78
परमप्रभुमी मार मार पवा
शेंतीक कुम्सो। आसाफ आ कुम्सो।
भजन संग्रह १०६:-
1 आं मुरपुकी, आं शेंशो लोव़ नेनीन। इन नोफा दाइश्शा आं लोव़ नेनीन।
2 गो कथा पा लोव़ शेंनुङ। साइ ङोंइती ङा लोव़ पाइनुङ। मत्ती १३:३५
3 एको लोव़ आंइ किकी पिपीमी आंइ कली नेंपाइश्शो नु तुइक्पाइश्शो बाक्नीम। प्रस्थान १३:१४; ब्यवस्था ४:९-१०
4 गोपुकी एको लोव़ मेको आन तौ चच आन क्येङा मख्रुइक्नय। मिनु नोले दुम्ब पाला ङा मुर आन कली यो परमप्रभु यावे आ ठेयब नु सक्ति पाइश्शो छक लाक्चा ङा गेय आ पर्बम शेंनीकी।
5 मेकोमी याकूब आ मुर आन कली दोपा बाक्चा माल्बा, मेको देंत। मेकोमी इस्राएलमी मेको आ अरेशो लोव़ वोइक्तु। मिनु परमप्रभुमी आंइ किकी पिपी आन कली “इन आल आन कली शेंदीने” दे माइक्तीमी।
6 मेको आन नोले ङा पाला ङा मुरपुकीमी एको लोव़ नेल्ल तुइक्तमेक्ल। मिनु मेको आन क्येङा नोले जरमेशो आल कोल्शा तुइश्शा, मेकोपुकीमी आन आल आन कली शेंदमेक्ल।
7 मोपा मेकोपुकीमी परमप्रभु कली थमा सुदमेक्ल। मिनु आ पशो मप्रेंदमेक्ल। मिनु आ शेंशो टीमेक्ल।
8 मेको आन किकी पिपी खोदेंशो मदुम्मल। मेकोपुकी खकटा थुं पाइश्शो नु मटीब पाला ङा मुर बाक्तेक्म। मेकोपुकी नोले शोंइसीशा, परमप्रभु कली प्रोंइतेक्म। ब्यवस्था ३२:५-६
9 एफ्राइम ङा मुरपुकी लिब्रा शेशा, ठीक दुम्शा, लडाइ दुम्मेनु, प्रोक्तेक्म। न्यायाधीस २:११-१३
10 मेकोपुकीमी परमप्रभु आ कबल पशो मटीम। मिनु मेको आ अरेशो लोव़ मटीम।
11 मेकोपुकीमी परमप्रभु आ गेय नु आन ङोंइती पशो छक लाक्चा ङा गेय प्रेंताक्म।
12 मेकोमी मेको आन किकी पिपी आन ङोंइती इजीप्त नु सोआन रागीमी छक लाक्चा ङा गेय पशो बाक्त।
13 मेकोमी समुन्द्र कली फ्राशा, लां सेल्तु। मिनु मेको लां रे पा मेको आन कली आइक्ची हांबु शोक्ताक्मी। मेकोमी ब्वाक्कु कली गारो खोदेंशो पा एर ओंथ राप्पाइक्तु। प्रस्थान १४:२१-२२
14 मेकोमी मेको आन कली नाक्त गोस्सुम नु नाक्दो मी आ हाम्सोमी लां कोंइताक्व। प्रस्थान १३:२१
15 मेकोमी गोरशो रागीमी सेरथे फुल्लु कली प्रोल्शा ब्वाक्कु बुक्पाइक्तु। मिनु शुश ब्वाक्कु तूचा गेम्तीमी। प्रस्थान १७:६; गन्ती २०:७-११; ब्यवस्था ३२:१८
16 सेरथे फुल्लु रे पा ब्वाक्कु बुक्पाइक्तु। मिनु खोला खोदेंशो पा शाइक्पाइक्तु।
17 तन्न मेकोपुकीमी गोरशो रागीमी नेल्ल क्येङा ठेयब कली मटिथु, मरिम्शो पा ङोंइती क्येङा शुश पाप पाम्तेक्म।
18 मेकोपुकीमी आन दाक्शो पा जचा थोव़क पुंइशा, परमप्रभु आ थुं नाक्ताक्म। प्रस्थान १६:३; गन्ती ११:४
19 मेकोपुकीमी थमा मसुइक्थु “मार, परमप्रभुम गोरशो रागीम जचा थोव़क गेने चाप्बा ङा?
