23
दाऊद आ नोले ङा लोव़
1 एको दाऊद आ नोले ङा लोव़ बाक्ब। येस्से आ तौ दाऊद आ नोले देंशो लोव़ एको बाक्ब। परमप्रभुमी ठेयब सेल्शो मुर आ पशो लोव़ एको बाक्ब। याकूब आ परमप्रभुमी मेको कली तेल लुक्शा, पिप सेल्शो बाक्त। इस्राएली आन सक्ति पाइश्शो आन दातेमी दाऊद कली नेल्ल क्येङा दाक्ब बाक्ब। १सामुएल १६:१३
2 “परमप्रभु यावे आ सोक्त आं रे पा ब्वाक्शो बाक्ब। मेको आ देंशो लोव़ आं शोव़म बाक्ब।
3 इस्राएली आन परमप्रभुम लोव़ पाप्तु। इस्राएली आन सेरथे फुल्लुमी आं कली ‘सुमी मुर आन कली ठीक निसाफ पाइबा, सुम परमप्रभु कली मान पा हिंशा हुकुम पाइबा,
4 मेको सुनी ङा नां खोदेंशो बाक्ब। मेको गोस्स मबाक्शो सुनी दाप्शो नां खोदेंशो बाक्ब। मिनु मेको रेउ यिम नोले वाशो घांस खोदेंशो बाक्ब’ देंत। न्यायाधीस ५:३१
5 मोपा आं खिं परमप्रभु नु बाक्ब। मारदे हना मेकोमी गो नु गेना हना यो लीब कबल का पशो बाक्ब। मेको नेल्ल रिम्शो नु लीब। मिनु मेकोमी आं रिम्शो दुम्शो नु आं दाक्शो बारना बारना लपाइक्ब।
6 तन्न परमप्रभु यावे आ अरेशो मटीब फशेम बेरशो चू खोदेंशो बाक्नीम। सुइम मेको कली गुइम थीने मचाप्नीम।
7 सुम मेको कली ताइक्चा दाक्बा, मेकोमी फलाम नु कोक्के लाइश्शा गुप्नीम। मेको मीम हुम्शा, रीब पा दाक्चा पुंइसीनीम” देंत।
दाऊद आ बोल्यो लडाइ पाइब
१इतिहास ११:१०-४७
8 दाऊद आ बोल्यो लडाइ पाइब मुर आन नें मार बाक्तेक्म देंशा हना, ङोंइती ताह-केमोन आ खिं ङा मुर योशेब-बाशेबेथ बाक्माक्त। मेको बोल्यो सां आन दाते ङा कप्तान बाक्माक्त। मेकोमी ८ सहे मुर आन कली आ तूतीकेम कालेमी साइक्मी बाक्त।
9 मेको आ नोले ङा बोल्यो सां लडाइ पाइब आन दाते ङा अहोही आ चच दोदो आ तौ एलाजर बाक्माक्त। मेको दाऊद नु बाक्शो बाक्माक्त। मेकेर पलिस्तीपुकी लडाइ पचा कली बुक्शो बाक्मा बाक्त। मिनु इस्राएलीपुकी प्रोक्मानु, मेको कामीन लडाइ पतीकेम राप्शा,
10 मदम सम्म पलिस्ती आन कली तरवारम क्योरस ङा क्योरस पामी बाक्त। मेको आ गुइमी तरवार खोक्शो बाक्माक्त। मोपा परमप्रभु यावेम मेको नाक्ती थाम्पा ग्रापदा बाक्त। मेको नोले मुरपुकी बेक्शो मुर आन मार मार रोइक्थ ला जाक्मा बाक्त।
11 मेको आ नोले ङा हरारी आगी आ तौ शम्माह बाक्माक्त। पलिस्तीपुकी लेहीम बुक्शो बाक्मा बाक्त। मेकेर मस शोक्शो थम रिम्शो रू का बाक्माक्त। मिनु अरामीपुकी पलिस्ती आन ङोंइती रे ब्रुशा प्रोक्मा बाक्त।
12 मिनु पलिस्तीपुकीमी मुर आन कली खेदा पा लदमेनु, मेको शम्मा मस शोक्शो रू आ दातेमी राप्शा, खाल पा बाक्शो बाक्माक्त। मिनु मेकोमी पलिस्ती आन कली साइक्मी बाक्त। मोपा परमप्रभु यावेमी मेको आन कली थाम्पा ग्रापदा बाक्त।
13 अन्न रिक्तीक ङोंइती ङा नाक्ती, मेको ३० जना कप्तान आन दाते ङा मेको सां अदुल्लाम ङा पुक्खी दाऊद आ बाक्तीकेम जाक्शो बाक्मा बाक्त। पलिस्ती आन हुल का चहिं रेफाइम ङा बेंसीम बाक्तीक सेल्शा बाक्शो बाक्मा बाक्त। १सामुएल २२:१
14 मेना दाऊद डांडा ङा गारो हिरशो बोल्यो बाक्तीकेम बाक्शो बाक्माक्त। पलिस्ती आन लडाइ पाइब हुल बेथलेहेमम बाक्मा बाक्त।
15 मिनु काबु नाक्त दाऊद थाम्पा ब्वाक्कु तूतू दाक्शो बाक्माक्त। मिनु मेकोमी तूतू दाक्शा “सुइमी आं कली बेथलेहेम ङा ठेयब लाप्चो आ नेक्था बाक्शो इनार ङा ब्वाक्कु तूचा गेयीमी हना, रिम्शो दुम वा” देंमाक्त।
