17
यहूदा ङा पिप येहो-शाफात
1 मिनु पिप आसा बेक्म नोले आ तौ येहो-शाफात पिप दुम्माक्त। मिनु मेकोमी “इस्राएल कली तेक्नुङ” दे आ लडाइ पाइब बोल्यो सेला बाक्त।
2 मेकोमी यहूदा ङा बोल्यो सेल्शो सहर नेल्लेमी लडाइ पाइबपुकी वोदा बाक्त। मिनु यहूदा नेल्ल नु आ आफ आसाम ग्राशो एफ्राइम ङा सहरपुकी यो खाल पचा कली लडाइ पाइब वोदा बाक्त।
3 मिनु परमप्रभु यावे येहो-शाफात नु बाक्माक्त। मारदे हना मेको आ किकी पिपी दाऊद आ ङोंइती ङा नाक्ती रिम्शो पा गाक्शो खोदेंशो पा गाक्माक्त। मेकोमी वारच पचा कली बाल देवता आन कली ममला बाक्त।
4 तन्न मेको परमप्रभु यावे, आ आफ आ परमप्रभु आ नोले खोदा बाक्त। मिनु मेको आ शेंशो पवा बाक्त। मेको इस्राएल ङा पिप आन लांम मगाक्माक्त।
5 मोपतीके परमप्रभु यावेम मेको आ राज्य बोल्यो सेला बाक्त। मिनु यहूदा ङा मुर नेल्लेमी येहो-शाफात कली मार मार चाक्गमे बाक्त। मिनु मेको शुश शोंप पाइश्शो नु मान ताइब दुम्माक्त। २इतिहास १८:१
6 मेकोमी परमप्रभु यावे आ लांम गाक्चा कली काइ महिंथु आ थुं बारपदा बाक्त। मेकोम यहूदाम बाक्शो डांडा ङा थान नु मूर्ति पाइश्शो थाम प्रेश्शा ताइक्ता बाक्त।
7 मेकोमी सासन पशो आ बर्स सांमी आ राज्य ङा ठेयब गेय पाइब बेन-हेल, ओबदिया, जकरिया, नेथनेल नु मीकाया आन कली यहूदा ङा सहरपुकीम मुर आन कली शेंचा कली सोइक्तीमी बाक्त।
8 मेकोपुकी नु लेवीपुकी बाक्मा बाक्त। मेको लेवीपुकी सु सु बाक्मा बाक्त देंशा हना, शेमायाह, नेथन्याह, जेबदीयाह, आसाहेल, शेमीरामोथ, येहो-नाथान, अदोनीयाह, तोबीयाह, तोबा-दोनीयाह बाक्मा बाक्त। मिनु मेको नु चढ़ेब एली-शामा नु येहोराम यो बाक्सा बाक्त।
9 मेकोपुकीम परमप्रभु यावे आ अरेतीक लोव़ ङा किताब मेको नु बाक्शो बाक्त। यहूदा ङा सहर नेल्ल ङा मुर आन कली शेंदमे बाक्त।
येहो-शाफात आ सक्ति
10 मिनु यहूदा आ एर ओंथ बाक्शो राज्य ङा मुर नेल्ल परमप्रभु यावे क्येङा हिंमा बाक्त। मोपतीके मेकोपुकीम येहो-शाफात नु लडाइ मपामे बाक्त।
11 पलिस्ती आन दातेमी का निक्शीमी येहो-शाफात कली आन गेचा माल्शो चांदी चाक्गमे बाक्त। मिनु अराबीपुकीमी यो मेको कली ७ हजार ७ सहे सांड नु ७ हजार ७ सहे बोका चाक्गमे बाक्त। १राजा ५:१
12 मिनु येहो-शाफात शुश सक्ति पाइश्शो दुम्माक्त। मेकोमी यहूदामी गारो हिरशा, बोल्यो दरवार नु मार मार वोइक्तीक सहरपुकी सेला बाक्त।
13 मेकोमी यहूदा ङा सहरपुकीम शुश सेल्तीक गेय यो पवा बाक्त। यरूसलेम सहरम लडाइ पाइब नु थम बोल्यो लडाइ पस जोक्ब मुर बाक्मा बाक्त।
14 मेको यहूदा ङा मुर आन खिं खिं ङा हजार हजार लडाइ पाइब आन कप्तान आदनाह बाक्माक्त। मेको नु लाख सां सक्ति पाइश्शो लडाइ पाइब बाक्मा बाक्त।
15 मेको आ नोले ङा येहो-हानान बाक्माक्त। मेको लाख निक्शी ८० हजार लडाइ पाइब आन कप्तान बाक्माक्त।
16 मेको आ नोले ङा जिक्री आ तौ अमासीयाह बाक्माक्त। मेको परमप्रभु यावे आ गेय पाइब कली कोव़ब यो बाक्माक्त। मेको लाख निक्शी सक्ति पाइश्शो लडाइ पाइब आन कप्तान बाक्माक्त।
17 बेन्यामीन आ थर ङा एली-आदा बोल्यो लडाइ पाइब बाक्माक्त। मेको नु लाख निक्शी लिब्रा आप्ब नु तेतीक कुरब बाक्मा बाक्त।
18 मिनु मेको आ नोले ङा येहो-जाबाद बाक्माक्त। मेको नु लाख का ८० हजार या कुरशो लडाइ पाइब बाक्मा बाक्त।
19 मिनु मेको नेल्ल पिप आ लडाइ पाइब बाक्मा बाक्त। मेको प्रोंइशा अरु लडाइ पाइबपुकी यो यहूदा ङा गारो हिरशो सहरम बाक्मा बाक्त।