20 मेकोमी सेरथे फुल्लु तुप्शा प्रोल्शा ब्वाक्कु बुक्पाइश्शा, शुश खोला सेल्तु। मार, मेकोमी आ मुर आन कली शोब्ले नु श्ये यो गेने चाप्बा ङा?” देंतेक्म।
21 मिनु परमप्रभु यावे मेको आन लोव़ नेंशा, थाम्पा गाइक्ताक्व। मिनु परमप्रभुमी याकूब कली दाक्पाइक्चा कली मी सोइक्ताक्व। मिनु इस्राएली आन पर्बम शुश चुरत। गन्ती ११:१
22 मारदे हना मेकोपुकीमी परमप्रभु कली थमा मसुदेम। मिनु “परमप्रभुमी आंइ कली प्रोंइने मचाप्ब” देंतेक्म।
23 मो हना यो मेकोमी सरीङ कली अरेशा सरीङ ङा लाप्चो रोक्पाइश्शा गेप्तु।
24 मेकोमी मुर आन कली थुल्चा कली सरीङ रे मन्ना यिपाइक्तु। मेको आन कली स्वर्ग ङा अन्न गेप्तु। प्रस्थान १६:४,१४,१५
25 मुर नेल्लेमी परमप्रभु आ स्वर्ग ङा गेय पाइब आन शोब्ले जाम्तेक्म। परमप्रभुमी मेको आन कली शुश जचा गेप्तु।
26 मेकोमी सरीङमी पूर्ब ङा फश सोइक्ताक्व। मिनु मेको आ सक्तिमी दक्खिन रे फश पपाइक्तु। गन्ती ११:३१-३३
27 मेकोमी फुरक खोदेंशो पा श्ये यिपाइक्तु। समुन्द्र ङा बाल्वा खोदेंशो पा चिक्ब यिपाइक्तु।
28 मेको चिक्ब आन कली आन बाक्तीके एर ओंथ दोक्पाइक्तु।
29 मिनु मेकोपुकी मेको ब्वशा रूतेक्म। मारदे हना परमप्रभुमी मेको आन कली आन पुंइशो खोदेंशो पा गेप्तु।
30 तन्न मेकोपुकीमी ब्वना ब्वन, आन ब्वशो श्ये आन शोव़म बाक्ना बाक्न,
31 परमप्रभु शुश गाइक्ताक्व। मिनु मेको आन दातेम नेल्ल क्येङा बोल्यो मुर आन कली साइक्तीमी। इस्राएल ङा ठिटा नेल्ल आन कली साइक्तीमी।
32 मो पा यो मेकोपुकीम पाप पस ङा पस बाक्तेक्म। मेको आ छक लाक्चा ङा गेय तशा यो, मेकोपुकीमी थमा मसुदेम।
33 मोपतीके परमप्रभुमी मेको आन नाक्त मोशा नु मेको आन बर्सपुकी श्येत जपाइश्शा साम्तु। गन्ती १४:२२-२३; १कोरिन्थी १०:५
34 परमप्रभुमी मेको आन दातेमी का निक्शी सदानु, मेको लीशोपुकी मेको गे लेश्शा, मेको कली थाम्पा माल्तेक्म।
35 मिनु मेकोपुकीमी परमप्रभु आन सेरथे फुल्लु नु नेल्ल क्येङा ठेयब परमप्रभु मेको आन कली श्येत रे प्रोंइब बाक्माक्त, दे तुइक्ताक्म।
36 तन्न मेकोपुकीमी आन शोव़म ला लोव़ पाम्तेक्म। मेकोपुकीमी जोल ला पाम्तेक्म।
37 आन थुंमी थमा पा मेको आ नोले मखोदेम। आ पशो कबल मटीमे।
38 मो हना यो परमप्रभु शिशी पाइब बाक्तीके मेको आन ठीक मपशो माफ गेम्तीमी। मेको आन कली मसद। खेयप खेयप मेको आन पर्बम आ गाइश्शो तेक्तु। मेकोमी आ गाइश्शो नेल्ल मग्रुंइद।
