26
यहूदा ङा पिप उज्जीयाह
२राजा १४:२१-२२; २राजा १५:१-७
1 मिनु यहूदा ङा मुरपुकी नेल्लेम १६ बर्स दुम्शो अमस्याह आ तौ उज्जीयाह कली मेको आ आफ आ पा ङा पिप सेल्मे बाक्त।
2 मिनु अमस्याह बेक्म नोले उज्जीयाहमी एलोथ सहर लेंशा ताक्शा, यहूदा कली लेश्शा गेशा, रिम्शो सेला बाक्त।
3 उज्जीयाह पिप दुम्मेनु, मेको १६ बर्स दुम्शो बाक्माक्त। मेकोमी यरूसलेमम ५२ बर्स सासन पवा बाक्त। मेको आ ममा आ नें येकोल्याह बाक्माक्त। मेको यरूसलेम ङा बाक्माक्त।
4 मेकोमी आ आफ अमस्याह खोदेंशो पा परमप्रभु यावे आ ङोंइती मार ठीक बाक्मे, मेको पवा बाक्त। २इतिहास २५:२
5 मेना जकरिया पिप कली परमप्रभु यावे कली मान पा हिंचा आ पर्बम शेंब बाक्माक्त। मिनु पिपमी जकरिया आ पालाम परमप्रभु यावे आ नोले खोइक्ना खोइक्न बाक्माक्त। मोपा खोदा सम्म परमप्रभुम अमस्याह आ पशो नेल्ल रिम्शो दुम्पदा बाक्त।
6 मिनु मेको पलिस्ती नु लडाइ पचा कली लडाइ पतीकेम लमाक्त। मिनु मेकोमी गाथ, याब्नेह नु अश्दोद कली ग्राशा, गारो प्रेश्शा गेवा बाक्त। मिनु मेकोमी अश्दोद नु आ नेक्था पलिस्ती रागी आन दातेम अरु सहरपुकी सेला बाक्त।
7 परमप्रभुमी मेको कली पलिस्ती, गुर-बालम बाक्ब अराबीपुकी नु मेउनीपुकी नु लडाइ दुम्तीकेम वारच पदा बाक्त।
8 मिनु अम्मोनीपुकीमी उज्जीयाह कली आन गेचा माल्शो मार मार गेमे बाक्त। मिनु मेको आ सोशो बोशो लोव़ इजीप्त आ नेक्था सम्म जाक्दीम्माक्त। मारदे हना मेको शुश सक्ति पाइश्शो दुम्शो बाक्माक्त।
9 मेकोमी यरूसलेमम गारो ङा सुर ङा ठेयब लाप्चो, बेंसी ङा ठेयब लाप्चो नु गारो आ सुर हिरतीकेमी यो लाइश्शो खिंपुकी सेला बाक्त। मिनु मेको कली बोल्यो सेला बाक्त।
10 मेकोमी गोरशो रागीम अरु लाइश्शो खिंपुकी सेला बाक्त। मिनु मेकोमी शुश इनारपुकी दोपाइक्मी बाक्त। मारदे हना मेको के शेफेलाह नु दिंममी शुश बी ब्यफ बाक्मा बाक्त। मिनु मेको के पहाडम नु रिम्शो खप ङा दिंमम रू दोइब नु अङगुर रू कोव़ब मुरपुकी बाक्मा बाक्त। मारदे हना मेको खेतीपाती पचा दाक्ब मुर बाक्माक्त।
11 मेको प्रोंइशा, उज्जीयाह के बोल्यो लडाइ पाइब शुश बाक्मा बाक्त। मेकोपुकी गेना हना यो लडाइ पचा कली ठीक दुम्शा बाक्बाक्मा बाक्त। मिनु मेको लडाइ पाइब आन ब्रेक्ब यिएल नु पुक्ब मासेयाहम मेको आन कली हुल हुल सेल्शा, पिप आ कप्तान हनान्याहम देंशो खोदेंशो पा पाम्से बाक्त।
12 खिं खिं ङा बोल्यो सक्ति पाइश्शो लडाइ पाइब हजार निक्शी ६ सहे बाक्मा बाक्त।
13 मेको ठेयब मुर आन हुकुममी पिप कली आ जोरी सत्रु रे वारच पाइक्चा कली लाख सां ७ हजार ५ सहे बोल्यो लडाइ पाइब आन हुल का यो बाक्माक्त।
