14
Ainauia esau: riba‐peroveta.
1 Bena emi aipate gadosisi, abotai earua ena ainauia headi hesabadi au lau, bagubagunana ede ribariba‐peroveta.
2 Paana esau arina udoi eai i riba, ia Eaubada arinai i ribariba, tatao nige’e; nige esau ena riba i ataiei, Earua eai ginauri eamuyamuidi i ribaribaedi.
3 Na esau i ribariba‐peroveta ia tatao enadi i lauhasahasa, i henuabigadi.
4 Arina udoi tauribaribaena iabom mo i heatauioi, na tauriba‐peroveta ia ekalesia i heatadi.
5 Ea henua taba gamagarimiu arina udoi eai au ribariba, na ribariba peroveta mo i lolo ariri. Tau ribariba‐peroveta ia arina udoi tauribaena i saetawatawaei, ena nige esau arinana i ribabui bena ekalesia se ataiei.
6 Hage wau ta ea laowa arimiu eai arina udoi udoi eai ea ribariba, egu tataoyao e, edohana abo i saguimiu ena nige ribahemasaraha esau, e sonoga, e ribaperoveta, e lauheata, ea tore matamiu eai?
7 Aba aihea doha baubau e huelele, isi ginauri matematedi mo, na ena dagugudi nige se masaraha edohana abo ta ataiei aitea wanana ede se iuhiyuhini, e se oioini?
8 Ena bogigi daguguna nige i masaraha, eai abo i henonohauioi iala arinai?
9 Gonoana omi, ena arina udoi ribaribadi nige se masaraha, edohana abo tatao emi riba aniodi se atailobaidi? Abo emi riba au gabagaibuidi.
10 Tanoubu eai ta arina se gamagari, eo gamagaridi ma aniodi.
11 Iaede, ena tau esau i ribalaoma na ena riba nige ea ataiei, eau doha ealeyaleba tauna ia arinai, ia doha ealeyaleba tauna eau arigu eai.
12 Omi Earua heiheinoina au eooidi wa, bena au nuahai ekalesia heaheatana mo arinai.
13 Arinai arina udoi tauribaribaena wa taba i uura bena ribaribabui ainauiana i abi.
14 Paana ena arina udoi eai ea lau‐uura, earuagu mo i uura na nuagu nige i paipaisoa.
15 Abo edohana? Besi, earuagu eai abo ea lau‐uura, eo ma nuagu hinage abo ea lau‐uura; earuagu eai abo ea aihelahui wana eai, eo ma nuagu hinage abo ea aihelahui wana eai.
16 Ena nige’e, oa earuam eai Eaubada u hedebasaei, na tausupusupu gegesim eai i totoro edohana abo em lautoi eai enaba, “Amen,” ena nige em riba aniona i ataiei?
17 Em lautoi ata bena i dudurai, ia mo tauataiena wa nige i sagui.
18 Eaubada ea lautoiei, arina udodoi ribaribaena eai eau taba gamagarimiu ea dioimiu.
19 Ia mo dubu eai eau riba haligigi mo taba ea ribaedi tatao bena ea heatadi, meta i lolo ariri, riba tausani saudoudoi arina udoi eai nige’e.
20 Egu tataoyao e, tabu emi sibasiba eai omi doha merumeru, baaea eai mo bena omi merumeru, na sibasibamiu eai bena au taulailai.
21 Se uriyao laugagaeo eai si ene. “Hari arina, eo hari tatao sopadi eai, abo ea ribalau teina boda ta aridi eai, na arinagu taba nige se ataiei, Guiau nei doha i ribaei.” (Is. 28.11-12.)
22 Arinai arina udodoi ribaribaena wa, ia ede heiheinoi mo, nige tauataiena enadi na tauawayagara enadi.
23 Arinai taba ekalesia edi oigogo arina udodoi eai se ribariba, na tausupusupu, e esau nige i awamamohoiei, i laoma, abo nige i ene au eauyaure?
24 Na ena gamagaridi se riba‐peroveta, to tau nige i awamamohoi, e tausupusupu esau i laoma, gamagaridi edi ribariba eai ia abo nuana i bui, eo awadi eai abo ana giru i ita.
25 Ia nuaboeana eai nuatu eamuyamuidi se masarahao, abo i gurisalaoba Eaubada i aihelahui i ene mamohoi Eaubada boeamiu eai ede.
Oigogo abiabi‐duduraina.
26 Egu tataoyao e, abo edohana? Ena au oigogo, esa eo esa ena nuatu i leama; esau hedebasae wanana, esau ena lauheata, esau riba hemasaraha, e riba arina udoi eai, e wau riba wa i torebui. Ginauri gamagari abo au abidi aba‐heatamiu bena.
27 Taba esau arina udoi eai bena i riba, taba labui e haiona mo se riba oigogo boeana eai, eo esau esau ena huia eai; hinage taba esau enadi i ribabui.
28 Ena nige tauribabui esau metai, besi wau tauribariba wa taba se monou, esau, esau, nuana eai mo iabom enana i riba.
29 Tau‐ribaperoveta labui e haiona hinage taba se riba, na gamagarimiu edi riba au nonoidi.
30 Taba Eaubada nuatu esau i hemasaraha taubabawa esau arinai, wau tau wa i ribabagunao besi i monou.
31 Gamagarimiu taba au ribaperoveta, esau to esau, abo gamagarimiu au atailobai, eo nuamiu se adidiri;
32 peroveta earuadi se awaabi peroveta wa aridi eai.
33 Paana Eaubada nige abiponopono Eaubadana, na abi komakomani Eaubadana.
Doha ekalesia edi dubu gamagaridi eai,
34 sisine taba se monou dubu eai, taba nige se riba, bena se awaabi mo, doha laugagaeo i ribaei wa.
35 Ena saha bena se atailobai, se lageuioi numa eai abo monediyao se hesioidi. Sine dubu eai i ribariba nige i lolo.
36 Edohana? Eaubada ena riba omi arimiu eai i laoma, e i lagewa omibom mo arimiu eai?
37 Ena esau i ene ia peroveta, e ia earuana eai se ainauiai, bena i ita komakomani, ina ea uriyawa ta Guiau ena lauhesom ede.
38 Ena tau esau i supusupuei, besi ia tausupusupu.
39 Egu tataoyao e, ribana ede ina: riba‐peroveta ainauiana au eooi, na arina udoi eai ribaribana tabu au gudugudui.
40 Ginauri gamagaridi au ginauridi, bena adi ao se dudurai, eo se laulolo‐esegaidi.