9
परमप्रभु आ लोव़
1 परमप्रभु यावेम हद्राक रागी नु दमस्कस सहर आस पर्बम लोव़ का पशो बाक्त। मारदे हना इस्राएल ङा थर नेल्ल नु अर्को रागी ङा मुर यो परमप्रभु यावे केन बाक्नीम। यसैया १७:-
2 शुश जोक्ब तुइक्ब बाक्तेक्म हना यो, हमाथ, टायर नु सीदोन सहर आन पर्बम परमप्रभु यावेमी लोव़ पशो बाक्ब। यसैया २३:-; येरमीया ४७:४; इजीकीएल २६:-; इजीकीएल २८:-
3 टायरमी आंम पर्बम बोल्यो दरवार का सेल्शो बाक्ब। मेकोमी फुरक खोदेंशो पा चांदी नु लां मेर ङा हिलो खोदेंशो पा सुन तेल्शो बाक्ब।
4 तन्न परमप्रभुमी मेको आ बाक्शो मारेइ मारेइ रोइक्ब। मेको आ शोंप नेल्ल समुन्द्रमी ताइश्शा गेब। मिनु मेको मीम ग्रोइश्शा, खतम दुम्नीम।
5 मिनु अश्कलोन मेको तशा हिंब। गाजा हिंशा ख्रिंख्रि पाइब, एक्रोन शुश सुर्ता पा आ आस पशो जाम्शा लाइब। गाजा ङा पिप जाम्शा लाइब। अश्कलोनमी मुर मबाक्तीक दुम्ब। येरमीया ४७:-
6 अश्दोद सहरमी खाल्सीशो मुरपुकी बाक्नीम। मिनु गो पलिस्ती आन ठेयब लेत्तीक खतम पा गेनुङ। ब्यवस्था २३:३
7 गो मेको आन शोव़ रे पा हुश नु मेको आन ख्रुइ रे ग्रांग्रा दिचा ङा थोव़क ग्रुंइनुङ। लीशो मुरपुकी आंइ परमप्रभु आ मुर दुम्नीम। मेकोपुकी यहूदा आ थर ङा मुर खोदेंशो दुम्नीम। एक्रोन ङा मुर चहिं यबुसी खोदेंशो दुम्नीम। उत्पत्ती ९:४; यहोसु १५:६३; २सामुएल २४:१८
8 मिनु नोले गो आं खिं कली आंमा खाल पाइब खोदेंशो बाक्नुङ। मोपा सुइ मुर एर ओंथ गाक्ने मचाप्नीम। सुइमी आं मुर आन कली लडाइ मतोइनीम। मारदे हना मुल गो आंमान मेको आन कली कोव़नुङ। जकरिया २:९
सियोन ङा पिप जाक्शो
9 सियोन आ तमी, साप्पा ग्येरसो। यरूसलेम आ तमी ग्येरशा ठेयब सेंदा पा ग्रीङो। मारदे हना इ पिप इ बाक्तीकेमी जाक्ना जाक्न बाक्ब। मेको ग्राशा ग्येरसीशा जाक्ब। मेको ब्रेम्शो बाक्ब। मेको गधा तार ङोइश्शा जाक्ब। गधा आ चाइक्ब तार ङोइश्शा जाक्ब। सेफन्याह ३:१४; मत्ती २१:५
10 गो एफ्राइम रे पा बग्गीपुकी नु यरूसलेम रे पा लडाइ पाइब शारा लाइक्नुङ। लडाइ पाइब आन लिब्रा जिक्ब। मेकोमी रागी रागी ङा मुर आन कली थुं नाइश्शा बाक्चा गेब। मेकोमी समुन्द्र का रे अर्को समुन्द्र सम्म नु युफ्रेटीस खोला रे रागी ङा सुर सम्म सासन पाइब। मीका ५:९
11 गे नु पशो आं हुश आ कबलम पतीके इ चोक्चा पुंइसीशो मुर आन कली ब्वाक्कु मबाक्शो खाल्टा रे ग्रुंइनुङमी। प्रस्थान २४:८; उत्पत्ती ३७:२४
12 आस पा बाक्शो चोक्चा पुंइसीशो मुरपुकी इन बोल्यो ब्रोंइशा बाक्तीके लेश्शा लने। गो इन कली इन साम्शो क्येङा निक्शी खेयप खोइ शुश गेनुङ। जकरिया १०:९; यसैया ६१:७
13 गो यहूदा कली आं लिब्रा खुक्शो खोदेंशो पा खुक्नुङ। गो एफ्राइम कली मेको आ ब्रा खोदेंशो सेल्नुङ। सियोन, इ तौ आन कली गो ग्रीस रागी आ तौ आन पर्बम क्युक्नुङ। मिनु गो इ कली बोल्यो लडाइ पाइब आ तरवार खोदेंशो सेल्नुङ।
14 मिनु नोले परमप्रभु यावे इन क्येङा इर ग्रूब। मेको आ ब्रा चिला आप्शो खोदेंशो पा बेरनीम। परमप्रभु, परमप्रभु यावेमी तुराही ताप्ब। मिनु दक्खिन ङा फश गिवारम गाक्शा लाइब।
15 मुर नेल्ल आन परमप्रभु यावेमी मेको आन कली राइश्शा प्रोंइब। मेकोमी आन जोरी सत्रु आन कली खतम पोक्ब। मेकोपुकीमी आन हुश अङगुर शांबु खोदेंशो पा तूनीम। मेकोपुकी चढ़ेतीक ङा हुश कुर पतीक बोस खोदेंशो पा ब्रीशो बाक्नीम। चढ़ेतीक आ एर ओंथ कुना कुना मेर फ्रशो हुश खोदेंशो बाक्नीम।
16 मेको नाक्ती परमप्रभु यावे, आन परमप्रभुमी मेको आन कली श्येत रे प्रोंइब। मारदे हना मेकोपुकी आ बगाल खोदेंशो बाक्नीम। मेको सिरपेच ङा हीरा खोदेंशो पा ब्राइनीम। मेकोपुकी परमप्रभु यावे, आन परमप्रभु आ रागीम हीरा खोदेंशो पा ब्राइनीम।
17 मेको आ दाक्तीके नु आ शिशी पतीके थम ठेयब बाक्ब। वोंइश आल ग्रेल्शो अन्न खोदेंशो पा शुश दुम्नीम। मीश आल नक अङगुर शांबु खोदेंशो पा दारशो दुम्नीम।