14 मिनु उज्जीयाहमी लडाइ पाइब नेल्ल आन कली तेक्तीके, तूतीक, फलाम के टोपी, कुचुम पांइतीके, लिब्रा नु हुरद आप्तीक फुल्लु ठीक पा गेवा बाक्त।
15 मेकोमी यरूसलेम ङा गारो ङा लाइश्शो खिं तारी नु सुरपुकीम जोक्ब मुर आन सेल्शो ब्रा आप्तीक नु ठेयब फुल्लु आप्तीक वोइक्पदा बाक्त। आ ठेयब दुम्तीके तेइ तेइ ब्रशो बाक्माक्त। मेको सक्ति पाइश्शो दुम्माक्त। मारदे हना परमप्रभुमी मेको कली छक लाक्चा ङा पा वारच पवा बाक्त। मेको आ पर्बम शुश लोव़ ब्रशो बाक्माक्त।
16 मोपा मेको सक्ति पाइश्शो दुम्तीके ठेयब लेश्शा, खतम दुम्माक्त। मेकोमी परमप्रभु यावे, आ परमप्रभु कली मटिथु, धूप चोतीकेम धूप चोचा कली परमप्रभु यावे आ खिं ओव़माक्त। २इतिहास २५:१९
17 तन्न चढ़ेब अजारयाह नु अरु परमप्रभु यावे कली चढ़ेब बोल्यो नु महिंब ८० जना मुरुमी मेको आ नोले खोदमे बाक्त।
18 मिनु पिप उज्जीयाह कली तेक्चा, दे “पिप उज्जीयाह परमप्रभु यावे कली धूप चोतीक गेय इन के ममाइ। एको गेय पचा कली जिम्मा गेशो हारून आ चच युइ चढ़ेब आन के बाक्ब। परमप्रभु यावे आ बाक्तीक रे ग्रूङीन। मारदे हना गे दूली पाइतीनी। मिनु मुल परमप्रभु यावेमी इन कली मारेइ मान मगेपाइक्ब” दे मदमे बाक्त। गन्ती १८:७; प्रस्थान ३०:७
19 मिनु गुइम थनौरो शेशा धूप चोचा कली ठीक दुम्शो पिप गाइक्ता बाक्त। मिनु मेको चढ़ेबपुकी नु गाइक्ना गाइक्नन आ कुप्फीम कोव़र ग्रूमाक्त। मेको नेल्ल चढ़ेब आन ङोंइती, परमप्रभु यावे आ खिं आगाम नु धूप चढ़ेतीक आ ङोंइती दुम्माक्त।
20 मिनु ठेयब चढ़ेब अजारयाह नु अरु चढ़ेबपुकीम मेको कली कोव़ना कोव़न मेको आ कुप्फीम कोर ग्रूशो तशा, मेको कली रीब पा परमप्रभु यावे आ खिं रे लाङगा ग्रुंइदमे बाक्त। मेको आंमा यो रीब पा लाङगा ग्रूचा माल्शो बाक्माक्त। मारदे हना परमप्रभु यावेम मेको कली मेको रोइमी आप्शो बाक्माक्त।
21 मिनु पिप उज्जीयाह आ बेक्ची नाक्त सम्मन कोव़री दुम्शा बाक्माक्त। मेको कोव़री दुम्शा खिं काम आ कान बाक्चा माल्दा बाक्त। मेको परमप्रभु यावे आ खिं रे तिल्चा पुंइसे बाक्त। मिनु मेको आ तौ योथाममी दरवार कली कोव़शा, मुर आन कली सासन पचा गोवा बाक्त। गन्ती ५:२
22 उज्जीयाह आ पशो नेल्ल ङोंइती रे नोले सम्म ङा गेय नेल्ल आमोज आ तौ परमप्रभु यावे आ लोव़ पाइब यसैयाम ब्रेक्शो बाक्ब। यसैया ६:१; यसैया १:१
23 मिनु उज्जीयाह बेक्माक्त। मिनु मेकोपुकीमी आ किकी पिपी आन कली थिम्तीके आ नेक्था ङा रू काम थिम्मे बाक्त। मारदे हना मुरपुकीम “कोव़री का बाक्ब” देंमा बाक्त। मिनु मेको आ पा ङा आ तौ योथाम पिप दुम्माक्त।