31
Iakobo Labana i Dagogabaei
1 Iakobo riba i ataiei Labana nanatunayao si ene, “Tamamai ena gogo Iakobo i abihe’ohi, eo ena gogo lailaina ta ena abalaoma ede tamamai enana wa.”
2 Iakobo abo ie ita Labana nige ana ao se lolo ia arinai doha bagubagunana eai wa.
3 Abo GUIAU i ribalau Iakobo arinai i ene, “U uio tamamyao edi eanua eai, eau abo maem.”
4 Arinai Iakobo Rahela eo Lea i eogaidi oea eai wa arinai ena mamoe eawoidi se miamia.
5 I ribalau aridi eai i ene, “Ea itayao tamamiu nige i nualoloegu doha bagubaguna eai wa. Taiede tamagu ena Eaubada ia tausaguigu.
6 Au nuatuiyao tamamiu enana ea paisoa ma adidiridigu ie ohi,
7 Iamo i boraigu ma saudoudoi egu maisa ie bui, na Eaubada i gudugudui to nige i hebaaeagu.
8 Ena i ene, ‘Em maisa ede mamoe tupodi se dubaduba, tupodi se posiposi,’ maesega gamagaridi se labalaba doha nei. Ena i ene, ‘Em maisa ede mamoe uriuridi’ abo eawoina maudoina nanatudiyao uriuridi se labasidi.
9 Arinai Eaubada tamamiu ena bulumakau i abihaidi i ledima arigu eai.
10 Edi huia hemohemone eai matagu ea helabaisinidi, eo enosuai eai goti tamoadi taukamposisae bawesinadi aridi eai ea itadi uriuridi aha’ahadi, eo tupodi se posiposi, eo headi uriuridi.
11 Abo Eaubada ena aneru i ribalaoma arigu eai enosuai eai wa, i ene, ‘Iakobo’ to ea ne, ‘Eau ede ina.’
12 To i ene, ‘Matam u helabaisini u ita goti tamoadi tau kamposisae eawoina dageladi eai isi ede uriuridi eo tupodi se dubaduba, tupodi se posiposi eo useuseadi paana Labana ena abi gamagamagari arim eai ea itadio.
13 Eau Beteli Eaubadana, temeta we’u duna enagu u hetoro eo u he’eausi eo em aigora u aigoraei arigu eai. Aboina u torohai eanua ta u torohaigabaei, eo u uio aba‐labasim tanona eai.’ ”
14 Abo Rahela eo Lea ena riba se heauoi si ene, “Tamamai ena numa eai, ema tupo e ema gogo saha?
15 I abimai doha laolaoma tataodi e nige’e? Paana i unegabaemai’o eo ema maisa monina i hepaisoa he’ohiyao.
16 Gogo wa Eaubada tamamai arinai i abihai enamai ede, eo nanatumaiyao enadi; besi saha Eaubada i heitam abo u ginauri.”
17 Arinai Iakobo i torohai, nanatunayao eo monenayao i hegerudi kamela potadi eai.
18 Eo ena bulumakau eo ena suisui gamagaridi isi Padana‐arama eai i abidi wa, i woeahaidi bena se lau Kanana tehana eai tamana Isaako arinai.
19 Labana wa i lao’o ena mamoe wieadi bena i aitom, na Rahela tamana ena numa oitaudi i aiyaharidi.
20 Na Iakobo Labana, Arama tauna, i borai paana nige i heriba ena nuatu bena i dago.
21 Na ie dago mo maena gogo maudoina. I torohai Euparate sagana i awasi, eo i lau dudurai Gileada hesabana, oea tupidi tehadi eai.
Labana Iakobo i Henauwatai
22 Asubena hehaionana eai Labana se heriba si ene, “Iakobo i dago’o.”
23 Arinai ana bogao tataodi i woeaidi se heula ia se hemuriwatai asubena haligigi‐labui boeadi eai, i lau e se lagelobai Gileada oea tupina eai.
24 Abo Eaubada i taumasaraha Labana arinai, Arama tauna wa, maiona eai enosuai eai, i ribalau ia arinai i ene, “Em riba Iakobo arinai bena u komakomani, tabu u ribahelolo, eo tabu u ribahebaaea.”
25 Abo Labana Iakobo i lagetawai. Iakobo ena numa‐lulu i hetoro oea tupina eai: Labana hinage ma ehanayao Gileada oeana eai se mia.
26 Labana hinage i ribalau Iakobo arinai i ene, “Em nuatu saha to u torohai eamueamui doha meta, eo nanatuguyao sisine u laehesuaradi, eo u girihaidi doha tatao auaudi iala eai?
27 Paana saha u dago eamueamui, u dagogabaegu, nige u heribagu bena abo ma kodegu eo ma nualologu ea hetamarimiu, wana eo boiatu eo huele aridi eai?
28 Egu huia nige u leama bena abo tubuguyao tatao eo sisine ea alagoiedi eo ea lauaioniedi? Laulau eaueaure u ginauri!
29 Nimagu ena gigibori gonoana taba ea hebaaeamiu; na boni tamam ena Eaubada i ribalaoma i ene, ‘U komakomani, tabu Iakobo u ribahelolo, eo tabu hinage u ribahebaaea.’
