11
Eaubada ena aiaromagigiri, tatao debadi eai.
1 Sora egu huia au leama, egu riba gaibu begana bena ea ribaei. Mamohoi arigu eai au taubiga ariri!
2 Debamiu eai ea aiaromagigiri, Eaubada ena aiaromagigiri eai; paana doha ea ribahetawasoraemiu Keriso arinai, doha hasara nuanuasupuna, ma‐nuaaana se woeai monena esega nuanuana eai.
3 Na ea matausi, doha mota Eva i borai wa, ena sonoga borabora eai, ata omi nuamiu se woeahesuaradi, Keriso gadosisina, aana, tahunuana, au abigabaei.
4 Ena esau i laowa Iesu udoi i guguiai, nige ia wa ai ai guguiai, e ena earua udoi au abi, nige doha arimai eai aue abi wa, e evanelia esau ai nige ai leawa, doha au nonoha ariri bena au ataiwatai.
5 Ia mo ea ene aposotolo saesaedi ta, eau nige ea murimuritaidi.
6 Ata bena ribariba eai awagu nige se biga, iamo italobaina ea abiyao, doha i masarahao arimiu eai, ema laulau gamagaridi eai.
7 Ea abi baaea wa, paana ea hedobidobiuioigu matamiu eai bena ea lausinimiu, to Eaubada ena evanelia enamiu ea guguiai, nige maisana?
8 Hari dubu aridi eai ea abigaibu, paana isi egu dobila se hemaisa, bena gonoagu enamiu ea paisoa.
9 Boeamiu eai ea mimia wa, huia headi ea dedeha, ia mo nige esau arimiu eai ea heporohe, paana eda tataoyao Makedonia eai se laoma wa, isi egu deha eai se saguigu. Arinai ea itawatauioigu, bena tabu ea heporohemiu, hinage doha meta abo egu abiabi ede.
10 Doha Keriso ena riba mamohoi arigu eai ie ota, arinai Akaia edi teha eai egu ribapasipasi eai ta taba nige tau esau i guduguduigu.
11 Paana saha? Paana nige ea gadosisiemiu? Agutoi! Eaubada abina i ata ea gadosisiemiu.
12 Na egu abiabi ta abo ea laelaei, taba nige edi huia ea mosedi, isi wa edi nuasaesae eai si ene bena edi paipaisoa gonoana doha ede ai.
Taulauheata borabora ribahesanapuena.
13 Tatao ta isi aposotolo borabora, adi ao mamohoi se toreyamuidi, bena adi ao doha Keriso ena aposotolo.
14 Taba nige ta noo, Satani ia hinage abina i ata mara aneruna ana ao i lui.
15 Arinai kamanina, ia ena heaheari tataodi adi ao abo se bui hinage, doha laulau dudurai heahearidi adi ao. Adi siga eai abo adi paipaisoa maisana.
Paulo se sinari, arinai ena tupo i hemasaraha.
16 Ea ribauio, tabu esau i ene ea eauyaure. Ena eau tauyauyaure, besi au taubiga, na ea ribapasipasi begana.
17 (Agutoi egu riba ta nige Guiau ena lauhesom, na eaubogu egu eauyaure eai, doha bena ea helolouioigu begana.
18 Headi tanoubu ginauridi aridi eai se ribapasipasi, eau hinage besi ea ribapasipasi.)
19 Omi au sibasiba ariri, hage au eari begana tauyauyaure aridi eai!
20 Paana tau ena i abimiu au hemala tauauau, e i hebaaeamiu, e iabom i helolouioi omi debamiu eai, e i saetawatawaemiu, e i oipareaimiu, taiede au nuapaipai mo.
21 Egu riba eai ta ea maee, doha ai mo ai beruberu ariri.
Eai gonoana saha i ribapasipasiei — ea ribariba doha tauyauyaure ina — eau gonoagu hinage taba ea ribapasipasiei.
22 Bena isi Heberu tataodi? Eau hinage. Isi Isaraela? Eau hinage. Isi Aberahama ana isimurita? Eau hinage.
23 Isi Keriso ena heaheari? Eau mo ea dioidi — ea ribariba doha tau esau aruana se loi — eau mo agu paisoa se lalai ariri, egu huia se tutuguduigu se gamagari ariri, se pidirigu i gamagari ariri, mate ea hanahanau mahisa.
24 Ma‐haligigi Iudea se pidirigu, edi pidipidiri eai wa, esega mo abo i lage tatao‐labui‐se‐mate.
25 Ma‐haiona tue eai se pidirigu; ma esega se lauwe’uigu. Ma‐haiona waga eai ea sariri; maiona esega eo asubena esega gabogabo eai ea alealelei;
26 adaadau eai huia se gamagari, aba‐baaea saga eai, aba‐baaea tauhemahemanabara nimadi eai, aba‐baaea eaubogu egu eanua tataodi nimadi eai, aba‐baaea Murimuri‐tataodi nimadi eai, aba‐baaea eanua lailai boeana eai, aba‐baaea barabara eai, aba‐baaea gabogabo eai, aba‐baaea eda tataoyao borabora nimadi eai;
27 paisoa porohe eai eo amamna eai, silasilawa eai, guriam eo gadomagu eai, aiaidabu eai huia se gamagari ariri, waoo eai eo nige ama lulu.
28 Ginauri maudoina ta potana eai, ede ekalesia porohedi ea bahebahei, asubena gamagamagari.
29 Eai i beruberu, na eau nige ea beruberu hinage? Eai se abihebeu, na eau nige nuagu i alasi?
30 Ena bena ea ribapasipasi, besi ginauri headi egu beruberu se hemasaraha, isi abo ea ribapasipasiedi.
31 Eaubada, eda Guiau Iesu Keriso Tamana, ia abigu i ata nige ea riba borabora.
32 Damaseko eai Wasawasa Aretasi ena gavana ie riba edi eanua dobiladi gududi se nahanahaidi, bena se toaigu,
33 na numa esau eanua tonana eai, tomlapaina eai ea sosora, bosa eai se hedawedobeigu, to nimana eai ea dadago.