3
Buluma miamiana earuada edi tubu i gudugudui.
1 Na, egu tataoyao e, eau taba nige ea ribalaowa arimiu eai doha omi earuamiu eai tauataiena, na ea ribalaowa doha omi buluma dobilana eai au laulau, doha omi kaimou mo Keriso arinai.
2 Susu mo ea henommiu, aiai mamohoi nige ea leawa, paana nabada wa nige gonoamiu au ai, huia ta hinage soramiu.
3 Paana omi buluma dobilana eai ma laulaumiu. Arimiu eai aiaromagigiri eo lulu, eo peimiu udoi udoi, iaede omi buluma dobilana eai au laulau, eo emi laulau doha tatao kamanidi, e nige’e?
4 Esau i ene, “Eau Paulo ena pele,” eo esau i ene, “Eau Apolo ena pele,” omi sora buluma eai au laulau, e nige’e?
5 Paulo ne eai? Eo Apolo eai? Isi tauheaheari mo, debadi eai au ataiwatai wa, doha Guiau i mosei hari tau enana, hari tau enana.
6 Eau ea uuma, Apolo goila eai i he’ini, na Eaubada aniona i mosei.
7 Tau umaina nige ta nuatui, eo goila eai tauhe’inina nige ta nuatui, na Eaubada mo aniona taumosemoseina.
8 Tauumaina eo goila tauhe’inina gonogonoadi, esau, esau ana paisoa maisana abo i abi, ana paisoa nonoina debana eai.
9 Eaubada ena taupaisoa ita, maeda ta paipaisoa; omi Eaubada ena oea se umai, omi Eaubada ena numa i hetoromiu.
10 Eaubada ena ainauia se leama arigu eai, debana eai eau doha numa tauabina tausonoga, numa paana eau ea totore, potana eai tau esau abo i abinuma. Tau esau, tau esau, bena i ita komakomani, edohana paa ta potana eai ena abiabinuma.
11 Taba nige tau esau paana udoi i tore, paana wa se toreyao iaede Iesu Keriso.
Paipaisoa adi ao labui, eo uauadi.
12 Teina paana eai taba tau esau ginauri i tarini, gold e silver, e we’u maisa lailaidi, e oeagi, e lei, e wenu—
13 tatao gamagamagari esau, esau, ana paisoa abo se hemasaraha, Asubenana wa abo i hemasaraha paana oeagi alaalasina eai abo i masaraha, alaalasina wa tatao gamagamagari adi paisoa abo i lauita i peikomakomani, i lolo e i baaea.
14 Ena tau esau ana paisoa i miatahitahi, wau paana eai i tarini wa, ia ainauia abo i abi.
15 Ena tau esau ana paisoa se gabu, enana wa abo i tauyamui, iabom mo abo i mauri, na doha oeagi alaalasina eai se hemauri.
16 Omi abina nige au ata, omi Eaubada ena numa tabuna, eo Earua Tabuna i miamia nuaboeamiu eai?
17 Ena tau esau Eaubada ena numa tabuna i hebaaea, Eaubada abo ia i hebaaea hinage, paana Eaubada ena numa tabuna se hetabuei, numana wa iaede omi.
18 Tabu tau esau iabom i borauioi. Ena tau esau arimiu eai i ene tanoubu sonogana ie abi, ia taba i hemala eauyaure, ena bena abo i sonoga mamohoi.
19 Paana ede teina tanoubu ta sonogana eaubada matana eai eauyaure. Doha se uriyao si ene, “Tatao sonoga i toaidi edi sanapu eai,”
20 eo hinage, “Guiau tatao sonoga edi nuatu abidi i atao, nige aniodi.” (Psa. 94.11.)
21 Arinai tabu esau ena aba ribapasipasi tatao mo. Ginauri gamagaridi omi enamiu,
22 ena Paulo, e Apolo, e Kipasi, e tanoubu, e mauri, e mate, e teina isi ta ginauridi, e ginauri maraitom‐asubena abo se tubu: ginauri gamagaridi omi enamiu ede;
23 eo omi Keriso enana, eo Keriso Eaubada enana.