, ar tumar baf-dadar gese gia oulaḳan tumi-o azibae.
51 Mono ase ni, hoḳol Boni Israilor samne tumra duio baie amare fak-fobitro ḳoia mainno ḳorso na, hou Zin morubumir Kadesh elaḳar Meriba namor zagat fanir gese tumra amar name zaliati korslae.
52 Hono uṭia harle tumar sokur samne hou desh deḳbae, ze deshḳan ami Boni Israilre dan ḳorram, tumi kali soukdi deḳbae, oile hi desho hamaibar shuzug tumar oito nae.”