24
Bia-shadir befare
Hozrot Musae aro ḳoira, “Biar bade zudi kunu zamaie tar bour maze kut fae, faia tair ufre naraz oy, ar talaḳ nama lekia tair ato dia bidae ḳori dey. Ar ou boue gia zudi dusra zamair gese bia boy, bade hou dusra zamaie-o taire nafosond ḳoria zudi ola talaḳ dilae, ba hou zamai morizae, te tair hou foyla zamaie taire ar bia ḳorto farto nae, tai to en lagi nafak oigese. Ilaḳan bia-shadire Mabude gin ḳoroin. Tumrar Mabud Allae tumrare ze deshor malikana dira, tumra ila guna ḳoria i deshre nafak banaio na.
“Noya bia ḳora kunu beṭare zuddot faṭaio na, zur-zobordosti koria tare kunu ḳamor bar dio na. He fura eḳ bosor ḳam-ḳaz na ḳoria, tar bour loge kushi-bashi korar shuzug dio.
Shomazo solar hukum-ahkam
“Aolati malor bondok hishabe tumra ḳeuror gail-sia, ba ḳali sia bondok rakio na. Ila ḳorle tar zan basanir ḳani-kurakir fot bond oizibo.
“Kunu manshe zudi Boni Israilor aroḳ baire suri koria nia gulam banailae, ba dusra zagat besia hari dora ḳae, te tare zane marbae. Ou nomunae tumrar shomaz taki ila naformanire fusia falaibae.
“Ḳeuror gotro fosa-kusṭo bemar deḳa dile, Lebi kandanor imam oḳlor foramish mafik solio. Ami tarare zeta hukum disi, tumra kub kiali oia ita manio. Mishor desh taki bar oia aibar foto, tumrar Mabud Allae amar boin Moriomor ze dosha goṭaisla, ita tumra mono rakio.
10 “Tumar ari-forire kunta aolat dile, tar ges taki kunu mal bondok nibar niote, tumi tar goro hamaio na. 11 Tumi goror bare ubaio, ar zare aolat diso, he tar gor taki bondoki mal ania tumare dibo. 12 Aolat neora zon gorib-duki oile, tar deoa bondoki keta-ḳomli nia tumi rait gumaio na. 13 Hainja bala tumi tar mal firai dio, ota uṛia he rait gumaia tumare dua dibo. Teu tumar balai oibo, ar bondoki samana firot deoa to, tumrar Mabud Allar nozoro nekir ḳam.
14 “Tumrar Boni Israil shomazor kunu bai* ba tumrar desho roura bin zatir kunu manshor gese faona taḳle, ar he gorib-duki, ruzi kamla zon oile, tar ufre zulum ḳorio na. 15 Shuruz ḍubar age tumra tar faona mozuri dilaio, he to gorib manush, ou mozuri dia-u tar zindegi sole. Arnae mozurir lagi he Mabudor dorbaro foriad ḳorle, tumra gunar bagi oibae.
16 “Fua-fuṛir oforador lagi tarar ma-bafre, ba ma-bafor oforade fua-fuṛire zane mara zaito nae. Forteḳ zone nizor oforador shaza nize faibo.
17 “Kunu bideshi musafir ba etimor ufre na-hok bisar oite dio na. Kunu ṛaṛi beṭir findibar ḳafoṛ bondok rakio na. 18 Mono rakio, Mishor desho tumra gulam aslae, tumrar Mabud Allae tumrare hon taki azad ḳori anchoin. Erlagi ami tumrare ita ḳam ḳorar hukum diram.
19 “Tumrar zominor dan ḳaṭar bade, danor kunu muiṭ fauria gelegi, iṭa anar lagi ar firot zaio na. Bideshi musafir, etim ar ṛaṛi beṭintor lagi iṭa dilaio, teu tumrar Mabud Allae tumrar hoḳol ḳam-ḳazo rohom-borkot diba. 20 Zoytun gasor fol faṛibar ḳalo eḳoi ḍalor fol duibar faṛio na. Eḳbar faṛar bade zeta roy, ita bideshi musafir, etim ar ṛaṛi beṭintor lagi toio. 21 Tumrar angur baganor eḳ lot taki dui bar angur faṛio na, eḳbar faṛar bade zeta roy, ita bideshi musafir, etim ar ṛaṛi beṭintor lagi toi dio. 22 Faurio na, tumra to age Mishor desho gulam aslae. Erlagi ami tumrare ita ḳorar hukum diram.”
* 24:14 “Boni Israil shomazor kunu bai.” Ibrani bashae, tumrar baiaintor maze ḳeu.