8
सोलोमन आ अरु पतीके
१राजा ९:१०-२८
1 मिनु सोलोमनम परमप्रभु यावे आ खिं नु आ दरवार सेल्चा कली २० बर्स माल्दा बाक्त।
2 मिनु पिप हुरामम सोलोमन कली सहरपुकी गेवा बाक्त। मिनु सोलोमन मेको सहर आन कली लेंशा सेला बाक्त। मेकेर इस्राएल ङा मुर आन कली बाक्पाइक्मी बाक्त।
3 मिनु सोलोमन हमाथ-सोबा लशा, लडाइ पा मेको आ के सेला बाक्त।
4 मिनु गोरशो रागीमी तदमोर माइश्शो सहर सेला बाक्त। मिनु हमाथम यो मार मार वोइक्तीक सहरपुकी सेला बाक्त।
5 मेकोमी आइक्था ङा बेथ-होरोन नु आइदी ङा बेथ-होरोन यो सेला बाक्त। मिनु गारो हिरशो, ठेयब लाप्चो वोइश्शो नु आग्लो पाइश्शो बोल्यो सहर दुम्मा बाक्त।
6 मेकोमी बालाथ सहर नु सोलोमन आ मार मार वोइक्तीक सहरपुकी सेला बाक्त। मिनु बग्गी वोइक्तीक सहर नु शारा आन कली वोइक्तीक सहरपुकी सेला बाक्त। मेकोमी यरूसलेम, लेबानोनम नु आ राज्य नेल्लेमी आ दाक्शो खोदेंशो पा सहरपुकी सेला बाक्त।
7 हित्ती, एमोरी, परिज्जी, हिव्वी नु यबुसी इस्राएली मबाक्शो मुर,
8 आन चच युइ इस्राएल रागीम लीशो बाक्मा बाक्त। मारदे हना मेको आन कली मसाइक्थु, ब्रोंइचा गेशो बाक्मा बाक्त। मिनु सोलोमनम मेको आन कली वाइल सेल्शा, गेय पपदा बाक्त। मेको मुल सम्म मोदेंशोन बाक्नीम। यहोसु १६:१०
9 तन्न सोलोमनम इस्राएल ङा मुर रे मोदेंशो वाइल गेय पचा कली सुइ मलदा बाक्त। मेको आन कली लडाइ पाइब, आन ठेयब मुर, आ बग्गी चलेब नु शारा ङोइक्ब आन कप्तान सेल्मी बाक्त।
10 पिप सोलोमन के सहे निक्शी ५० जना अधिकार पाइश्शो मुर बाक्मा बाक्त। मेकोपुकी मुर आन कली कोव़ब बाक्मा बाक्त।
11 मिनु सोलोमनम फाराओ आ तमी कली दाऊद आ सहर रे मेको कली सेल्शो खिंम चाक्गा बाक्त। मारदे हना मेकोमी “आं मीश इस्राएल ङा पिप दाऊद आ खिंमी बाक्चा मदुम्ब। मारदे हना मेको परमप्रभु यावे आ कबल पशो सन्दोस बाक्शो, परमप्रभु आ बाक्तीक ला बाक्ब” देंमाक्त। १राजा ३:३
12 मिनु नोले सोलोमनम परमप्रभु यावे आ खिं ङा पिंडी आ ङोंइती वोइश्शो आ सेल्शो चढ़ेतीकेम परमप्रभु यावे कली चोशा चढ़ेतीके चढ़ेवा बाक्त। २इतिहास ४:१
13 मोसा आ अरेशो खोदेंशो पा नाइक्तीक नाक्ती, औंसी नाक्ती, बर्स ङा चाड सां बोरब ओख्ती मसुप्शो जिज शोब्ले जतीक चाड, ७ नाक्त ङा चाड नु गोठ सेल्शा बाक्तीक चाड मानेतीक नु नाक्त किंत किंत चढ़ेचा माल्शो चढ़ेतीक चढ़ेवा बाक्त। लेवी २३:-; गन्ती २८:२,४,११,१७,२६; गन्ती २९:१२
14 सोलोमन आ आफ दाऊदम ब्रेक्शो अरेशो लोव़ खोदेंशो पा, तेको चढ़ेबम गेना चढ़ेचा माल्बा, आन पालोम पतीक गेय नेल्ल देंशो बाक्माक्त। मिनु लेवीपुकीमी परमप्रभु यावे कली ठेयब सेल्तीक कुम्सो पचा कली नु चढ़ेब आन कली वारच पचा कली बाक्मा बाक्त। मिनु लाप्चो खाल पाइब आन कली आन हुल हुल पा योव़शा, तेको तेको लाप्चोम बाक्चा माल्दा मोपा वोइक्पाइश्शो बाक्माक्त। मारदे हना परमप्रभु आ मुर दाऊद मोदेंशो अरेशो बाक्त। १इतिहास २३:- १इतिहास २६:-
15 मिनु चढ़ेबपुकी नु लेवीपुकीम पिप आ अरेशो नेल्ल ठीक पा पामे बाक्त। मोपा मेकोपुकीमी शोंप वोइक्तीक कोठा यो कोव़ङमे बाक्त।
16 सोलोमनम परमप्रभु यावे आ खिं ङा जग दोवा रे नेल्ल मथुमा सम्म मोदेंशो दुम्माक्त।
17 मेको नोले सोलोमन ठेयब समुन्द्र आ नेक्था एदोम रागी ङा एस्योन-गेबेर नु एलोथ लमाक्त।
18 मिनु पिप हुराममी आ गेय पाइबपुकी, आ जहाजपुकी नु जहाज चलेब आन कली सोलोमन कली वारच पचा कली ठेयब समुन्द्रम सोइक्ता बाक्त। मेकोपुकी सोलोमन आ गेय पाइबपुकी नु ओफीर लशा, ४ सहे ५० टलेन्ट सुन ग्याप्शा चाक्शा, पिप सोलोमन कली गेमे बाक्त। टलेन्ट का ३४ किलो बाक्ब।