8
परमप्रभुम आ रिम्स कोंइशो
कुम्सो पपाइक्ब कली गित्तीथ कुम्सो आ लायो ङा दाऊद आ कुम्सो।
1 परमप्रभु यावे, आंइ परमप्रभु, रागी नेल्लेमी इन नें ठेयब बाक्ब। गे इन छेङछेङ सरीङ क्येङा आइक्था वोइक्तीनी। प्रस्थान ३:१३-१५
2 आइक्च आल नु बुकलु आलपुकीमी इन कली ठेयब सेल्पांइसाक्नी। मोपा गे इन जोरी सत्रु नु क्येक्क लेप्ब आन कली ब्वालेइ पपाइक्तीनी। मत्ती २१:१६
3 गो सरीङ गे कोव़ङुनु, इन सेल्शो तास्ला नु सोरुल तातामी,
4 गे मोपा ठेयब थोव़क सेल्तीनी हना, मुर आन पर्बम दोपा मिम्ने चाप्नीनी? दोपा मेको आन कली कोव़नीनी। हिब्रू २:६-८
5 गे मुर आन कली इन स्वर्ग ङा गेय पाइब आन क्येङा इच्का ला आइक्च सेल्तीनी। मुर आन कली मान नु छेङछेङमी सिरपेच गुप्शो खोदेंशो पा ग्योम्ताक्नी। हिब्रू २:६-८
6 मिनु इन सेल्शो मारेइ मारेइ आन कली हुकुम पाइब सेल्तीनी। मोपा मुर इन सेल्शो आन दातेमी नेल्ल क्येङा ठेयब बाक्ब। उत्पत्ती १:२७
7 भेडा, बी ब्यफ, ब्वाकी ङा जन्तु,
8 चिक्ब, समुन्द्रमी बाक्ब ङांइ नु समुन्द्रमी मार मार बाक्मा, मेको नेल्ल आन कली हुकुम पाइब सेल्तीनी। १कोरिन्थी १५:२७
9 परमप्रभु यावे, आंइ परमप्रभु, रागी नेल्लेमी इन नें ठेयब बाक्ब।