23
योआश यहूदा ङा पिप दुम्शो
1 मिनु ७ बर्सम येहो-यादा महिंब दुम्शा, सक्ति कोंइदा बाक्त। मेकोमी सहे सहे ङा लडाइ पाइब आन कप्तानपुकी, येरोहाम आ तौ अजारयाह, येहो-हानान आ तौ इश्माएल, ओबेद आ तौ अजारयाह, अदायाह आ तौ मासेयाह नु जिक्री आ तौ एली-शाफात नु सल्ला पवा बाक्त।
2 मिनु यहूदा ङा सहरपुकी रे लेवीपुकी नु इस्राएल ङा खिं खिं ङा ठेयब मुर आन कली यरूसलेमम ग्रुम्पाइक्चा कली यहूदा नेल्लेमी लोव़ सोइश्शा, मेकोपुकी जाक्मा बाक्त।
3 मिनु मेकेर जाक्ब खुम्सीशो नेल्लेमी परमप्रभु आ खिंम पिप आ तौ योआश नु कबल पामे बाक्त। मिनु येहो-यादाम मेको आन कली “परमप्रभु यावेमी दाऊद आ तौ चच आन पर्बम देंशो लोव़ खोदेंशो पा पिप आ तौ पिप दुम्चा माल्ब।
4 मुल गेपुकीम मार पचा माल्नीनी देंशा हना, नाइक्तीक नाक्ती गेय पाइब चढ़ेबपुकी नु लेवीपुकी भाग सांमी भाग का ठेयब लाप्चोमी बाक्कीन।
5 मिनु अर्को भाग का पिप आ दरवारम बाक्चा माल्नीम। अर्को भाग काम दरवार आ लाङगा ङा ठेयब लाप्चो खाल पने। मिनु अरु मुर नेल्ल परमप्रभु यावे आ लाङगाम बाक्चा माल्नीम।
6 चढ़ेबपुकी नु गेय पाइब लेवीपुकी ङा लाक्शा, अरु सुइ आन कली परमप्रभु यावे आ खिं ओव़चा मगेचा नम। मेकोपुकी ला ओव़ने चाप्नीम। मारदे हना मेकोपुकी परमप्रभु यावे आ ङोंइती ठीक सेल्शो बाक्नीम। मिनु अरु मुर नेल्लेम परमप्रभु यावे आ ब्रेक्शो अरेशो लोव़ टिशा पचा माल्नीम।
7 लेवीपुकी नेल्ले आन आन या शेशा, पिप आ एर ओंथ बाक्चा माल्नीम। सुइ परमप्रभु यावे आ खिं ओव़तेक्म हना, मेको कली साइक्चा माल्नीम। पिप ते लत हना यो, मेकोपुकी मेको नुन लचा माल्नीनी” दे माइक्मी बाक्त।
8 मिनु चढ़ेब येहो-यादाम देंशो खोदेंशो पा लेवीपुकी नु यहूदा ङा मुरपुकी नेल्लेमी पामे बाक्त। मेको नेल्लेम नाइक्तीक नाक्ती गेय पाइब आंम मुर आन कली नु गेय थुम्शा नाइश्शो आन कली चाक्गमे बाक्त। मारदे हना चढ़ेब यहोयादाम सुइ आन कली मप्रोंइशो बाक्माक्त।
9 मिनु चढ़ेब येहो-यादाम लडाइ पाइब आन कप्तान आन कली परमप्रभु आ खिंम बाक्शो दाऊद आ सेल्शो तूतीक नु आइक्च नु ठेयब तेक्तीकपुकी गेमी बाक्त।
10 मिनु मेकोमी मुर नेल्ल आन कली आन गुइ गुइमी या शेशा पिप कली खाल पचा कली वोइक्मी बाक्त। मेको आन कली दक्खिन रे उत्तर सम्म नु चढ़ेतीक आ एर ओंथ हिरशा खिं नेल्ल कली खाल पपाइश्शा वोइक्मी बाक्त।
11 मेको नोले येहो-यादाम पिप आ तौ कली लाङगा ग्रुंइदा बाक्त। मिनु मेको आ पियाम सिरपेच गुप्शा, पिप दुम्तीक कागज गेशा, यहोयादा नु आ तौपुकीम मेको कली पिप सेल्शा, तेल लुक्तमे बाक्त। मिनु मेकोपुकीम ठेयब सेंदा पा “पिप शुश ब्रोंइशा बाक्ल” दे ग्रीमा बाक्त।
