10
Allai chukti namar fattor hirbar dila
1 Hozrot Musae tarare ḳoira, “Hou shomoy Mabude ḳoila, tumi fattor ḳaṭia agor laḳan dukan ṭukra banao, ar oḳnain loia faṛor ufre uṭia amar daro ao. Erloge laḳṛidi eḳṭa shonduk-o banaio.
2 Tumi age ze dui ṭukra fattor bangiliso, hou fattoror ufre zeta leḳa asil, ota ami ou duio fattor ṭukrar ufre hirbar lekia dimu, bade tumi oḳnain nia hou shondukor bitre toibae.
3 “Hukum faia ami babla laḳṛidi eḳ shonduk banailam, ar dugu fattor ḳaṭia agor laḳan dui ṭukra ḳorlam, bade ou duio ṭukra ato loia ami faṛor ufre uṭlam.
4 Uṭia harle Mabude hou foyla duio fattor ṭukrar ufre zeta lekisla, ota hirbar ou duio ṭukrar ufre lekia amare dila, ou leḳa ayat oilo, shoriotor ḳas dosh hukum. Age zedin tumra hoḳol Tur faṛo aislae, hou din Mabude zalail agunir maz taki tumrare ou hukum-ahkam bataisla.
5 Bade ami faṛ taki lamat lamia aia amar banail hou shondukor bitre duio ḳan fattor toilam, zela Mabude hukum disla. Ita oḳono hono ase.”
6 Boni Israile Birut-Boni-Iyakan taki roana oia Muserat gelagi. Ou zagat Harun nobir ufat oae, tanre ono dafon ḳora oilo. Bade tan bodla tan fua Ali-Azor fordan imam oila.
7 Bade Boni Israilor ḳafela Gudgudat gelagi, hon taki Zotbatat gela, i zagat fanir fut ala bout ḳal-nala asil.
8 Ou shomoy taki Mabude Lebi kandanre fosond ḳorla shahadot shonduk boia nibar lagi, Mabudor ebadot-bondegi korar niote tan samne azira dibar lagi, ar tan name manshore dua dibar lagi. Ou imamoti kam tara oḳono ḳorra.
9 Otar lagi Lebi kandanor manshe Boni Israilor dusra ḳandan oḳlor laḳan zomi-zomar kunu baṭ ba kunu mirashdari faila na. Tumrar Mabud Allar zoban mafik shoyong Mabud-u oila tarar mirash.
10 Hozrot Musae tarare ḳoila, “Agor baror laḳan ibar-o ami sallish din sallish rait Tur faṛor ufre aslam, ibar-o Mabude amar foriad kobul ḳorla, tain tumrare binash ḳora bad dilaila.
11 Bade Mabude amare ḳoila, ‘Tumi uṭo, uṭia agedi aguanir lagi ota manshore zuit ḳoria tarar ag oia roana deo, ami tarar moy-murobbi oḳlor gese ze desh dibar lagi kosom ḳaia oada ḳorsi, tara hou desho gia ita doḳol ḳorouk.’
Allar ashik oia tan hukum-ahkam mano
12 “O Boni Israil, huno, tumrar Mabud Allae tumrar gese kita sain. Tain saira, tumra ḳali tan ḍor-ḳof bitre raḳo, tan fote solo, tanre mohobbot ḳoro, tumrar asta dil-mon dia tan ebadot-bondegi koro.
13 Ar tumrar balair lagi aiz ami tumrare Mabudor deoa ze hukum-ahkam ar shoriot zanairam, ita furafur amol ḳoro.
14 “Zano to, asman ar asmani hokkolta, zomin ar zominor tamam samana to tumrar Mabud Allar.
15 Ta-o tumrar moy-murobbir bae tan ṭan taḳae, tain erare mohobbot ḳorta. Tarar bade tarar aolad oḳolre mani, oḳonkur zomanar duniar hoḳol zatir maz taki kali tumrare fosond ḳorsoin.
16 Erlagi tumrar zarzir dilor mosolmani korao, gaṛteṛa naforman bonia roio na.
17 Mono rakio, tumrar Mabud Alla to hoḳol deb-debir ufre, munib oḳlor munib, tain-u mohan, boloban ar ḍor-ḳof foyda ḳorra Alla. Tain kunu fokkofati koroin na, gush ḳain na.
18 Etim oḳol ar ṛaṛi beṭintor bae hok insaf ḳoroin, ar tumrar loge boshot ḳorra bin-deshi oḳolre ḳaoa-findar hoḳolta dia tan mohobbotor forman deḳain.
19 Age to Mishor desho tumra-o ola bin-deshi aslae, erlagi bin-deshi manshore tumra maya-mohobbot ḳorio.
20 Tumra nizor Mabud Allare ḍoraia solio, tan ebadot-bondegi korio, tan ashik bonia roio, ar ḳali tan name ḳosom ḳaio.
21 Tain-u tumrar tarifor kuṭi, tain-u tumrar Alla. Tumra nizor souke zoto asanoḳ taijjubi ar bezuita kudroti kam deḳso, ita hokkolta to tumrar lagi tain-u ḳorsoin.
22 Tumrar zeta moy-murobbi Mishor desho gesla, era asla muṭ shottoir zon, ar oḳon tumrar Mabud Allae tumrare asmanor terar laḳan ḳorsoin, zeta gonia fuṛail zae na.