30 Mamohoi em gadosisi bena u torohai paana tamam ena numa u nuatu aririei, na paana saha egu oitau u aiyaharidi?”
31 Abo Iakobo Labana i heuioi i ene, “Mata paana ede ea matausi, ea ene ata nanatumyao sisine u girihaidi nimagu eai.
32 Eai nimana eai em oitau wa u lobaidi tabu i mauri. I lolo ehadayao matadi eai em ginauri u eo’oidi arigu eai eo u abiuioidi.” Paana Iakobo nige abina i ata Rahela oitau wa i aiyaharidio.
33 Arinai Labana i lulau Iakobo ena numa‐lulu eai eo Lea enana hinage arinai, eo ena heaheari sisinedi edi numa‐lulu aridi eai i lulau. Na ginauri wa nige i lobaidi. Abo Lea ena numa‐lulu i pesagabaei, Rahela enana arinai i awasae.
34 Rahela oitau i abidi wa, na ababawa se tore kamela dagelana eai, boeana eai i toreamuidi, abo potadi eai ie bawa. Labana numa‐lulu alona eai i eo’o komakomani, na oitau wa nige i lobaidi.
35 Abo Rahela i ribalau tamana arinai i ene, “Egu guiau tabu nuam i baaea, paana matam eai nige ea toro, na sisine adi iwala ea hearo.” To i eo’o asa eai, oitau wa nige i lobaidi.
36 Iakobo i ouyalayala to Labana i dilai, eo i ribalau Labana arinai i ene, “Egu ponori saha, eo egu baaea aisana to ma ouyalayalam bena u toaigu ta?
37 Egu gogo boeadi eai u eo’oeo’o na em numa ginauridi saha eo saha u lobaidi? Ginauri wa u torehemasarahadi ehaguyao, eo ehamyao matadi eai, abo se heduduraida.
38 Borimai tau‐esega‐i‐mate boeadi eai ta miaesega, em mamoe bawesinadi eo em goti bawesinadi nanatudiyao nige se gabaedi, to em mamoe tamoadi nige ea aidi.
39 Saha eo saha suisui manamanabaladi se unuidi nige ea lediwa arim eai, na eaubom ea hedudulaidi. Ena saha se aiyahari asubena eai e maiona eai u lauhesomgu bena ea hemaisa.
40 Egu miamia ana ao doha ina, asubena eai gadomagu i hebaaeagu, eo maiona eai gogoma i abigu, nige begana ea eno.
41 Borimai tau‐esega‐i‐mate em numa eai ea miamia, eo borimai saudoudoi‐hasi enam ea paipaisoa nanatumyao sisine debadi eai, abo hinage borimai haligigi‐esega em bulumakau debadi eai, eo masaudoudoi egu maisa u buidi.
42 Ena tamagu ena Eaubada, eo Aberahama ena Eaubada, eo Isaako ena Aba‐matausi Eaubadana nige maegu, abo wauta ma nimaahagu u hetamarigu. Na Eaubada egu amamna eo egu nima paisoa i itadio to boni i ribasuuim.”
Iakobo eo Labana edi Riba Aigora
43 Labana i heuio Iakobo arinai i ene, “Ina sisine ta eau nanatuguyao, eo ina merumeru ta eau tubuguyao, ina suisui eau egu suisui, eo ginauri gamagamagaridi matada eai meta eau enagu. Na saha abo wauta ea ginauri nanatuguyao sisine enadi, eo merumeru wa se labasidi enadi?
44 Hage eda riba aigora ta abi oa eo eau abo i hemala eda aba‐italau oa eo eau duaduarida eai.”
45 Arinai Iakobo we’u lailaina ie abi i hetoro, i hemala du.
46 Eo Iakobo i ribalau ena dodogayao aridi eai i ene, “We’u au tanogogoidi.” To we’u se peidi, abo we’u peina potana eai se aiaigogo.
47 Abo Labana esana ie tore Iega‐sahaduta na Iakobo esana ie tore Galeda.
48 Labana i ene, “Ina pei ta abo eda heiheinoi oa eo eau duaduarida eai wauta.” Arinai esana ie tore Galeda.
49 Esana esau hinage Misepa, paana i ene, “GUIAU abo i itawataida eda aba‐mia udoi udoi aridi eai.
50 Ena nanatuguyao sisine u heamamnadi e ena monemyao headi u abidi, taba nige esau i ita, na Eaubada iabom tau‐itada ede.”
51 Abo Labana ie ribalau Iakobo arinai i ene, “Ina we’u peina ta u ita, eo ina du ea hetoro ta oa eo eau duaduarida eai.
52 Ina pei ta abo eda heiheinoi, eo ina du ta hinage taba nige we’u peina eo ina du ta u dioidi bena u hebaaeagu.
53 Aberahama ena Eaubada, eo Nahora ena Eaubada, eo tamadiyao edi Eaubada abo i heduduraida.” Abo Iakobo i riba aigora tamana Isaako ena Aba‐matausi Eaubadana debana eai.
54 Abo Iakobo aitalasam ie gabu oea tupina eai eo ehanayao i eogaidi bena se aiai, arinai se aiaigogo, eo maiona maudoina se mia oea tupina eai.
55 Abotai maratomtom begana Labana i toro, tubunayao eo nanatunayao sisine i alagoiedi eo i ribahelolodi, abo i torohaigabaedi, ie uio ena eanua eai.