5
Mamoe Tauitawataina saesaena ena laolaoma debana eai, eda aiheaheari dobilana ta nanabuei.
1 Babadayao boeamiu eai, enadi ea riba‐hasahasa, eau hinage helemiu bada esau, Keriso ena amamna eau tauitaitaina esau, ena namanamari maraitom‐asubena abo se hemasaraha, eau hinage abo tauhearona esau.
2 Eaubada ena mamoe eawoina boeamiu eai wa, omi au suidi, au woeaidi, nige paana se duduimiu na paana aue eari, nige moni biibiina debana eai na paana nuamiu se soasoari,
3 porohe ta se tore nimamiu eai nige bena au tanuagaei, doha omi guiau, na doha omi mamoe eawoina edi tautau mo, iilamiu abo se lauwatai.
4 Huia ne Mamoe Tauitawataina saesaena i laoma, omi emi korona namanamarina abo au abi, taba nige i tauyamui.
5 Hinage doha omi heamiu ma‐hewahewarimiu, emi babadayao edi riba arinai bena au eari. Gamagarimiu hinage au haiawaabiuioimiu, esau, esau, nuatudobidobiuio au abi au lui, paana “Eaubada taunuasaesae i taugudui, ena ainauia ede i mosei tau‐nuatudobidobiuio arinai.” (Prov. 3.34.)
6 Au nuatu‐hedobidobiuioimiu, Eaubada nimana gigigiborina ubuna eai, ia ena huia eai abo i abi’sinimiu.
7 Emi nuamodemode maudoina au gabalaei ia potana eai, paana ia tau‐bobodiemiu.
8 Au mia‐komakomani, au matasoasoari. Ami waiunu diabolo ie sae ie dobi doha liona, ie so’a, i aiailoea, bena eai abo i toai i ai.
9 Ia au taugudui, sunumamiu eai au torotahitahi, au nuatuiyao emi tataoyao tanoubu tupo headi eai emi amamna wa isi hinage se hearoyao.
10 Ainauia gamagamagari Eaubadana, ena namanamari i lau e nige nosina, arinai wa i eogaida, Keriso Iesu debana eai, sora begana amamna au hearo abotai ia iabom i hetorouioimiu, i hetorotahitahimiu, i headidirimiu.
11 Ia arinai namanamarina, awa‐tanuagana, ta mosei i lau e nige nosina. Amen.
12-13 Silevano, eda tau nuana i tore‐esegai, ia nimana eai ea uuri ta, uriuri kuukuuna mo arinai ea lauhasahasaemiu, eo teina ea hemasaraha‐auri: hede Eaubada ena ainauia mamohoina ina, arinai omi au totoro. Ia Babulonia eai ie mia wa, abi‐hilei sinena, doha omi, ena lautoi i hetamariyawa ina; eo natugu Mareko hinage.
14 Gadosisi alagoina arinai esau esau au aiaitoiuioimiu.
Omi gamagarimiu Keriso boeana eai taulaulau, loni enamiu.