62
परमप्रभुमी प्रोंइब, देंशो
कुम्सो पपाइक्ब येदुथून कली दाऊद आ कुम्सो।
1 आं थुंम सिक्सी पा परमप्रभु कली रिम्ब। मेकोमी आं कली प्रोंइब। यसैया ३०:१५
2 मेको ला आं सेरथे फुल्लु नु आं कली वारच पाइब बाक्ब। मेको आं बोल्यो दरवार बाक्ब। गो गेनायो महिम्सीनुङ। भजन संग्रह १८:३
3 गे नेल्लेमी मुर का कली गेना सम्म बाप्शा साइक्चा माल्नीनी? गे गोल्चा चिक्शो गारो नु ब्रेत्चा चिक्शो थरपु खोदेंशो मुर कली खोल्नीनी?
4 मेकोपुकीमी ठेयब मुर कली साइक्चा माल्शो बाक्नीम। मेकोपुकी जोल पतीकेमी ग्येरसीनीम। मिनु शोव़म आसीक गेखु पाइनीम। तन्न आन थुंमी चहिं सराप पाइनीम। ठेयब सेंदा पा।
5 आं थुंम सिक्सी पा परमप्रभु कली ला रिम्ब। मारदे हना गो मेको कली आस पाइनुङ।
6 मेको ला आं सेरथे फुल्लु नु आं कली वारच पाइब बाक्ब। मेको आं बोल्यो दरवार बाक्ब। गो महिम्सीनुङ।
7 आं कली श्येत रे प्रोंइतीके नु मान ततीके परमप्रभु रे जाक्ब। परमप्रभु आं ख्रुइक्तीक सेरथे फुल्लु नु आं बोल्यो दरवार बाक्ब।
8 मुर नेल्ले, गेना हना यो परमप्रभु कली थमा सुतीन। मेको आ ङोंइती इन थुं ङा लोव़ देंनीन। मारदे हना परमप्रभु इं ख्रुइक्तीके बाक्ब। ठेयब सेंदा पा।
9 महिक्सीशो मुरपुकी फश ला बाक्नीम। हिक्सीशो मुर आन ठेयब दुम्तीके जोल ला बाक्ब। मेकोपुकी नाक्सीमानु, मारेइ मबाक्नीम। हिक्सीशो नु महिक्सीशो मुर नेल्ल मुठी का सोक्त ङा ला बाक्नीम।
10 मुर आन कली दिप्शा “रिम्शो दुम्नुङ” दे ममिम्तीन। खुइ पशो मार मार तशा, ठेयब मलेतीन। इन शोंप शुश दुम्त हना यो, मेको कली थमा मसुतीन। मत्ती १९:२२; लूका १२:१५-२१; १तिमोथी ६:९,१७
11 परमप्रभुमी लोव़ पाप्तु। गो लोव़ निक्शी नेंता “परमप्रभु के सक्ति बाक्ब।
12 परमप्रभु यावे गेना हना यो दाक्ब बाक्ब” देंशो नेंता। गे थमा पा मुर नेल्ल आन कली आन पशो खोदेंशो पा गेनीनी। रोमी २:६-११