31
सावल नु योनाथन बेक्शो
१इतिहास १०:१-१२
1 पलिस्ती नु इस्राएली लडाइ पामे बाक्त। मिनु इस्राएली पलिस्ती आन क्येङा ब्रुशा प्रोक्मा बाक्त। शुश इस्राएली गिल्बोआ डांडाम साइक्चा पुंइसमा बाक्त।
2 पलिस्तीपुकीम सावल नु आ तौ आन कली साप्पा खेदा पामे बाक्त। मिनु सावल आ तौ सां योनाथन, अबीनादाब नु माल्कीशुआ आन कली सदमे बाक्त।
3 लडाइम सावलमी थाम्पा श्येत जवा बाक्त। मारदे हना लिब्रा आप्बम मेको कली ख्रपाइश्शा गार सेल्मे बाक्त।
4 मिनु मेकोम आ या कुरब कली “इ तरवार शोइश्शा आं कली साइय्यी। मिनु मेको ख्रोइक्तीक चिनु मख्रोइश्शोपुकीम आं कली शुक्शी पचा मतामेक्ल” देंमाक्त। तन्न मेको या कुरब हिंशा, मबिस्से बाक्त। मेको नोले सावलमी आ तरवार शोइश्शा आंमा थोक्सीशा बेक्माक्त। न्यायाधीस ९:५४
5 मिनु मेको या कुरबमी सावल बेक्शो तशा, मेको यो आ तरवारम थोक्सीशा मेको नु बेक्माक्त।
6 मोपा सावल, आ तौ सांफा, आ या कुरब नु लडाइ पाइब नेल्ल काबुमीन बेक्मा बाक्त।
7 बेंसी नु यर्दन आइक्ची हांबुम बाक्ब इस्राएलीपुकीम लडाइ पाइब इस्राएली प्रोक्शो नु सावल नु आ तौ नेल्ल बेक्शो नेंन्मे बाक्त। मोपतीके मेकोपुकी आंम आंम सहर प्रोंइशा प्रोक्मा बाक्त। मिनु पलिस्ती जाक्शा मेको सहर आन के सेल्मे बाक्त।
8 आ दीसा पलिस्तीपुकी बेक्शो आन मार मार रोइक्चा कली जाक्मा बाक्त। मिनु मेकोपुकीम गिल्बोआ डांडाम सावल नु आ तौपुकी बेक्शो थित्मे बाक्त।
9 मिनु मेकोपुकीम सावल आ पिया ख्रोदमे बाक्त। मिनु आ यापुकी लदमे बाक्त। मेको नोले मेकोपुकीम मेको रिम्शो लोव़ रागी ङा तेइ तेइ नु देवी देवता नेल्ल आन कली नेंपाइक्चा, दे मुर सोइक्तमे बाक्त।
10 मेकोपुकीम सावल आ यापुकी अश्तारोथ माइश्शो मूर्ति पाइश्शो थाम आ खिंमी वोदमे बाक्त। मिनु मेको आ बेक्शो रां बेथ-शान ङा गारोम किला थोक्शा क्युक्शा वोदमे बाक्त। ब्यवस्था २१:२२-२३
11 पलिस्तीपुकीम सावल आ बेक्शो रां कली मार पामे, मेको याबेश-गिलाद ङा मुरपुकीम नेंन्मे बाक्त। १सामुएल ११:१-११
12 मिनु मेको आन बोल्यो मुरपुकी नेल्ल नाक्दो रे गाक्शा, सावल नु आ तौ आन बेक्शो रां बेथ-शान ङा गारो रे शोल्शा, याबेशम चाक्गमे बाक्त। मिनु मेको आन कली थिम्मे बाक्त।
13 मिनु नोले आन रुश याबेश ङा ठेयब रवा आ पुंमी थिम्मे बाक्त। मिनु मेकोपुकी ७ नाक्त सम्म माइजा बाक्मा बाक्त। २सामुएल १:१२