21
अन्काल नु रिस्पाह आ कथा
1 पिप दाऊद आ पालाम बर्स सां सम्म अन्काल दुम्स ङा दुम्स पवा बाक्त। मिनु दाऊदमी परमप्रभु यावे कली हिल्लो पवा बाक्त। मिनु परमप्रभु यावेमी “सावल नु आ खिं ङा मुर आन तार हुश आ दोस बाक्शो बाक्ब। मारदे हना मेकोम गिबोनी आन कली साइक्तु” देंमाक्त।
2 मिनु पिपमी गिबोनी आन कली ब्रेश्शा, मेकोपुकी नु लोव़ पवा बाक्त। गिबोनी इस्राएली आन थर ङा मुर मबाक्मा बाक्त। मेकोपुकी एमोरी रे ब्रोंइशा लीशो बाक्मा बाक्त। इस्राएलीपुकीम मेको आन कली प्रोंइतीक कसम जशो बाक्मा बाक्त। मो हना यो सावलमी इस्राएल नु यहूदा आ पर्बम मेको आन कली क्याम्चा माल्शो बाक्माक्त। यहोसु ९:३,१५,१९
3 दाऊदमी गिबोनी आन कली “गो इन कली मार पङ? परमप्रभु यावे आ मुर आन कली आसीक गेचा कली गो दोपा गारपाइक्नुङा?” दे हिल्लो पवा बाक्त। ब्यवस्था ३२:९
4 मिनु गिबोनीपुकीमी “सावल आ खिं नु आंइ खिं ङा मुर आन दातेम सुन नु चांदीम गार पाइक्ने मचाम्सीब। इस्राएली का यो साइक्चा मगारनीकी” देंमा बाक्त। मिनु दाऊदम “मिनु मुल गोम इन कली मार पवल, दे मिम्नीनी?” देंमाक्त।
5 मिनु मेकोपुकीम पिप कली “सुम आंइ कली खतम पोक्गा, आंइ कली रागी रे क्याम्दा, मेको कली खतम पोक्चा कली आंइ गुइम गेने।
6 मेको आ ७ जना तौ चच आंइ कली गेने। मिनु गो मेको आन कली परमप्रभु यावे आ ङोंइती आ डांडा गिबोन सहरमी साइक्नीकी” देंमा बाक्त। मिनु पिपमी “गो मेको इन कली गेनुङ” देंमाक्त। ब्यवस्था २१:२२-२३
7 तन्न पिपमी परमप्रभु यावे आ नेंम नु सावल आ तौ योनाथन नु कसम जतीके सावल आ चच योनाथन आ तौ मेफी-बोशेथ कली प्रोंइशा वोदा बाक्त। १सामुएल २०:१५-१७;
8 पिपमी आइयाह आ तमी रिस्पाहम सावल रे जरमेशो तौ निक्शी आरमोनी नु मेफी-बोशेथ चाक्गा बाक्त। मिनु सावल आ तमी मेराबम मेहोला आ मुर बारजील्लाइ आ तौ अद्रीएल रे जरमेशो ५ जना तौ यो चाक्गा बाक्त। २सामुएल ३:७; १सामुएल १८:१९
9 मिनु मेको आन कली गिबोनी आन गुइमी गेमी बाक्त। मेकोपुकीम मेको आन कली परमप्रभु यावे आ ङोंइती सदमे बाक्त। मिनु मेको ७ जना कालेम बेक्मा बाक्त। मेकोपुकी क्योव़ज रिक्तीक आ ङोंइती ङा नाक्त साइक्चा पुंइसीमा बाक्त।
10 आइयाह आ तमी रिस्पाहम रोंगु तारी आंम कली बाक्तीक सेल्चा कली भाङग्रा ब्रवा बाक्त। मिनु क्योव़ज ओंइतीक आ ङोंइती ङा नाक्त रे रेउ यिचा सम्म मेकोमी आ तौ आन बेक्शो रां आन कली खाल पवा बाक्त। नाक्ती आन तार चिक्ब जुक्चा मगेथु, नाक्दो ब्वाकी ङा जन्तुम ब्वचा मगेमी बाक्त।
