2
1 Erlagi mone mone ṭik korlam, tumrar mono duk deoar lagi ami ar tumrar gese zaitam nae.
2 Ḳaron ami tumrare duk dile amare kushi ḳorbo ḳe? Ar ami zarare duk dimu, ou tumra saṛa amare kushi ḳorar ar to ḳeu nai.
3 Amar ila leḳar ḳaron oilo, ami zebla zaimu, ou shomoe zera amare kushi ḳorar ḳota, tarar ges taki zanu kunu duk na fai. Tumrar ufre amar i bishash ase, ami zetat kushi oimu, tumrao itat kushi oibae.
4 Amar mono boṛo duk loia, sokur fani falaia age tumrar gese leḳslam. Ashole ami tumrare duk deoar lagi leḳsi na, borong tumrar lagi amar ze ḳoto mohobbot, oḳan zananir lagiu leḳsi.
Oforadire maf ḳora
5 Amare zudi ḳeu duk dia taḳe, te he ḳali amare nae, tuṛa oileo tumra hoḳolreu duk dise.
6 Tumra beshir bag zone milia tare ze shaza diso, otau tar lagi zotesṭo.
7 Oḳon tumra tare maf ḳori dilao, tare buz deo, zate beshi duke he ḳator na oe.
8 Erlagi ḳas ḳori tumrare ḳoiram, tumra zen tare maea ḳoro, ita forman ḳori deḳao.
9 Ami forikka ḳori deḳtam saislam, tumra hoḳol befare baiddo aso ki na, erlagiu ami tumrar gese leḳsi.
10 Tumra zudi kunu befare ḳeurore maf ḳori dilao, te amio tare maf ḳori dei. Ar hasau zudi ami kunta maf ḳoria taki, te al-Mosir samne tumrar lagiu ḳoriar,
11 zate shoetane amrare duka dito na fare. Tar ku-motlobor ḳota to amrar ozana nae.
al-Mosire sinau to geranor laḳan
12 Ami Toruas ṭauno al-Mosir befare kush-ḳobri toblig korat gia deḳlam, hono ḳam ḳorar lagi malike amare eḳṭa shuzug kori disoin.
13 Oile amar imandar bai Titasre hono na faoae amar mono kub oshanti asil. Erlagi Toruas ṭaunor manshor ges taki bidae loia Makidoniat gelamgi.
14 Oile amra Allar shukria zanai, tain amrare hamesha al-Mosir bizoeor moha furtir misilor loge salaira. Al-Mosire sina to eḳ geranor laḳan. Allae tan zoe-zatrae ou geran amrar mazdi hoḳol zagat sitrai dein.
15 Zera nazat hasil ḳorra ar zera binash oira, ou duio dolor lagi amra oilam al-Mosir eḳ geran, ou geranre al-Mosie Allar dorbaro kurbanir laḳan shofia dira.
16 Zera binash oizar, tarar gese amrar geran oilo morar gondo, zar fol oilo nichchit moron. Ar zera nazat hasil ḳorra, tarar gese amra oilam zindegir geran, er fol oilo aḳerator zindegi. I oto boṛo nek kam ḳorar lak kun zon?
17 Nizor labor lagi zela bout zone Allar kalam loia bebsha ḳore, amra to itar laḳan nae. Amra borong Allar faṭail zon hishabe shorol mone al-Mosir name Allare azir-nazir rakia toblig koriar.