12
Tauataiena ena dobila eai, eda tautau ede Keriso.
1 Ta ita, tauitana gamagamagari se totoro‐hetahetaiirida, doha eada lailai aririna, besi porohe gamagamagari ta tore hesuaradi, eo baaea i healabesibesi‐aririeda wa, na ma‐taubigada ta aitautau hailako eai ta, dobilana ede se tore matada eai,
2 ta itaitalau Iesu arinai, eda sunuma tauhetubuna eo tauheohina, ia kode wa matana eai se tore debana eai satauro i hearo, i lau e ana siga, taumaeamaeana nige i nuatui, arinai ede ia se hebawa Eaubada ena terona nimatutuna eai.
3 Ia hage au nuatui, ia wa tatao baaea edi hewaiunu i hearo‐aririei, bena omi tabu au tausiololo, eo nuamiu se beruberu.
4 Omi sora nige huia esau baaea au taugudui, au ialai, i lau e osinamiu se boriri.
5 Eo ribana au nuahuiei wa, arinai i ribalaowa doha omi nanatunayao mamohoi — i ene,
“Natugu e, Guiau ena heduhedudurai tabu u nuatuhegagiri
eo tabu nuam i beruberu ena i ribasuuim.
6 Paana Guiau eai i gadosisiei, ia abo i hedudurai ede, eo natuna esa, esa, i abi, pidipidiri abo i hearo.” (Prov. 3.11-12.)
7 Hedudurai ta abo i heatamiu. Hede Eaubada i abimiu doha omi ia nanatunayao; paana aitea merumeru tamana taba nige i hedudurai?
8 Ena omi nige se heduduraimiu, doha gamagarida tupona ta hearoyao, abo omi kamkamkeda, omi nige tau nanatunayao mamohoi.
9 Ita tamadayao tanoubu eai se heduduraida, hinage ta heasisiedi. Earuada Tamadi ia hinage abo nige ta awaabiei eo ta mauri?
10 Isi wa mamohoi asubena hisahisawaidi eai se heduduraida, isibom edi nuatu eai, na ia wa ita eda lolo debana eai mo, bena ia hetabuena eai ita tupona ta abi.
11 Hemaisa wa, eda huia hearona eai ta ene i amamna mo, nige kodena; ia mo murina eai loni uauana abo se masaraha tauhearona wa nuadi eai, iaede laulau‐dudurai.
12 Arinai nimam se abaabasi gaibu ta, bena u lau’sinidi, eo turim beruberudi u hetamomosidi,
13 eda dududuraidi aem enadi u sepa‐nonohaidi, arinai tau beruberuna taba nige u oihesuara, na abo u headidiri mo.
14 Em abi tatao gamagaridi aridi eai, loni hesabana u laulau, eo nuam heaana, ena nige’e taba nige tau esa Eaubada i ita.
15 Au itakomakomanimiu ata tau esau Eaubada ena ainauia eai i abihekuu; ata lamna kalakalapina esau i ini‐saema, i hemodemiu, headi boeamiu eai abo i hebiidi hinage.
16 Ata boeamiu eai tau‐laulaubii esau, e tau Eaubada nige i heasisiei doha Isoa, ia lauriga esega debana eai ena ealahou‐ainauiana i unegabaei.
17 Au nuatui huiana murina eai abotai abo i henua ariri bena ainauiana wa i hearo, i eoo adidiri ma‐matasuluna, ia mo se tauotaotaei, nige ena huia se moseuio bena i nuabui.
18 Omi nige au laoma oea‐tupina eai ta, oeana taba se abilau, alalasina, eada dubadubana i poiitawai, eo asuasu dubadubana, eo mana, eo wowori,
19 eo bogigi daguguna, eo ariarina lailaina, arina tauataiena wa se aiboda asa bena tabu riba esau se ribaei aridi eai.
20 Paana ribana i porohe ariri, nige gonoadi. “Ena suisui esau i utusae mo, besi, abo se lau‐we’ui.” (Ex. 19.12-13.)
21 Ana ao hinage i nuamatamatausi ariri, arinai wa Mose i ene, “Ea tabutabubu ea matausi ariariri.” (Deu. 9.19.)
22 Na omi ede aue laoma Siona oea‐tupina eai, Eaubada maumaurina ena eanua saesaena eai, Ierusalema galewa eai wa, eo aneru moutuadi taba nige ta hasiridi edi heoiesega saesaena eai,
23 eo taubaguna edi oigogo lailaina eai, isi esadi wa galewa eai se uridio, eo Eaubada arinai, tatao gamagari tauheduduraidi, eo aue laoma taulaulau‐dudurai earuadi se helolo‐dumadumadio aridi eai,
24 eo Iesu arinai, ribahesunuma harihariuana wa tau hepaisoaina, eo osinana wa se lausibusibuei, ainauiana ede i lolo ariri, Abela osinana nige doha.
25 Au komani, ia tauribalaowa wa tabu au tauotaotaei. Paana ena isi wa nige edi aba‐dago huia ne ia tanoubu eai ta ena ribahesanapu se otaotaei, ita haedi abo ta dago ena ia wa galewa eai i ribahesanapueda, ta otaotaei?
26 Nei huiana ne ia arinana tanoubu i oihetabubu; huia ta i ribahesunumaeda, i ene, “Sora huia esau, nige tanoubu mo na galewa hinage, abo ea hetabutabubudi.” (Hag. 2.6.)
27 Riba ta, “Sora huia esau,” aniona ede ginauri se heoiluiluidi, abo se torehesuaradi, doha ginauri nima eai se ginauri, na saha lauitana eai taba nige i moimoiu, abo i miahai ede.
28 Arinai eda lautoi ina, basileia ta abi wa, taba nige se hemoimoiu, eo ainauiana nuada eai ta laoma ta tabaohu, Eaubada ta aihelahui ma‐heasisida eo mamatausida;
29 paana eda Eaubada ia doha oeagi alaalasina i aiaigabu.