39 परमप्रभुमी “मेको मुर ला बाक्नीम। फश खोदेंशो पा लाक्नीम। मिनु लेश्शा मजाक्नीम” दे मिम्ताक्व। भजन संग्रह १०३:१४-१६
40 मेकोपुकीमी गोरशो रागीम शुश खेयप परमप्रभु कली मटीमे। परमप्रभु कली मुर मबाक्तीकेमी श्येत गेम्तेक्म।
41 मेकोपुकीमी लेंना लेंन आ थुं नाक्ताक्म। मिनु इस्राएली आन का ला बाक्शो परमप्रभु कली गाइक्पाइक्तेक्म।
42 मेकोपुकीमी आ सक्ति ममिम्तेम। मेको आन कली आन जोरी सत्रु रे प्रोंइशो यो ममिम्तेम।
43 परमप्रभुमी इजीप्तमी आ चिन्ड कोंइशा, सोआन रागीमी छक लाक्चा ङा गेय पची ना
44 खोला ङा ब्वाक्कु हुश सेल्शो बाक्त। मिनु इजीप्तीपुकीमी मेको ब्वाक्कु तूने मचबेम। प्रस्थान ७:१९-२०
45 मेकोमी मेको आन बाक्तीकेमी चुरमु बोपाइश्शो बाक्त। मिनु मेकोपुकीमी मेको आन कली क्राइक्तेक्म। मिनु परमप्रभुमी क्रुक्क्रु ग्रूपाइक्तु। मेकोपुकीमी मेको आन कली खतम सेल्तेक्म। प्रस्थान ८:२०; प्रस्थान ८:२
46 परमप्रभुमी मेको आन बाली नाली माले आन कली गेम्तीमी। मेको आन शुश गेय पा वापाइश्शो बाली नाली सल्हापुकीम नेक्पाइक्तु। प्रस्थान १०:१३
47 मेकोमी मेको आन अङगुर बोट मुप्सीमी नु आन फोव़शी फुरशेम खतम पोक्पाइक्तु। प्रस्थान ९:२५
48 मेकोमी मेको आन बी ब्यफ मुप्सीम नु क्यारश भेडा आन कली चिलामी आप्तु।
49 मेको आन पर्बम गाइश्शा, चुरशा, श्येत गेपाइक्चा कली खतम सेल्ब स्वर्ग ङा गेय पाइब आन कली सोइक्ताक्व।
50 मेकोमी आ गाइक्तीक कली लां का सेल्तु। मिनु मेको आन कली बेक्चा रे मप्रोन। मेको आन कली मुर बेक्तीक रोइ पपाइक्तीमी। प्रस्थान ९:८-१२
51 मेकोमी इजीप्त ङा मुर, हाम आ चच युइ आन ङोंइती जरमेशो तौ नेल्ल साइक्तु। प्रस्थान १२:२९
52 मिनु नोले आ मुर आन कली भेडा खोदेंशो पा ग्रुंइताक्व। मिनु मेको आन कली भेडा आन हुल खोदेंशो पा गोरशो रागीमी लां कोंइशा गाक्पाइक्तीमी। भजन संग्रह ७७:२१
53 मेकोमी मेको आन कली मारेइ श्येत मदुम्पाइक्थु गाक्पाइक्तीमी। मोपतीके मेकोपुकी काइ महिंम। आन जोरी सत्रु समुन्द्रम ग्रुम्शा बेक्तेक्म। प्रस्थान १४:१९,२२,२७
54 मोपा परमप्रभुमी आ मुर आन कली आ रागीमी चाक्तु। आ सक्तिमी ग्राशो डांडाम चाक्तु। प्रस्थान १५:१७
55 रागी रागी ङा मुर आन कली मेको आन ङोंइती रे खेरतु। मिनु इस्राएली आन कली मेको रागी योक्शा, गेम्तीमी। मिनु इस्राएल आ थर थर ङा मुर आन कली आन ताम्बुमी बाक्चा गेम्तीमी।