11 मिनु दाऊदमी सावल आ नोले चाक्शो मीश आइयाह आ तमी रिस्पाह आ पशो नेंशा,
12 मेकोमी सावल नु आ तौ योनाथन आस रुश याबेश-गिलाद ङा मुर आन गुइ रे चाक्गा बाक्त। मेकोपुकीम सावल नु योनाथन आस बेक्शो रां बेथ-शान सहर ङा चोक रे लदमे बाक्त। पलिस्तीपुकीमी मेको आस कली गिल्बोआम साइश्शा, नोले मेकेर क्युक्शो बाक्मा बाक्त। १सामुएल ३१:१२
13 मेकोम मेकेर रे सावल नु योनाथन आस रुश चाक्गा बाक्त। मिनु मेको रिस्पाह आ तौ आन रुश यो खुप्तमे बाक्त।
14 मेकोपुकीम सावल नु आ तौ योनाथन आस रुश बेन्यामीन आ थर आन रागी ङा जेला सहर सावल आ आफ कीश आ तुरसुम थिम्मे बाक्त। पिपमी मेको आन कली मार मार देंमे, मेको पामे बाक्त। मेको नोले परमप्रभुम रागी आ पर्बम पुंइशो लोव़ नेना बाक्त। २सामुएल २४:२५
दाऊदम लडाइ ग्राशो
१इतिहास २०:४-८
15 पलिस्ती नु इस्राएली लडाइ पामे बाक्त। दाऊद आ मुर नु लडाइ पथ यिमाक्त। मिनु पलिस्ती नु लडाइ पामे बाक्त। मिनु दाऊद थाम्पा दमाक्त।
16 इश्बी-बेनोब रेफाइम आ बोल्यो लाइश्शो मुर का बाक्माक्त। मेको आ तूतीके सहे सां शेकेल कांसा के बाक्माक्त। मिनु नक या का यो पिम्सीशो बाक्माक्त। मेकोमी “दाऊद कली साइक्नुङ” देंमाक्त। शेकेल का ११.५ ग्राम बाक्ब। ३०० शेकेल ३ किलो आधा बाक्ब।
17 मेना सेरूयाह आ तौ अबीशै दाऊद कली वारच पाइक्थ जाक्शा, मेको पलिस्ती कली सदा बाक्त। मेना दाऊद आ लडाइ पाइबपुकीमी “मुल रे गे गो नु लडाइमी मगाक्कीन। मारदे हना गे इस्राएल ङा छेङछेङन ननी। मेको मकाप्ल” दे कसम जामे बाक्त। २सामुएल २३:१८; २सामुएल २२:२९
18 मिनु नोले लेंशा, गोब सहरम पलिस्तीपुकी नु लडाइ दुम्माक्त। मेना हुशा ङा मुर सिब्बेकैम साफ माइश्शो रेफाइ आ मुर कली सदा बाक्त। रेफा थम लाइश्शो रेफाइ माइश्शो मुर आन किकी पिपी बाक्शो बाक्त।
19 मिनु लेंशा गोब सहरम पलिस्तीपुकी नु अर्को लडाइ का दुम्माक्त। बेथलेहेम ङा यारे-ओरेगीम आ तौ एल्हानानम गाथ सहर ङा गित्त आ खिं ङा मुर गोल्याथ कली सदा बाक्त। मेको आ तूतीक आ बिड तोव़ प्रोव़ब आन प्रोव़तीक शी खोमो बाक्माक्त। १सामुएल १७:७
20 मिनु नोले लेंशा गाथ सहरम लडाइ दुम्माक्त। मेकेर यो ठेयब लाइश्शो मुर का बाक्माक्त। मेको आ गुइ नु खोइलीम ६, ६ ओटा अम्ला, नेल्ल पा २४ ओटा अम्ला पाइश्शो रेफाइ आन मुर बाक्माक्त।
21 मिनु मेकोम इस्राएली आन कली हिंच कोंइदा बाक्त। मिनु दाऊद आ लोक्ब शिमेइ आ तौ योनाथनमी मेको कली सदा बाक्त। १सामुएल १७:१०
22 मेको ४ जना मुर गाथम बाक्ब रेफाइ आन दाते ङा बाक्मा बाक्त। मेको नेल्ल दाऊद नु आ मुर आन गुइ रे बेक्मा बाक्त।