3
Tau ena Beu
1 Nuura suisuidi GUIAU Eaubada i hetubudi wa, boeadi eai mota iabom i sonoga ariri. I ribalau sine arinai i ene, “Eaubada i ene taba nige oea ta oeagina uauadi au aidi, wa?”
2 Sine i ribalau mota arinai i ene, “Oea ta oeagina uauadi taba ai aidi,
3 na Eaubada i ribaei mo i ene, ‘Oeagi wa oea duaduarina eai i totoro, temeta mo uauana taba nige au ai, hinage taba nige au abilau arinai, ata au mate’.”
4 Mota abo i ribalau sine arinai i ene, “Mamohoi taba nige au mate;
5 Eaubada abina i ata huiana eai ena omi au ai abo matamiu se lala, abo omi doha Eaubada, lolo eo baaea italobaina abo au italobai.”
6 Arinai sine wa ie ita oeagi wa uauana omihede i lolo, ana ao matana eai i lolo, oeagi gadolelehina, paana tau arinai i sibasiba, abo i abilau uauana arinai, to ie ai; tupona i mosei monena arinai ia hinage ie ai.
7 Abotai abo tataodi labui se matalala, se italobaiuioidi hede ma kohakohadi. Abo kuhou lugudi se bodigogoidi, edi nogi se ginauridi.
8 Abo GUIAU Eaubada dagudaguguna se ataiei, oea eai wa i laulauwaiyo maimailahi wayawayauna eai, Adamu ma monena GUIAU Eaubada matana eai se bawayamui oea wa oeagina boeadi eai.
9 Na GUIAU Eaubada i eogalau Adamu arinai i ene, “Oa ede haedi?”
10 Ia abo i heuioi i ene, “Dagugum ea ataiei oea eai, na ea matausi paana ma kohakohagu ina, arinai ea bawayamui.”
11 Ia i ene, “Eai i heribam u kohakoha? Oeagi uauana ue ai, wa, iaede ea gorai bena tabu u ai?”
12 Tau wa i ene, “Sine u leama ia bena maegu wa, ia oeagi wa uauana i leama, to ea ai.”
13 GUIAU Eaubada sine wa arinai ie riba, i ene: “Saha ina u ginauri ta?” Sine i ene, “Mota i boraigu, to ea ai.”
14 GUIAU Eaubada mota arinai ie riba, i ene;
“Paana teina oa u ginauri,
ea ribahematem ta suisui gamagaridi
eo suisui manamanabaradi boeadi eai;
bogam eai abo u nenene,
tano muamuana abo u ai,
em mauri asubenadi gamagaridi eai.
15 Hewaiununa abo ea tore oa eo sine duaduarimiu eai,
eo oa tumamyao eo sine tumanayao duaduaridi eai hinage;
ia abo urum i utuhegaro,
eo oa abo ae gedurina u oihegaro.”
16 Sine arinai i ene,
“Abi‐merumeru arinai abo em amamna ea hegamagari;
amamna boeadi eai abo nanatumyao u labasidi,
taiede, em gadosisi abo otana mo monem arinai,
ia hinage abo i tanuagaim.”
17 Adamu arinai i ene,
“Paana monem arinana u ataiei,
eo oeagi wa ue ai,
ea lauhesom wa,
‘Tabu u ai,’
tano ea ribahebaaea ta debam eai;
paisoa amamnana mo abo aiaina u ai em mauri
asubenadi gamagaridi eai;
18 nurinuri eo lagau baabaaeadi abo i he’inidiwa;
eo oea wa aiaidi se ini iaede abo au aidi.
19 Debam muiasana eai
aiai abo u ai,
i lau e u uio tano arinai,
ede tano eai se hetubum wa;
oa tano ede,
arinai abo u hemalatanouio.”
20 Adamu monena esana ie tore Eva paana ginauri maumauridi gamagaridi ia sinadi ede.
21 GUIAU Eaubada Adamu ma monena adi lulu suisui opidi eai i ginauridi, eo i heluidi.
22 Abo GUIAU Eaubada i ene, “Paana tau i hemala doha ita esau, lolo eo baaea italobaina i italobaiyao, ata nimana i helele mauri oeagina uauana hinage i ai, abo maurina i lau esegai e nige nosina.”
23 Arinai GUIAU Eaubada Edena oeana eai i hepesa, i hetamari bena wau tano arinai ia se hetubu wa i giari.
24 Arinai tau wa i aiduiei; to oeana tupo aruabu eai serubim esau i hetoro, eo elepa balebalelemna i he’ode tupo gamagari eai, mauri oeagina dobilana wa i taugudui.