13
Aberama eo Lota se Haitausuaraedi
1 Arinai Aberama Aigupito i laugabaei, ia ma monena, eo ena ginauri maudoidi, maena Lota hinage, se seuio Negeba eai.
2 Aberama ena gogo abo i laiariri, suisui, eo silver eo gold.
3 Ena lauwasi wa Negeba eai i taudaru ie lau e Beteli eai ie lage, ena numa‐lulu ena aba‐hetorona bagubagunana eai wa, Beteli eo Eiai sorasoradi eai.
4 Eanua wa arinai aba‐aitalasam ena aba‐hetorona wa; temetai Aberama GUIAU esana i atai.
5 Lota ia Aberama i hemuriwatai wa, ia hinage ena mamoe eawoidi eo ena bulumakau eo ena numa‐lulu se gamagari.
6 Nige gonoadi tanona ne i heaidi ena se mia esega, paana edi gogo se lai ariariri, nige gonoadi se mia gogo.
7 Eo hinage Aberama ena bulumakau tauitawataidi eo Lota ena bulumakau tauitawataidi se haihaiabi. Huia eai ne Kanana tataodi eo Perisi tataodi tano ne se haihaimiai.
8 Abo Aberama i ribalau Lota arinai i ene, “Oa eo eau tabu ta haiabi eo em heaheari tataodi egu heaheari tataodi hinage, paana ita boga esega.
9 Tano maudoina ede matam eai me, e nige’e? Besi u abihesuara’uioim. Ena tupo nima‐seuseurim eai u abi, eau abo tupo tutu eai ea lau; e ena oa bena tupo tutu u abi, eau abo ea lau tupo seuseuri eai.”
10 Abo Lota matana i helabaisinidi, Ioridana gonuna ie ita, goilana se gamagari tupo gamagari eai, doha GUIAU ena oea, doha Aigupito tanona, Soara edana eai wa, huiana eai wa GUIAU sora nige Sodoma eo Gomara i hebaaeadi.
11 Arinai Lota Ioridana gonuna iabom enana i hineri, eo Lota ie lau tupo aruabu; arinai se hai‐tausuaraedi.
12 Aberama Kanana oeana eai ie mia, na Lota eanua lailaidi gonu eai wa boeadi eai ie mia eo ena numa‐lulu i hesigilaei i lau Sodoma eai.
13 Wau Sodoma tataodi se hemanabara ariri, GUIAU tauhebaaeana saesaedi ede isi.
14 Lota i abihesuara’uioi wa murina eai GUIAU i ribalau Aberama arinai, i ene, “Matam u helabaisinidi, em aba‐toro eai me u italau, tupo bauri, tupo eawana, tupo aruabu, tupo ealasi,
15 paana eanua maudoina u itaitai ne abo ea leawa, eo am isimurita, i lau e huia gamagari ana huia ana tasi.
16 Am isimurita abo ea hetubudi doha tano muaridi; ena gonoana tano muaridi se hasiridi abo gonoana hinage am isimurita se hasiridi.
17 U toro, tano ta u taudadai, lohana eo magagana, paana eau abo ea leawa.”
18 Arinai Aberama ena numa‐lulu i hesigilaei, i laoma Mamare aiarudi boeadi eai ie mia, isi ede Heberona eai wa; nei eai hinage aba‐aitalasam hatana i hetoro GUIAU enana.