21
यहूदा ङा पिप येहोराम
१राजा २२:५१; २राजा ८:१६-२२
1 मिनु येहो-शाफात बेक्माक्त। मिनु मुरपुकीमी मेको आ किकी पिपी आन कली थिम्तीके दाऊद आ सहरम थिम्मे बाक्त। मिनु आ तौ येहोराम पिप दुम्माक्त।
2 येहो-शाफात आ तौपुकी, येहोराम नु आ लोक्बपुकी अजारयाह, येहीएल जकरिया, अजारयाह, मिकाएल नु शेफत्याह बाक्मा बाक्त। मेको नेल्ल यहूदा ङा पिप येहो-शाफात आ तौ बाक्मा बाक्त।
3 मेको आन आफोम मेको आन कली सुन, चांदी, शुश क्येट लाइब शोंप नु यहूदा ङा बोल्यो सहरपुकी यो गेशो बाक्माक्त। तन्न मेको राज्य येहोराम कली गेवा बाक्त। मारदे हना मेको आ ङोंइती थिशो तौ बाक्माक्त।
पिप येहोराम आ मरिम्शो पशो
4 मिनु येहोराम आ आफ आ पा ङा सासन पा बोल्यो दुम्शा, मेकोमी आ लोक्ब नेल्ल नु इस्राएल ङा का निक्शी ठेयब मुर आन कली तरवारम क्योरशा साइक्मी बाक्त।
5 येहोराम पिप दुम्मेनु, ३२ बर्स दुम्शो बाक्माक्त। मेकोमी यरूसलेम ८ बर्स सासन पवा बाक्त।
6 मेकोमी आहाब आ खिं ङा मुर खोदेंशो पा इस्राएल ङा पिप आन लांम गाक्माक्त। मारदे हना मेको आ मीश पिप आहाब आ तमी बाक्माक्त। मेकोमी परमप्रभु यावे आ ङोंइती मार मरिम्शो बाक्मे, मेको पवा बाक्त।
7 मो हना यो परमप्रभु यावेमी दाऊद नु पशो कबल आ पतीके दाऊद आ खिं ङा मुर आन कली साइक्चा मदाक्ता बाक्त। मारदे हना मेकोमी दाऊद नु आ तौ चच युइ आन कली “इ खिं रे गेना हना यो इस्राएली आन कली सासन पाइब का बाक्ब” देंशो बाक्माक्त। २सामुएल ७:१२; १राजा ११:३६; भजन संग्रह १३२:१७
8 मिनु येहोराममी सासन पवानु, एदोम ङा मुर यहूदा नु मदुथु, आंम आ राज्य सेल्शा, आंम पिप सेल्मे बाक्त।
9 मोपतीके येहोराम आ लडाइ पाइबपुकी, कप्तान नु आ बग्गी नेल्ल लाइश्शा, एदोम गे लमाक्त। मेकोपुकी नाक्दो बोक्शा, आंम कली, आ कप्तान नु आ बग्गी कली पुम्ब एदोमी नु लडाइ पा खेरमे बाक्त।
10 एदोम मुल सम्म यहूदा ङा सासन पाइब नु मदुशो बाक्ब। मेना लिब्ना यो येहोराम आ मरिम्शो सासन आ पर्बम बोक्माक्त। मारदे हना येहोरामम परमप्रभु यावे, आ किकी पिपी आन परमप्रभु कली प्रोंइशो बाक्माक्त।
11 मेकोमी यहूदा ङा पहाडमी डांडा ङा थानपुकी सेला बाक्त। मिनु मेकोमी यरूसलेमम बाक्ब मुर आन कली मूर्ति पूजा पा परमप्रभु कली प्रोंइपाइक्मी बाक्त। मिनु यहूदा कली दूली लांम गाक्पदा बाक्त।
12 मिनु येहोराममी परमप्रभु यावे आ लोव़ पाइब एलीया रे चिठी का तवा बाक्त। मिनु मेको चिठीमी “परमप्रभु यावेमी मार देंत देंशा हना, परमप्रभु यावे, इन किकी पिपी दाऊद आ परमप्रभुम ‘गे इ आफ येहो-शाफात नु यहूदा ङा पिप आसा खोदेंशो पा मेको आन लांम मगाक्ङे।
13 तन्न गे आहाब आ खिं ङा मुर खोदेंशो पा इस्राएल ङा पिप आ लांम गाक्शा, आहाबमी इस्राएली आन कली परमप्रभु प्रोंइपाइश्शो हेंथे गाक्शो खोदेंशो पा, गे यहूदा नु यरूसलेम ङा मुर आन कली मूर्ति पूजा पपाइश्शा, परमप्रभु कली प्रोंइपाइक्तीवी। मिनु इ आफ आ तौपुकी, इ लोक्ब आन कली यो साइक्तीवी। मेकोपुकी इं क्येङा रिम्शो मुर बाक्तेक्म।
14 मेको इ पतीके परमप्रभु यावेमी इ खिं ङा मुर, इ तौपुकी, इ मीशपुकी नु इ मुर नेल्ल आन कली मुर बेक्तीक रोइ पपाइक्नुङ।
15 मिनु गे मसाब कोव़ज ङा रोइ पाइनेवे। मिनु मेको रोइम पतीके इ कोव़ज राक्शा इ गा क्यी नाक्त किंत किंत ग्रूनीम’ देंशो बाक्ब” दे ब्रेक्शो बाक्माक्त।
16 मिनु मेको नोले परमप्रभु यावेमी येहोराम नु लडाइ पपाइक्चा कली पलिस्ती नु एथीयोपीया आ नेक्था बाक्ब अराबी आन कली क्युक्मी बाक्त।
17 मिनु मेकोपुकीम यहूदा कली लडाइ तोशा, आ आगा ओव़मा बाक्त। मिनु मेकोपुकीम पिप आ दरवारम थिश्शो शोंप नेल्ल, मेको आ तौपुकी नु मेको आ मीशपुकी नेल्ल लदमे बाक्त। मेको आ कान्छा तौ येहो-अहाज ङा लाक्शा अर्को तौ मलीमा बाक्त। येहो-अहाज कली अहाज्याह यो देंनीम।
18 मेको नेल्ल दुम नोले परमप्रभु यावेमी येहोराम कली मसाक्ब कोव़ज राक्तीक रोइ पपदा बाक्त।
19 मिनु मेको रोइ पा बर्स निक्शी नोले आ कोव़ज राक्शा, आ गा क्यी ग्रूशा, शुश श्येत जशा बेक्माक्त। मिनु मेको आ मुरपुकीम मेको आ किकी पिपी आन पर्बम पशो खोदेंशो पा मेको कली मान पचा कली ठेयब मी ममुइक्तमे बाक्त। २इतिहास १६:१४
20 मेको पिप दुम्मेनु, ३२ बर्स दुम्शो बाक्माक्त। मेकोमी यरूसलेमम ८ बर्स सासन पवा बाक्त। मेको बेक्मेनु सुइम रोंका मपामे बाक्त। मिनु मुरपुकीमी मेको कली दाऊद आ सहरमी थिम्मे बाक्त। तन्न पिप आन कली थिम्तीकेम मथिम्मे बाक्त। २इतिहास २४:२५