16 मिनु मेको बोल्यो लडाइ पाइब सां पलिस्ती आन दाते रे ग्रीशा लशा बेथलेहेम ङा ठेयब लाप्चो आ नेक्था बाक्शो इनार ङा ब्वाक्कु चाक्शा दाऊद कली गेमे बाक्त। तन्न दाऊदम मेको तूने मबिस्से बाक्त। मेकोमी मेको ब्वाक्कु परमप्रभु यावे आ ङोंइती मोदा बाक्त।
17 मेकोमी “परमप्रभु यावे आ नेंमी गो एको ब्वाक्कु मतूनुङ। मार, गो एको मुर आन हुश तूनुङा? एकोपुकीम एको ब्वाक्कु हेररा आन गिंम सोइक्चा ङा पा लशा चाक्तेक्म” देंमाक्त। मोपतीके दाऊदमी मेको ब्वाक्कु मतूङा बाक्त। मेको बोल्यो लडाइ पाइब सां आन ठेयब गेय मेकोन बाक्त।
अरु बोल्यो लडाइ पाइब
18 मिनु सेरूयाह आ तौ योआब आ लोक्ब अबीशै मेको ३० जना आन दाते ङा ठेयब बाक्माक्त। मेकोमी सहे सां जना मुर आन कली आ तूतीकेम लडाइ पा साइक्मी बाक्त। मेको सांमी “मेको बोल्यो मुर बाक्ब” देंमा बाक्त। २सामुएल २१:१७
19 मेको, मेको ३० जना आन दाते ङा नेल्ल क्येङा हिक्सीशो मुर बाक्शो बाक्त। मिनु मेको आन कप्तान दुम्माक्त। तन्न मेको बोल्यो मुर सां खोदेंशो दुम्ने मचबा बाक्त।
20 कब्सेल सहर ङा येहो-यादा आ तौ बेनायाह यो बोल्यो लडाइ पाइब का बाक्माक्त। मेकोमी ठेयब गेय पशो बाक्माक्त। मेकोम मोआब ङा अरीएल आ तौ निक्शी साइश्शो बाक्माक्त। फुं यिम ना मेकोमी खाल्टाम लशा मेकेर गुप्स का साइश्शो बाक्माक्त। २सामुएल ८:१८; यहोसु १५:२१
21 मेकोमी दारशो बोल्यो इजीप्त ङा मुर का कली साइश्शो बाक्माक्त। मेको इजीप्त ङा मुर तूतीक का शेशो बाक्माक्त। तन्न बेनायाह कोक्के का शेशा लशा, मेको इजीप्त ङा मुर आ तूतीक आ गुइ रे रोइश्शा, मेको कली सदा बाक्त।
22 येहो-यादा आ तौ बेनायाह आ पशो मेकोन बाक्ब। मेको सांमी “मेको बोल्यो लडाइ पाइब का बाक्ब” देंमा बाक्त।
23 मेको, मेको ३० जना मुर आन दाते ङा हिक्सीशो मुर का बाक्शो बाक्त। तन्न मेको बोल्यो सां खोदेंशो दुम्ने मचबा बाक्त। मिनु दाऊदमी मेको कली आं कली खाल पाइब आन ठेयब मुर सेला बाक्त।
24 मिनु मेको ३० जना आन दातेमी सु सु बाक्मा बाक्त देंशा हना, योआब आ लोक्ब आसाहेल, बेथलेहेम ङा दोदो आ तौ एल्हानान, २सामुएल २:१८
25 हारोद सहर ङा शम्माह, हारोद सहर ङा एलीका,
26 पाल्ती आ खिं ङा हेलेस, तेकोहा सहर ङा इक्केश आ तौ इरा,
27 अनाथोथ सहर ङा अबीएजेर, हुशा ङा मुर मेबुन्नाइ,
28 अहोही आ खिं ङा मुर सल्मोन, नेतोफाह आ खिं ङा माहाराइ,
29 नेतोफाह आ खिं ङा बानाह आ तौ हेलेब, गिबा सहर ङा बेन्यामीन आ थर ङा रिबाइ आ तौ इत्ताइ,
30 पिराथोन सहर ङा बेनायाह, गाश खोला ङा हिददाइ,
31 अरबा आ खिं ङा मुर अबी-अल्बोन, बाहुरीम सहर ङा अज्मावेथ,
32 शा-आल्बोन सहर ङा एली-अहबा, याशेन आ तौ योनाथन,
33 हरारी सहर ङा शम्माह, हरारी सहर ङा शरार आ तौ अहीयाम, २सामुएल १५:१२
34 माकाह सहर ङा अहास्बाइ आ तौ एली-फेलेत, गिलो ङा अहीथोफेल आ तौ एलीआम,
35 कारमेल पहड ङा हेस्रो, यहूदा ङा अरब सहर ङा पाराइ,
36 सोबाह सहर ङा नाथान आ तौ इगाल, गाद आ थर ङा बानी,
37 अम्मोनी जेलेक, बेयरोथ सहर ङा नहाराइ, मेको सेरूयाह आ तौ योआब आ या कुरब बाक्माक्त।
38 इथ्री आ खिं ङा इरा, इथ्री आ खिं ङा गारेब नु २सामुएल ११:३
39 हित्ती आ मुर उरीयाह, मेको नेल्ल पा ३७ जना बाक्मा बाक्त।