73
“परमप्रभु, गो इन मुर नङ” देंशो
आसाफ आ कुम्सो।
1 परमप्रभु इस्राएल ङा मुर आन कली थमा पा रिम्शो पाइब बाक्ब। आन पाप क्याम्चा पुंइसीशा, रिम्शो थुं पाइश्शो आन कली रिम्शो पाइब बाक्ब। अय्युब २१:७
2 तन्न गो ग्रेक्शा, आं थेक्तीक साम्चा चिक्शो बाक्ती।
3 मारदे हना गो परमप्रभु आ अरेशो मटीब आन रिम्शो दुम्शो तशा नु मेको आन ठेयब लेश्शो तशा, गेहे पाता।
4 मेको आन कली श्येत मबाक्ब। मेकोपुकी रोइ मपशो नु बोल्यो बाक्नीम।
5 मेकोपुकी अरुपुकीम खोदेंशो पा श्येत मजाइनीम। मेकोपुकी अरु खोदेंशो पा श्येत मदुम्नीम।
6 मोपतीके ठेयब लेत्तीके मेको आन माला खोदेंशो दुम्ब। आन दिप्शा हुश ख्राक्श पोक्तीके आन फेक्तीक वा खोदेंशो दुम्ब।
7 मेको आन खकटा थुंम मरिम्शो पतीके बाक्ब। मेको आन थुं ङा मरिम्शो पतीके मिम्शा, मिम्ने मजाप्शो बाक्ब।
8 मेकोपुकीमी शुक्शी पा मरिम्शो लोव़ पाइनीम। मिनु आन ठेयब लेत्तीकेमी मुर आन कली हिंच कोंइनीम।
9 मेकोपुकीमी “स्वर्ग नेल्ल आंइ के बाक्ब” देंनीम। मिनु रागी नेल्ल आंम के सेल्नीम।
10 मोपतीके मुरपुकी मेको आन गे लेत्नीम। मिनु आन लोव़ थमा सुइश्शा आन नोले खोइश्शा मेको आन कली ठेयब सेल्नीम।
11 मिनु मेकोपुकीमी “परमप्रभुमी दोपा तुइक्बा ङा? मार मेको नेल्ल क्येङा ठेयब तुइक्ब बाक्बा ङा?” देंनीम। भजन संग्रह १०:११
12 परमप्रभु आ अरेशो मटीबपुकी मोदेंशो बाक्नीम। मेकोपुकी महिंथु, क्येट चेम्ना चेम्न बाक्नीम।
13 गो आयेसो ला रिम्शो थुं पाइश्शो दुम्ङा बाक्त। मिनु मोशा दोस मताइब दुम्ङा बाक्त। मलाकी ३:१४
14 गो नाक्त रे हिंचा ङा श्येत जाता। मिनु सुनी कुस कुस सजाइ ताता।
15 गो मेको आन खोदेंशो पाता हना, गो इन मुर आन कली मरिम्शो पदुमी वा।
16 गो एको नेल्ल रुप्चा माल्ता, आं कली थम श्येत दुम्त।
17 मिनु गो परमप्रभु आ खिं ओव़ती। मेना गो मेको आन कली नोले मार दुम्बा, मेको नेल्ल तुइक्ताक्ङ।
18 गे मेको आन कली थमा पा ग्रेक्तीके लांम गाक्पाइक्नीनी। गे मेको आन कली खतम पोक्नीनी।
19 मेको मतुइक्थु रीब पा खतम दुम्नीम। मेकोपुकी हिंतीकेमी योल्चा पुंइसीशो बाक्नीम।
20 दोपा मुरपुकी सुनी सेंसीमानु, ङोमु पशा, थमा ममाइ, दे तुइक्नीमी, मोपा परमप्रभु, गे बोक्ची ना मेको आन कली क्याम्नीनी।
21 ङोंइती आ थुं लुक्च लशा, कशो दुम्शो बाक्त।
22 गो ममिम्ब नु मारेइ मतुइक्ब बाक्ती। इन ङोंइती जन्तु खोदेंशो बाक्ती।
23 मो हना यो गो गेना हना यो गे नु काथा बाक्नुङ। गे आं ग्युरा गुइ ग्याइश्शो बाक्नीनी। रोमी ८:३५-३९
24 गे आं कली इन लोव़मी लां कोंइनीनी। मिनु नोले गे आं कली छेङछेङम ताक्नीनी। भजन संग्रह ४९:१६
25 स्वर्गम इन ङा लाक्शा, अरु आं के सु बाक्नीमी ङा? रागीमी यो आं माल्शो इन ङा लाक्शा अरु सुइ मबाक्नीम।
26 आं रां नु आं थुं निम्फा ग्येत्थ लुक्च दुम्शो बाक्नीस। तन्न परमप्रभु गेना हना यो आं सक्ति नु आं भाग बाक्ब। भजन संग्रह १६:५
27 इन क्येङा ङोन बाक्बपुकी थमा पा जाम्शा लाइनीम। गे इन क्येङा नोले शोंइसीशो नेल्ल आन कली खतम पोक्नीनी।
28 तन्न गो चहिं परमप्रभु आ नेक्था बाक्चा दाक्नुङ। परमप्रभु यावे आं प्रोक्शा लशा बाक्तीक बाक्ब। गो इन पशो गेय नेल्ल आन पर्बम लोव़ पाइनुङ।