24
दाऊद एन-गेदी ङा पुक्खीम बाक्शो
1 मिनु सावल पलिस्ती आन कली खेदा पा लेम्मेनु, मुरपुकीमी मेको कली “दाऊद एन-गेदी ङा गोरशो रागीम बाक्ब” दे लोव़ पामे बाक्त। यहोसु १५:६२
2 मिनु सावलमी इस्राएल रे योव़शो हजार सां मुर लाइश्शा, दाऊद कली रोकोश आन रोंग गे मला बाक्त।
3 मेको लांमी भेडा योव़बपुकी बाक्मा बाक्त। मेको आ नेक्था पुक्खी का यो बाक्माक्त। मिनु सावल मेको आगा ङाइक्चा कली ओव़माक्त। मेको पुक्खी आ नेल्ल क्येङा आगाम दाऊद नु आ मुरपुकी ख्रुइश्शा बाक्शो बाक्मा बाक्त।
4 मिनु दाऊद आ मुरपुकीम “परमप्रभु यावेम देंशो खोदेंशो पा इन जोरी सत्रु कली इन गुइमी गेतीक नाक्त मुलाक्त बाक्ब। एको कली मार पचा दाक्नीनी मेको पने चाप्नीनी” देंमा बाक्त। मिनु दाऊद सिक्सी पा लशा, सावल आ वा आ सुर का रिक्गा बाक्त। भजन संग्रह १४२:१
5 मोपा रिक्गा नोले “ला गो पिप आ वा रिक्ता” दे इच्का हिंमाक्त।
6 मिनु दाऊदम आ मुर आन कली “गो आं ठेयब मुर, परमप्रभु यावेम तेल लुक्शो मुर कली मारेइ मपाइनुङ। गो मेको कली मसाइक्नुङ। मारदे हना मेको परमप्रभु यावे आ तेल लुक्शो मुर बाक्ब” देंमाक्त।
7 मोपा दाऊदम आ मुर आन कली हुइश्शा, सावल कली मारेइ पाइक्चा मगेमी बाक्त। मिनु सावल बोक्शा, पुक्खी रे आ लां खोदा बाक्त। १सामुएल १:३४
8 मेको नोले दाऊद यो पुक्खी रे लाङगा ग्रूमाक्त। मिनु सावल कली “आं प्रभु, आं पिप” दे ब्रेत्ता बाक्त। मिनु सावल आ नोले लेश्शा कोव़ङा बाक्त। मिनु दाऊद बाप्शा खुम्की पा सेउ पवा बाक्त।
9 मिनु दाऊदमी “गे मारदे आं पर्बम मुर आन लोव़ नेंनीनी? गो इन कली मरिम्शो पाइब, दे थमा सुइक्नीनी?
10 मुलाक्त गेन तुइक्ताक्नी। मुलाक्त पुक्खी आगाम परमप्रभु यावेमी इन कली आं गुइम गेशो बाक्त। का निक्शीम ‘इन कली साइक्चा’ थुं पाम्तेक्म। तन्न गो इन कली प्रोंइशा सोइक्ताक्ङ। मिनु गो ‘आं प्रभु, इन कली मसाइक्नुङ। मारदे हना मेको परमप्रभु यावे आ तेल लुक्शो मुर बाक्ब’ देंती।
11 कोव़ङीन, आं आफ एको आं गुइम बाक्शो वा कोव़ङीन। गो एको रिक्ता, तन्न इन कली मसदु। मोपतीके गे रुपीन। गो इन कली श्येत गेचा नु साइक्चा ममिम्तु। गो इन कली मारेइ पाप मपङ। मो हना यो गे आं कली साइक्चा दाक्नीनी।
12 परमप्रभु यावेम इस दातेम निसाफ पवल। मेकोमी आं पर्बम इन कली क्येक्क लेत्ताक्व हना यो, गो इन कली मारेइ मपाइनुङ।
13 साइ ङोंइती ङा लोव़मी ‘मरिम्शोमी मरिम्शोन जाक्ब’ देंशो बाक्ब। मो हना यो गो आं गुइ इन पर्बम मक्युक्नुङ। रोमी १२:१९; १ पत्रुस २:२३
14 इस्राएल ङा पिप सु का आ पर्बम बोक्शो बाक्बा? गे सु कली खेदा पना पन बाक्नीनी? बेक्शो कुचुम, चुक्बे का कली खेदा पाइनीनी?
15 परमप्रभु यावे निसाफ पाइब बाक्ब। मिनु मेकोमी इस दातेम निसाफ पवल। परमप्रभु यावेम कोव़ङल। आं परमप्रभु यावेम आं कली इन गुइ रे प्रोंइब” देंमाक्त।
16 मिनु दाऊद ब्वाक्ने थुमा नोले, सावलम “मार, मेको इ सेंदा बाक्ब, आं तौ दाऊद?” देंशा, ङाक्माक्त।
17 मिनु मेकोमी दाऊद कली “गे आं क्येङा ठीक पाइब मुर बाक्नेवे। गे आं कली रिम्शो पाप्तीवी। गो चहिं इ कली मरिम्शो पाता।
18 मुलाक्त गे आं कली रिम्शो पाप्तीवी। परमप्रभु यावेमी मुलाक्त आं कली इ गुइम गेप्तु। तन्न गे आं कली मसाइय्यी।
19 सुइमी आंम जोरी सत्रु आन कली थिश्शा, रिम्शो पा लचा मगेब। मोपतीके मुलाक्त इ पशो गेय आ पर्बम परमप्रभु यावेम इ कली इनाम गेवल।
20 मुल गो थमा पा तुइक्ताक्ङ गे पिप दुम्नेवे। इ पालाम इस्राएलम थम रिम्शो दुम्ब।
21 मोपतीके परमप्रभु यावे आ नेंम आं खिं ङा मुर आन कली, आं चच युइ आन कली खतम मपाइनुङ। आं नें आं आफ आ खिं रे मक्याम्नुङ, दे कसम जावो” देंमाक्त। १सामुएल २३:१७
22 मिनु दाऊदमी सावल नु कसम जवा बाक्त। मिनु सावल आ खिं लेम्माक्त। दाऊद नु आ मुरपुकी चहिं आन बोल्यो ख्रुइश्शा बाक्तीक पुक्खीम लेम्मा बाक्त।