6
Ekalesia tataodi taba nige koti eai heledi ekalesia se lauhetala.
1 Ena esau boeamiu eai maena tauataiena esau se haiawayagara, abo au lau tau gaibu matana eai bena i heduduraimiu? Abo au lau hetabu tataodi mo matadi eai, e nige’e?
2 Au nuatui, e, nige’e, hetabu tataodi tanoubu abo se hedudurai? Ena omi abo tanoubu tauheduduraina, edoha ginauri gagiridi heduduraidi abina nige au ata?
3 Au nuatui, ita aneru hinage abo ta heduduraidi, e nige’e? Taba doha nei, teina mauri ta ginauridi isi mo taba abidi ta ata ariri ta heduduraidi.
4 Teina mauri ta ginauridi ena abidi ta ata ta heduduraidi, paana saha abo isi dubu eai nige begana se sunumaedi, isi ede au hetorodi tauheduduraimiu?
5 Riba ta debana eai bena au taumaeamaea. Mamohoi nige tau sonoga esau arimiu eai? Nige esega ena tataoyao hekirainodi abina i ata,
6 arinai eda pele tauna esau ena tau i laei laugagaeo abaheduduraina numana eai, eo tatao isi nige tauawaabi matadi eai?
7-8 Au laulauhetala laugagaeo numana eai, emi baaea meta, arinai ea hegirumiu. Ena se hebaaeamiu paana saha nige au nuapaipai mo? Eo ena se boraimiu taiede, i otawa. Na omi au hebahebaaea, eo au abiabi gaibu, eo emi tataoyao mamohoi ede au hebahebaaeadi.
Tauda ginauri tabuna: (1) Paana se heaao, se heduduraiyao.
9 Au nuatui e nige’e, tatao edi laulau nige se dudurai taba nige se lusora Eaubada ena basileia eai? Tabu se boraimiu; tatao laulau‐bii, eo tatao eaubada borabora se aihelahuidi, eo tatao ganaganawari, eo tatao laulau gewagewadi, eo tatao ma heledi tatao se hebaaeauioidi,
10 eo tatao aiaiyahari, eo hari tatao edi ginauri taugadosisiedi, eo tatao nomnomdaoi, eo tatao siosiololodi, eo tatao aiaigirihaidi, taba nige edi tupo se abi Eaubada ena basileia eai.
11 Nabada omi heamiu doha meta. Na se heduimiuo, se hetabuemiuo, omi Guiau Iesu Keriso esana eai se heduduraimiu, eo eda Eaubada ena Earua arinai.
12 Ginauri gamagamagari arigu eai se lolo, nige laugagaeodi, ia mo ginauri gamagamagari nige se helologu. Ginauri gamagamagari se lolo laugagaeo eai, ia mo nige ea henua ginauri esa i tanuagaegu.
Tauda tabuna: (2) Paana Guiau enana.
13 Aiai ede boga ana, eo boga aiai enana, na Eaubada abo i hetatagorigorilabulabuiedi. Tauda nige se hetubu laulau bii enana: se hetubu Eaubada enana, Guiau hinage ita tauda enana.
14 Eaubada Guiau i hetorouioi ia ena gigibori eai, abo hinage i hetorouioida.
15 Au nuatui, e nige’e, taumiu isi ede Keriso eaunayao? Keriso eaunayao abo ea abidi ea hepatulaedi sine baaea arinai wa? Eaubada enaba nige’e!
16 Hede saha? Au nuatui, e nige’e, ia i hepatuuioi sine baaea arinai, maena se hemala taudi esega? Doha se uriyao, “Taudi labui se hemala buluma esega.”
17 Na ia i patulau Guiau arinai, maena se hemala Earua esega.
18 Laulau bii au dagoei. Baaea udoi udoi tau i ginauridi, ede tauna murimurina eai; na laulau bii tauabina iabom tauna i hebaaeauioi.
Tauda Tabuna: (3) Paana numa tabuna ede.
19 Edohana? Au nuatui, e nige’e taumiu ede Earua Tabuna ena numa tabuna, ia boeamiu eai ie mia, Eaubada arinai aue abi. Omi omibom enamiu nige’e;
20 maisana eai se uneuneimiuo. Arinai Eaubada taumiu eai au hedebasaei, eo earuamiu eai, isi ede Eaubada enana.