14
अब्सालोम कली लेश्शा चाक्शो
1 मिनु सेरूयाह आ तौ योआबम पिप आ थुंम अब्सालोम कली दाक्चा गोप्तु, दे तुइक्ता बाक्त।
2 मिनु योआबम मुर का कली तेकोहा सहरम सोइश्शा जोक्ब तुइक्ब मीश मुर का कली चाक्पाइक्मी बाक्त। योआबम मेको मीश मुर कली “रोंका पशो मीश मुर खोदेंशो पखु पावो। रोंका पतीक वा फेक्सो। पियाम तेल मख्रेक्सो। शुश नाक्त रे बेक्शो मुर आ पर्बम रोंका पशो मीश मुर खोदेंशो पखु पावो।
3 मिनु पिप आ बाक्तीक लशा, आं शेंशो लोव़ देंनो” दे मदा बाक्त। मिनु मार देंचा माल्बा, योआबम मेको कली शेंदा बाक्त।
4 मिनु तेकोहा सहर ङा मीश मुर पिप आ बाक्तीक जाक्शा, खप सम्म बाप्शा सेउ पवा बाक्त। मिनु ङाक्ना ङाक्न “पिप वारच पाइय्यीनी” देंमाक्त।
5 मिनु पिपमी मेको कली “इ कली मार श्येत दुम्मे?” दे मदा बाक्त। मिनु मेकोमी “गो वोंइश बेक्शो मीश मुर का नङ। आं वोंइश बेक्त।
6 मेको इन वाइल आ तौ निक्शी बाक्ताक्स। मेको निक्शी दिंमम राम्शी पाम्से बाक्त। मेको आस कली फ्राब सुइ मबाक्मा बाक्त। मिनु काम आ लोक्ब कली तुप्शा सदा बाक्त।
7 मुल आ थर ङा मुर नेल्लेमी, इन वाइलीम कली ‘आ लोक्ब साइक्ब कली आंइ गुइम गेने। मिनु गो मेको कली साइक्नीकी। मारदे हना आ लोक्ब कली साइक्तु। गो इ अङस ताइब सुइ मबाक्त हना यो, गो मेको कली साइक्नीक’ देंतेक्म। मेकोपुकीम मो पाम्तेक्म हना, आं लीशो मी यो काप्नीम। मिनु आं वोंइश आ नें नु चच युइ यो रागी रे क्याम्सीनीम” देंमाक्त। ब्यवस्था १९:११-१३
8 मिनु पिपमी मेको मीश मुर कली “इ खिं लावो। इ निसाफ गो कोव़नुङ” देंमाक्त।
9 मिनु मेको तेकोहा सहर ङा मीश मुरुमी पिप कली “आं प्रभु पिप, मेको दोस गो नु आं आफ आ खिं कली दुम्ल। पिप नु इन राज्य दोस मतवल” देंमाक्त।
10 मिनु पिपमी “मुल यो सुइम इ कली मारेइ देंतेक्म हना, मेको आन कली आं बाक्तीक चाक्को। मिनु मेकोपुकीम इ कली लेंशा श्येत मगेनीम” दे मदा बाक्त।
11 मिनु मेको मीश मुरुमी “पिप, गे परमप्रभु यावे, इन परमप्रभु कली मिम्शा गेय पने। मिनु हुश ख्राक्श पोक्चा नांइसेक्ल। मिनु आं तौ साइक्चा मपुंइसीब” देंमाक्त। मिनु पिपमी “परमप्रभु यावे ब्रोंइशो खोदेंशो पा इ तौ के चां का यो महेम्ब” देंमाक्त। गन्ती ३५:१९-२१
12 मिनु मेको मीश मुरुमी “आं प्रभु पिप, गो इन वाइलीममी मुल यो लोव़ का देंचा ताइक्नुङा कों?” देंमाक्त। मिनु पिपमी “देंनो” देंमाक्त।
13 मिनु मेको मीश मुरुमी “गे परमप्रभु आ मुर आन कली मारदे ओदेंशो पचा मिम्तीनी? गे मोदेंशो पाइतीनी हना, गे दोसी खोदेंशो दुम्नीनी। गे रागी रे ग्रुंइशा सोइश्शो मुर कली लेंशा जाक्चा गेने मबिस्सीनी।
14 गो नेल्ल बेक्चा माल्नय। गो खपीम क्युप्शा हुइक्ने मचाप्चा ङा ब्वाक्कु खोदेंशो बाक्नय। तन्न परमप्रभुमी मुर कली मखेरब। मेकोमी आ ङोंइती चाक्चा कली मिम्ना मिम्न बाक्ब। इजीकीएल १८:२३
15 गो, इन वाइलीम, एको लोव़ आं प्रभु पिप, इन कली देंथ जाक्ती। मारदे हना मुरपुकीम आं कली हिंच कोंइताक्यीमी। मिनु गो पिप नु लोव़ पाइनुङ। मेकोमी आ वाइलीम कली आ पुंइशो गेबा कों?
