21
Isaako Labasina
1 GUIAU ie lage Saraha arinai doha i ribaei wa, eo ena ribahesunuma hinage GUIAU ginauriwatai.
2 Saraha abo ie boga, eo Aberahama natuna i labasi, ia i tautaubadao, huiana eai wa Eaubada i heribayao.
3 Aberahama ia natuna Saraha i labasi wa, esana ie tore Isaako.
4 Aberahama natuna i heperitome ia ena asubena hehaligigi‐haionana eai, doha Eaubada ena lauhesom wa.
5 Aberahama ena borimai handere esega huiana eai ne natuna Isaako se labasi.
6 Na Saraha i ene, “Eaubada egu aba maruhi i leama, aidimodi wasagu se ataiei abo se maruhi maeguyao.”
7 Hinage i ene, “Eai gonoana taba Aberahama i heriba i ene, ‘Saraha ia abo merumeru tauhemadodi esau?’ Ia mo natuna ea labasiyao ia tautaubadana eai ta.”
Hagara eo Isamaela se Hetamari Hesuaradi
8 Merumeru wa abo ie tubu, ie lau e susu se hedabu: hedabuna asubenana eai wa Aberahama mataasi lailaina i ginauri.
9 Na Saraha Aigupito sinena Hagara natuna Aberahama enana i labasi wa, ie ita maena ia natuna Isaako se aiaihea,
10 to i ribalau Aberahama arinai i ene, “Heaheari sinena ta ma natuna u aiduiedi. Heaheari sinena ta natuna ia taba nige gogo tupona i abi natugu Isaako maena.”
11 Riba ta Aberahama i heamna baaea, natuna wa debana eai,
12 Na Eaubada Aberahama arinai ie riba i ene, “Tabu nuam i amamna gama ta debana eai, eo em heaheari sinena debana eai. Saraha saha i ribaei u ginauri, ena riba u lauwatai, paana Isaako debana eai abo oa am isimurita esadi se ataidi.
13 Na heaheari sinena natuna wa ia hinage abo i hemala basileia, paana ia hinage natum.”
14 Arinai maratomtom eai Aberahama i toroheula ariri falawa ie abi, eo sarai opina eai goila i hegoi, Hagara i mosei, i toresae dabayarona eai, natuna hinage, eo i hetamari ie lau. To ie lau abo i laulau gaibu Biera‐siba barabarana eai.
15 I lau e goila sarai opina eai wa ie ohi abo merumeru i gabadobei oeagi gagirina esau paana eai.
16 I tausuara begana to ie bawa, edana lohana doha pidu se tu, paana i ene, “Nige ea henua bena merumeru matagu eai i mate.” Ma babawasuarana merumeru arinana i helai ie dou.
17 Gama wa arinana Eaubada i ataiei abo Eaubada ena aneru galewa eai ie eoga Hagara arinai i ene, “Hagara e, saha i henuadubum ta? Tabu u matausi, Eaubada gama wa arinana i ataieyao em aba ota eai ne.
18 U toro gama u abisini, u abididini nimam eai, paana ia arinai abo basileia lailaina ea hetubu.”
19 Abo Eaubada sine wa matana i helaladi to goila ipuna ie ita: abo ie lau sarai opina wa goila eai i hemonau, eo gama ana i mosei ie nom.
20 Gama wa abo i tubusae Eaubada maena; barabara eai ie mia eo i hemala pidu tautuna esau.
21 Parana barabarana eai ie mia to sinana Aigupito oeana eai sine esau i woeaiama abo monena.
Aberahama eo Abimeleko edi Riba Aigora
22 Huiana eai nei Abimeleko eo Pikolo ena tauiala bodadi tauwoeaidi se ribalau Aberahama arinai si ene, “Em abiabi gamagaridi eai ea ita Eaubada maem,
23 Arinai bena Eaubada esana eai enagu u riba aigora, taba nige huia esau abo abiborabora arigu eai u ginauri e nanatuguyao aridi eai, eo agu isimurita. Doha eau egu abilolo arim eai oa hinage bena em abiabi doha nei eau arigu eai, eo tano arinai u miamia ta hinage.”
24 Aberahama i ene, “Abo ea riba aigora.”
25 Huiana Aberahama Abimeleko ena heaheari tataodi i hegirudi paana ana goila sarana esau se girihai.
26 Abimeleko i ene, “Eau nige abina ea ata eai laulau ta i ginauri: oa nige u heribagu, eo wasana nige ea ataiei i laoma e asubena ta.”
27 Arinai Aberahama mamoe eo bulumakau i abidi eo Abimeleko i mosedi, eo tataodi labui edi ribahesunuma se ginauri.
28 Aberahama mamoe eawoina eai mamoe nanatudiyao bawesinadi haligigi‐labui i abihesuaradi.
29 Abimeleko i ribalau Aberahama arinai i ene, “Ina mamoe nanatunayao bawesinadi haligigi‐labui u abi hesuaradi ta, aniona saha?”
30 I heuio i ene, “Ina mamoe nanatudiyao bawesinadi haligigi‐labui ta abo eau nimagu eai u abidi, abo oa enagu tauriba ede, goila huana ta eau tau sarana.”
31 Arinai teha ne esana se tore Biera‐siba paana nei eai taudi labui se riba aigora.
32 Arinai Biera‐siba eai edi ribahesunuma se ginauri, abotai Abimeleko maena Pikolo ena iala bodana tauwoeaina wa se torohai se uio Pilistia edi tano eai.
33 Aberahama oeagi tabuna esau i umai Biera‐siba eai abo nei eai GUIAU esana i atai, Mauri Nige Nosina Eaubadana.
34 Abo Aberahama Pilistia eai ie mia asubena gamagamagari.