35
Eaubada Beteli eai Iakobo i Ribahelolo
1 Abotai Eaubada i ribalau Iakobo arinai i ene, “U torohai u sae Beteli, abo nei eai u mia, abo Eaubada ena aitalasam hatahatana u ginauri, Eaubada ia wa i taumasaraha arim eai huiana eai wa em tau Isoa u dagogabaei.”
2 Abotai Iakobo, ena numa taumiaidi eo isi gamagaridi maenayao se mia esega, i ribalau aridi eai i ene, “Oitau gamagaridi boeamiu eai se ota au torehesuaradi, eo au heaauioimiu, eo ami lulu aadi au luidi,
3 abo hage ta torohai ta sae Beteli eai, abo nei eai Eaubada ena aitalasam hatahatana ea ginauri, ia, huiana wa ea nuadubu ariri egu uura i ataiei, eo hinage egu abalau gamagaridi aridi eai ia maegu.”
4 Arinai isi gamagaridi edi oitau udoi udoi, eo omo’omodi beadi eai se toredi, se toredi Iakobo nimana eai, abo Iakobo i wuidi oeagi lailaina esau paana eai, Sekema gegesina eai.
5 Arinai edi lauwasi se lauei se lau, abo Eaubada matausina i tarudobi eanua se hetaiiri wa potadi eai, arinai Iakobo nanatunayao nige se henaudi.
6 Abo Iakobo ie lage Lusa eai, ia ede Beteli, Kanana tanona eai wa ia eo ana bodao gamagaridi maenayao.
7 Abo nei eai aitalasam hatahatana i hetoro, abo eanua esana ie tore El‐beteli, paana nei eai Eaubada i taumasaraha arinai huiana wa ena tau i dagogabaei.
8 Na Debora, Rebeka tauabihelaina, ie mate, to se tore Beteli eai, oeagi lailai paana eai. Abo oea wa esana se tore Alona‐bakuta.
9 Hinage Eaubada i taumasarahauio Iakobo arinai, huiana wa Padana‐arama i laugabaei abo nei eai i ribahelolo.
10 Eaubada i heriba i ene, “Esam Iakobo. Esam me Iakobo i otawa, na esam abo Isaraela.” Arinai esana i atai Isaraela.
11 Abo Eaubada i ribalau arinai i ene, “Eau Eaubada Gigibori‐aririna. Am isimurita abo se gamagari ariri. Basileia eo hinage basileia gamagaridi oa arim eai abo se laoma, eo oa tumam eai abo wasawasa se labasidi.
12 Oea wa ea moseyao Aberahama eo Isaako aridi eai abo hinage oa enam, eo am isimurita hinage enadi.”
13 Abo Eaubada edi aba‐ribariba wa i torohaigabaei.
14 Arinai Iakobo du lailaina i hetoro edi aba‐ribariba oeana eai wa, ie ede we’u duna. Abo aitalasam nom‐nomna i hegoilaei potana eai, eo eausi hinage i hegoi.
15 Eo Iakobo Eaubada maena edi aba‐ribariba dimona wa esana ie tore Beteli.
Rahela ena Mate
16 Beteli se torohaigabaei nige baeaona abo se lage Eparata eai, na Rahela dagelana i amamna ariri to ana paisoa i pilipili ariri.
17 Na paisoa pilipilina boeana eai, sine esau, ia tau abihelabalabana, i ribalau arinai i ene, “Tabu u matausi, ina natum tau abo hinage u labasi.”
18 Na earuana bena i torohai, paana abo i odalele, kaimou esana ie tore Benoni, na tamana esana ie tore Beniamina.
19 Rahela i lautom to Eparata dobilana gegesina eai se tore, iaede Betelehema.
20 Abo Iakobo du i hetoro bousana eai, Rahela ena bousa duna nei eai ie ota i laoma e ina asubena ta.
21 Eo Isaraela i lauwasi ie lau, abo ena numa‐lulu i hetoro Edara numa lailaina wa dagelana eai.
Iakobo Nanatunayao Tatao
22 Abo Isaraela nei tupo eai ne ie mia, na huia esau Reubena i laoma Bilaha arinai, tamana monena esau wa, maena se enobili, abo Isaraela wasana i ataiei.
Iakobo nanatunayao tatao saudoudoi‐labui.
23 Lea nanatunayao tatao ede ina: Reubena, (Iakobo ena ealahou tau) Simiona, Levi, Iuda, Isakara, eo Sebulona.
24 Rahela nanatunayao tatao: Iosepa eo Beniamina.
25 Bilaha, Rahela ena heaheari sinena, nanatunayao tatao: Dani, Napatali.
26 Eo Silepa, Lea ena heaheari sinena, nanatunayao tatao: Gada eo Asa. Ina Iakobo nanatunayao tatao Padana‐arama eai se labasidi.
Isaako ena Mate
27 Abotai Iakobo ie lage tamana Isaako arinai Mamare eai, Araba eanuana eai ia ede Heberona, Aberahama eo Isaako edi aba miamia.
28 Isaako ena borimai handere esega eo tatao‐hasi‐se‐mate.
29 Abo Isaako i tubahai to ie mate, na se tore ana bogaoyao boeadi eai. Ia i tautaubadao ao ena borimai se gamagariri ariri, to nanatunayao Isoa eo Iakobo se tore.