56 तन्न मेकोपुकीमी परमप्रभु आ थुं थाम्तेक्म। नेल्ल क्येङा ठेयब परमप्रभु कली मटीम। मिनु मेको आ अरेशो लोव़ मबिस्सम।
57 मेको आन किकी पिपी खोदेंशो पा नोले शोंइसाक्म। मिनु मेकोपुकी ब्रोइक्चशो लिब्रा खोदेंशो पा दूली पाइब दुम्तेक्म।
58 मेकोपुकीमी आन मूर्ति वोइश्शो डांडामी परमप्रभु कली गाइक्पाइक्तेक्म। मेको आन सेल्शो मूर्तिमी मेको कली गेहे पपाइक्तेक्म। ब्यवस्था ३२:२१
59 परमप्रभुमी मेको नेंशा, थाम्पा गाइक्ताक्व। मिनु इस्राएली आन कली थमा पा वारच मपाइक्थु प्रोंइतीमी।
60 मेकोमी शिलो ङा आ बाक्तीके प्रोंइतु। मेको ताम्बु मुर आन बाक्तीके आन दातेमी वोइश्शो बाक्त। १सामुएल १:३; १सामुएल ४:११; येरमीया ७:१२
61 मेकोमी आ कबल पशो सन्दोस आ जोरी सत्रु आन गुइमी गेप्तु। मोपा सक्ति पाइश्शो कली रोइक्पाइक्तु। भजन संग्रह १३२:८; १सामुएल ४:२१
62 मेकोमी आ मुर आन कली तरवारम साइक्पाइक्चा कली गेप्तु। मिनु आ योव़शो मुर आन कली तशा, थाम्पा गाइक्ताक्व।
63 मिनु मीम मेको आन ठिटा वोंइश मुर आन कली दाक्तीमी। मिनु आन तमी आन कली ग्युंबे पाइक्चा मतामे।
64 मेको आ चढ़ेबपुकी तरवारम क्योरचा पुंइसाक्म। मिनु मेको आन मीश रोंका पने मचबेम। १सामुएल ४:१७-२०
65 मिनु नोले परमप्रभु निन्द्रा रे सेंसीशो खोदेंशो पा सेंसाक्व। लडाइ पाइब मुर अङगुर शांबु तूशा नोले रिम्शो दुम्शो खोदेंशो पा, ठेयब सेंदाम ग्रीत।
66 मिनु मेकोमी आ जोरी सत्रु आन कली एर ओंथ ब्रपाइक्तु। मेकोमी मेको आन कली गेना हना यो मुने दोक्पाइक्तु। १सामुएल ५:६-१२
67 मेकोमी योसेफ आ थर ङा मुर आन कली प्रोंइतु। एफ्राइम आ खिं ङा मुर आन कली यो मयोव़ङ।
68 तन्न मेकोमी यहूदा आ खिं ङा मुर आन कली योव़तु। मेकोमी आ दाक्शो सियोन डांडा कली यो योव़तु। २इतिहास ६:६
69 मेकोमी आ बाक्तीके लाइक्पाइश्शा, इर स्वर्ग खोदेंशो सेल्तु। आ गेना हना यो कली सेल्शो रागी खोदेंशो पा सेल्तु।
70 मेकोमी आ गेय पाइब दाऊद कली भेडा गोठ रे योव़तु।
71 परमप्रभुमी दाऊद कली गिक्शो भेडा आन कली योव़तीक गेय रे ग्रुंइताक्व। मेकोमी दाऊद कली याकूब आ थर ङा, परमप्रभु आ मुर आन कली कोव़चा कली ग्रुंइताक्व। मेको इस्राएल ङा मुर परमप्रभु आ शोंप बाक्नीम। १सामुएल १६:११-१२; २सामुएल ७:८
72 दाऊदमी आ थुं ङा रिम्शो पतीकेमी मेको आन कली कोव़तीमी। मेकोमी जोक्ब तुइक्ब दुम्शा, मेको आन कली लां कोंइताक्मी।