12 मिनु अथाल्याहमी मुरपुकीमी आन पिप कली ठेयब सेल्शा शुश रेयके पशो नेना बाक्त। मिनु मेको परमप्रभु यावे आ खिं मुर आन बाक्तीकेम जाक्माक्त।
13 मिनु कोव़ङानु, पिप कली थाम आ नेक्था लाप्चोम राप्शा बाक्शो तवा बाक्त। मिनु कप्तानपुकी नु तुराही ताप्बपुकी पिप आ एर ओंथ बाक्शो बाक्मा बाक्त। मिनु मेको रागी ङा मुर नेल्ल पिप आ ङोंइती ग्येरशा, तुराही ताप्ना ताप्न बाक्शो बाक्मा बाक्त। मिनु कुम्सो पाइबपुकी ताप्तीक ताप्शा, मुर नेल्ल आन ङोंइती कुम्सो पना पन बाक्मा बाक्त। मिनु अथाल्याहमी आ वा खाक्शा, ठेयब सेंदा पा “गो नु रागी नेल्ल खतम! गो नु रागी नेल्ल खतम!” दे शुश गाइश्शा ग्रीमाक्त।
14 मिनु चढ़ेब येहो-यादाम लडाइ पाइब आन कप्तान आन कली “मेको कली मुर आन दाते रे ग्रुंइदीन। मेको आ नोले खोइक्ब नेल्ल आन कली तरवारम क्योरशा सतीन। मेको आन कली परमप्रभु यावे आ खिं आगाम मसतीन” दे अरेमी बाक्त।
15 मिनु मेकोपुकीम मेको कली ग्याइक्तमे बाक्त। मिनु पिप आ दरवार ङा शारा लाप्चोम लाइश्शा, सदमे बाक्त।
16 मेको नोले येहो-यादामी, मुर नेल्ल नु पिप कली परमप्रभु यावे आ मुर दुम्चा माल्ब, दे कबल पवा बाक्त। २इतिहास १५:१२
17 मिनु मुरपुकी नेल्ल बाल देवता आ खिं ओव़शा, प्रेत्मे बाक्त। मेको कली चढ़ेतीक नु आ मूर्ति नेल्ल फस पोक्गमे बाक्त। मिनु बाल कली चढ़ेब मत्तान कली चढ़ेतीक आन ङोंइती सदमे बाक्त।
18 मिनु येहो-यादामी “दाऊदमी देंशो खोदेंशो पा परमप्रभु यावे आ खिं कोव़चा कली लेवी आ थर ङा चढ़ेब आन कली जिम्मा गेमी बाक्त। ङोंइती दाऊदम मोसामी ब्रेक्शो परमप्रभु यावे आ अरेशो लोव़ खोदेंशो पा कुम्सो पन पन ग्येरना ग्येरन परमप्रभु यावे कली चोशा चढ़ेतीक चढ़ेचा माल्नीम” दे अरेशो बाक्माक्त। २इतिहास ७:६; २इतिहास २९:१५-३०
19 येहो-यादाम मारेइ पा ग्रांग्रा दिशो दुम्शो मुर आन कली ओव़चा मगेचा कली परमप्रभु यावे आ खिं ङा लाप्चोम खाल पाइबपुकी वोइक्पदा बाक्त।
20 मिनु मेकोमी कप्तानपुकी, ठेयब मुरपुकी, मुर आन कली हुकुम पाइबपुकी नु रागी ङा मुर नेल्ल आन कली लाइश्शा, पिप कली परमप्रभु यावे आ खिं रे पा आइक्था ङा लाप्चो रे ओव़शा, पिप आ दरवारम चाक्गा बाक्त। मिनु पिप कली पिप आ ठेयब नित्तीकेम निप्पदा बाक्त।
21 मिनु रागी ङा मुर नेल्ल ग्येरसमा बाक्त। मिनु अथाल्याह तरवारम क्योरशा साइक्चा पुंइसे नोले सहरमी थुं नाइश्शा बाक्तीक दुम्माक्त।