16 मिनु पिपमी आ गेय पाइब, आं लोव़ नेंशा, गो नु आं तौ आंस कली श्येत गेब मुर रे प्रोंइबा कों, देंती। मारदे हना मेको मुरपुकीमी आंस कली परमप्रभु आ गेशो रू रे क्याम्चा माल्तेक्म।
17 मिनु इन वाइलीम, आं प्रभु, आं पिप, आ लोव़म आं थुं नाइक्चा गेब। मारदे हना गे, आं प्रभु पिप, परमप्रभु आ स्वर्ग ङा गेय पाइब खोदेंशो बाक्नीनी। रिम्शो नु मरिम्शो तिल्ब बाक्नीनी। परमप्रभु यावे, इन परमप्रभु गे नु बाक्ब” देंमाक्त। २सामुएल १९:२८; १सामुएल २९:९
18 मिनु पिपमी मेको मीश मुर कली “आं ङोंइती मारेइ लोव़ मख्रुइक्तो, इ कली लोव़ का हिल्लो पाइक्नुङ” देंमाक्त। मिनु मीश मुरुमी “आं प्रभु पिप, देंनीन” देंमाक्त।
19 मिनु पिपमी “मार, एको नेल्ल योआब आ देंशो बाक्मे?” देंमाक्त। मिनु मेको मीश मुरुमी “इन ब्रोंइशा बाक्शो खोदेंशो पा, आं प्रभु पिप, गे मारेइ लोव़ हिल्लो पनीनु, लोव़ लेप्ब के ग्युरा पेरा लतीक मबाक्ब। मारदे हना इन गेय पाइब योआबम आं कली मोदेंशो लोव़ पचा शेंशा सोइक्ताक्यी।
20 योआबमी इन थुं ङा मिम्शो गेय फाइक्चा कली मोदेंशो पपाइक्ती। तन्न गे, आं प्रभु, परमप्रभु आ स्वर्ग ङा गेय पाइब खोदेंशो पा रुप्तीक थुं पाइश्शो बाक्नीनी। रागीम मार दुम्शो बाक्बा, मेको नेल्ल तुइक्नीनी” देंमाक्त। २सामुएल १४:१७
21 मिनु पिपमी योआब कली “दुम्ब, गो एको लोव़ बिस्साक्यी। लशा, मेको ठिटा अब्सालोम कली लेश्शा चाक्कीन” देंमाक्त।
22 मिनु योआबमी आ कुल खप सम्म बाप्शा, सेउ पवा बाक्त। मेकोमी पिप कली “परमप्रभु यावेमी इन कली आसीक गेवल। मुलाक्ती गो आं प्रभु, पिप इन ङोंइती शिशी ताता, दे तुइक्ताक्ङ। मारदे हना गे आं पुंइशो गेतीनी” देंमाक्त।
23 मिनु योआब रीब पा गेशुर लशा, अब्सालोम कली यरूसलेमम चाक्गा बाक्त। २सामुएल १३:३७
24 तन्न पिपमी “मेको आ खिंमीन बाक्ल। आं ङोंइती जाक्चा मदुम्ब” देंमाक्त। मोपतीके अब्सालोम आ खिंमीन बाक्शा, पिप आ ङोंइती मजाक्माक्त।
25 इस्राएल नेल्लेमी अब्सालोम खोदेंशो दारशो सुइ मबाक्मा बाक्त। आ पिया रे खोइल सम्म मेको के मारेइ मरिम्शो मदुम्शो मबाक्माक्त।
26 मेकोम बर्स बर्सम आ चां ख्रोइक्बाक्माक्त। मारदे हना हेल्बाक्माक्त। मिनु मेको आ चां पिप आ नाक्तीकेम नाक्शोनु, सहे निक्शी शेकेल ङा दुम्बाक्त। २०० शेकेल २ किलो ३०० ग्राम खोदेंशो बाक्ब।
27 अब्सालोम के तौ सां नु तमी का बाक्मा बाक्त। आ तमी आ नें तामार बाक्माक्त। मेको थाम्पा दारशो मीश मुर बाक्माक्त।
28 मिनु अब्सालोम बर्स निक्शी सम्म यरूसलेमम बाक्माक्त। मेको पिप आ ङोंइती मजाक्थु बाक्माक्त।
29 मिनु अब्सालोममी पिप कली ग्रुम्चा कली योआब कली लोव़ सोइक्ता बाक्त। तन्न योआब जाक्ने मबिस्से बाक्त। लेंशा ब्रथ सोइक्तानु यो, जाक्ने मबिस्से बाक्त।
30 मिनु अब्सालोमम आ गेय पाइब आन कली “योआब आ रू का आं रू आ नेक्था बाक्ब। मेको के क्योव़ज वाशो बाक्ब, दे गे तुइक्नीनी। मेकेर मी सुइक्तीन” दे माइक्मी बाक्त। मोपतीके अब्सालोम आ गेय पाइबपुकीम मेकेर मी सुइक्तमे बाक्त।
31 मिनु योआब रीब पा अब्सालोम आ खिं लशा, मेको कली “मारदे इन गेय पाइबपुकीम आं रूम मी सुइक्तमे?” दे हिल्लो पवा बाक्त।
32 मिनु अब्सालोममी योआब कली “गो इन कली ब्रथ सोइक्ताक्ङ। गे आं पर्बम पिप कली लोव़ लाइक्नीनी कों, दे मिम्ताक्ङ। गे पिप कली ‘गो मारदे गेशुर रे जाक्चा माल्ङा? गो मेक उइ बाक्शो नङ हना, रिम्शो दुम वा’ देंचा कली ब्रेत्थ सोइक्ताक्ङ। गो पिप आ ङोंइती लचा तङल। गो मारेइ मरिम्शो पशो बाक्ती हना, दोस ताइब बाक्ती हना, साइय्यील” देंमाक्त।
33 मिनु नोले योआब पिप आ बाक्तीक लशा, अब्सालोम आ लोव़ नेंपदा बाक्त। मिनु पिपमी अब्सालोम कली ब्रेत्थ सोइक्ता बाक्त। मिनु मेको पिप आ ङोंइती जाक्शा खप सम्म बाप्शा, सेउ पवा बाक्त। मिनु पिपमी अब्सालोम कली पुक्पु पदा बाक्त।