30
Alla Mabudor gese firia aoar fol
1 Hozrot Musae ḳoira, “O Boni Israil huno, ami tumrar samne ze rohomot ar lannotor fot deḳaisi, ita hoḳolta tumrar ufre folibo. Folia harle tumrar Mabud Allae tumrare zeta zati oḳlor maze sitrai diba, tarar loge boshot ḳorar bala tumra ita kial ḳorio.
2 Hou shomoy tumra ar tumrar aolad oḳol zudi tumrar Mabud Allar gese firia ao, ar aiz ami tumrare zeta hukum-ahkam zanairam, ita dile-zane amol ḳoro,
3 te hou shomoy Mabude tumrare bondi halot taki azad ḳorba. Tain tumrare maya-momota ḳorba, ar tain zeta zatir maze tumrare sitraia disla, ota taki hirbar tumrare tukaia anba.
4 Duniar aḳeri kinarat-o zudi tumrare falail oy, te hono taki tumrar Mabud Allae tumrare tukaia anba.
5 Tumrar moy-murobbir desho tumrare firaia anba, ita hirbar tumra doḳol ḳorbae. Tain tumrare bout baṛai diba, ar tumrar moy-murobbir saite-o tumrar aolador foriman aro baṛaiba.
6 Tumra zate furafur dile-zane Allar mohobbotor ashik bonia basia ro, ou niote tumra ar tumrar aolad oḳlor dilor mosolmani tain nize diba.
7 Ar ou lannot oḳol tumrar Mabud Allae tumrar hou dushmonor ufre falaiba, zetae tumrare ingsha ar zulum ḳoroin.
8 Hou shomoy tumra hirbar tumrar Mabudor hukum mafik zindegi kaṭaibae, tan batail zeta hukum-ahkam aiz ami tumrare zanairam, ota hoḳolta amol ḳorbae.
9 “Hou shomoy tumrar Mabud Allae hoḳol nomunae tumrare ay-unnoti diba, tain tumrar ḳam-ḳazo borkot diba, tumrar aolador foriman baṛaiba, tumrar goru-sagolor baichchain ar zominor foshol baṛai diba. Tumrar moy-murobbir ufre tain zela kushi asla, tumrar ufre-o ola kushi oia tumrare hoḳol nomunae baṛaiba.
10 Ḳali tumra nizor Mabud Allar kushi mafik solia, ou Tourat Kitabo leḳa tan hoḳol hukum-ahkam ar niom-ḳanun manle, asta dile-zane tan bae firle, tain ou rohom-borkot diba.
Zindegir fot ar moutor fot
11 “O Boni Israil huno, aiz ami tumrare zeta hukum diram, ita mania sola tumrar lagi beshi koshṭor kunu ḳam nae, ita tumrar lagalor bare-o nae.
12 Ita to behesto tulia toa kunu siz nae zen tumra ḳoitae, behesto taki kegie lamai ania ita amrare hunaito, ar amra amol ḳortam?
13 Ita doriar hofaror kunu siz-o nae zen tumra ḳoitae, doria faroia ḳegie gia ita ania amrare hunaito, ar amra amol ḳortam?
14 Borong Mabudor kalam to tumrar loge-u ase, tumrar mukor maze ar dilor bitre ita ase, zate ita amol ḳoro.
15 “Huno, aiz ami tumrar samne zeta tulia dorsi, ita oilo zindegi ar balai, ba mout ar duḳ-mosibot.
16 Aiz ami tumrare ou hukum diram, tumra nizor Mabud Allare mohobbot ḳorio, tan morzi zugaia solio, tan deoa shoriot, hoḳol niom-ḳanun, hukum-ahkam hor-hamesha manio. Teu tumra zane basbae, forimane baṛbae, ar ze deshḳan tumra doḳol ḳorat zairae, hou desho tumrar Mabud Allae tumrare rohom-borkot diba.
17 “Oile tumrar mon zudi Alla Mabudor bae taki firizae, tan hukum na mania tumra zudi kunu deb-debir pujat lagia otare fornam ḳoro,
18 te aiz ami tumrare zanai diram, tumra nischit binash oizibae. Zordan gangor hofaro ze desh tumra doḳol ḳorat zairae, hino tumra beshi din bastae nae.
19 “Ou asman-zominre tumrar birudde shakki rakia ḳoiar, aiz ami tumrar samne zindegi ar mout, rohomot ar lannotre tulia dorsi. Erlagi O baiain, tumra zindegire fosond ḳorilao, teu tumra ar tumrar aolad oḳlor zan basibo.
20 Tumra nizor Mabud Allare mohobbot ḳorio, tan hukum-ahkam manio, tan ashik bonia tanre ainja ḳori doria rakio, otar maze-u tumrar zindegi. Tain ze deshor doḳoldari dibar lagi tumrar moy-murobbi Ibrahim, Isʼhak, ar Iakubor loge ḳosom ḳaia oada disoin, hou desho ota hukum-ahkam manar maze-u tumrar zindegi.”