8
Buka aba‐guduna hehaligigi‐labuina se soe.
1 Buka aba‐guduna hehaligigi‐labuina wa ie soe, abo se monou, galewa eai nige dagugu esau, mahana tupona sorasorana eai.
2 Abo aneru haligigi‐labui Eaubada matana eai se totoro wa, ea itadi, eo bogigi haligigi‐labui se mosedi.
3 Abo aneru esau i loama abaaitalasam paana eai i toro, nimana eai wa muramura panepane aba‐gabuna gold, bena i helelelaei aba‐aitalasam gold wa arinai, terona matana eai wa, hetabu tataodi gamagamagari edi uura ede;
4 muramura panepane se gabu wa, asuna aneru nimana eai wa i saesae Eaubada arinai, maena hetabu tataodi edi uura.
5 Abo aneru ta aba‐gabuna ie abi, oeagi alaalasi aba‐aitalasam eai ie abi, i hemonau, abo i gabadobei tanoubu potana eai; abotai palepalele, dagugu lailaidi, namanamari eo moniinii se tubu.
6 Abo aneru haligigi‐labui wa, nimadi eai bogigi haligigi‐labui, se henonohauioidi bena edi bogigi se iuhidi.
7 Aneru bagubagunana enana ie iuhi, abotai ice ie taru dobi, eo oeagi alaalasi maena osina se hebori, tanoubu potana eai se hegoi‐auridi; tanoubu se soi hehaiona lausoisoi esega se gabu heohi, oeagi iniinidi hinage lausoisoi hehaionana, eo lagau iniinidi maudoina.
8 Aneru helabuina ena bogigi ie iuhi, abo ginauri esau doha oea tupina lailaina alaalasina, se gabadobei gabogabo eai;
9 gabogabo taba se soi hehaiona doha lausoisoina esega i hemala osina, ginauri maumauridi gamagaridi gabogabo eai, lausoisoi hehaionana se mate, waga gamagaridi hinage lausoisoi hehaionana se putuhai.
10 Abo aneru hehaionana ena bogigi ie iuhi, abo ipora lailai didigana galewa eai i beudobima, i alaala doha lamepa, ie taru saga eo goila ipudi potadi eai.
11 Ipora wa esana Kalakalapi, eo goila gamagari taba se soi hehaiona, lausoisoi esegana i hemala kalapi, goila wa se hekalapidi debana eai tatao se gamagari ariri, se mate.
12 Aneru hehasina ena bogigi abo ie iuhi, abotai mahana taba se soi hehaiona, lausoisoina esega se talai, eo nawalai hinage lausoisoina esega doha, eo ipora lausoisoidi esega doha, arinai edi mara tupona hehaionana i masigiri; asubena tupona hehaionana hinage nige i mara, maiona eai tupona hehaionana hinage doha.
13 Abo ea italau, na aneru esau doha magesubu eada boeana eai i loiloi, arinana lailaina ea ataiei arinai ie eoga i ene, “I baaea, i baaea, i baaea, tanoubu taumia abo i laubaaeaidi, ahani aneru headi wa edi bogigi sora se iuhidi!”