50
परमप्रभु रिम्शो निसाफ पाइब
आसाफ आ कुम्सो।
1 ठेयब सक्ति पाइश्शो, परमप्रभु, परमप्रभु यावेमी लोव़ पाप्तु। नां दाप्तीक रे नां पेरतीक सम्म ङा रागी कली लोव़ पाप्तु। १इतिहास २५:१
2 परमप्रभु सियोन रे आ दारसम ग्योम्सीशा छेङछेङ दुम्शा, ग्रूशो बाक्ब। यसैया ६२:१
3 आंइ परमप्रभु जाक्शा, सिक्सी पा मबाक्ब। मेको आ ङोंइती ग्राव ग्रु दाक्ब मी ब्राइब। मिनु आ एर ओंथ नेल्ले कुमीर गिमीर पा फश गिवार पाइब।
4 मेकोमी आ मुर आन कली निसाफ पचा कली सरीङ नु रागी ङा नेल्ल आन कली ब्रेप्ब। ब्यवस्था ३२:१; यसैया १:२
5 परमप्रभुमी “आं कली थमा सुइक्ब आन कली खुप्तीन। मेकोपुकीमी मार मार क्योरशा चढ़ेशा, गो नु कबल पाम्तेक्म” देंब। प्रस्थान २४:४-११
6 मिनु स्वर्गम बाक्बपुकीमी “एको ठीक पाइब बाक्ब। मारदे हना परमप्रभुमी एको मुर आन कली निसाफ पाइब” देंनीम। ठेयब सेंदा पा।
7 मिनु परमप्रभुमी “आं मुरपुकी, नेनीन। गो इन कली लोव़ पाइनुङ। गो इस्राएली इन कली दोस गेशा, लोव़ पाइनुङ। गो परमप्रभु, इन परमप्रभु नङ। प्रस्थान २०:२
8 इन मार मार चढ़ेशो आ पर्बम गो इन कली दोस मगेनुङ। इन चोशा चढ़ेशो गेना हना यो आं ङोंइती बाक्नीम। भजन संग्रह ४०:७; १सामुएल १५:२२; यसैया १:११
9 गो इन खिं ङा ब्यफ नु इन गोठ ङा बोकापुकी ममाल्नुङ।
10 मारदे हना ब्वाकी ङा जन्तु नेल्ल नु हजार हजार डांडा ङा बी ब्यफ नेल्ल आं केन नम।
11 मिनु गो सरीङ ङा चिक्ब नेल्ल आन कली तुइक्नुङ। मिनु रागी ङा सोक्त पाइश्शो नेल्ल आं केन नम।
12 गो शोव़लु बाक्शो नङ हना यो, इन कली मदेंङ वा। मारदे हना रागी नु रागीम बाक्शो मारेइ मारेइ आं केन नम।
13 मार, गो ब्यफ आन श्ये ब्वाइनुङा ङा? बोका आन हुश तूनुङा ङा?
14 गे आं कली ‘गे रिम्शो पाइब बाक्नीनी’ देनीन। मिनु नेल्ल क्येङा ठेयब, आं कली इन कसम जशो खपीन। योना २:१०
15 मिनु श्येत जनी नाक्त आं कली पुनीन। मिनु गो इन कली श्येत रे प्रोंइनन्नी। मिनु आं कली ‘गे ठेयब बाक्नीनी’ देंनीनी” देंत। भजन संग्रह ९१:१५
16 तन्न परमप्रभुमी आ अरेशो मटीब आन कली “आं फुल्लुम मुशा ब्रेक्शो लोव़ मारदे पढेनी? आं कबल आ पर्बम मारदे लोव़ पनी? रोमी २:२१-२३
17 गे आं शेंशो लोव़ ग्रांग्रा दीतीनी। मिनु आं लोव़ प्रोंइतीनी।
18 गे खुइ आन कली ग्रुम्नीनु, खुइ आन वारच दुम्तीनी। मिनु गे खुइ नु हेंथे गाक्ब नु गारतीनी।
19 गे मरिम्शो लोव़ पाइब नु जोल पाइब बाक्नीनी।
20 मिनु गे इन लोक्ब आन कली दोस गेशा बाक्नीनी। मिनु क्यी का रे जरमेशो इन लोक्ब आन कली शुक्शी पाइनीनी। उत्पत्ती २:२१
21 गे मेको नेल्ल पाइतीनी हना यो, गो सिक्सी पा बाक्ती। गे आं खोदेंशो मिम्साक्नी। तन्न गो इन कली हुइश्शा, इन दोस कोंइनन्नी।
22 गे परमप्रभु कली प्रेंबपुकी तुइक्तीन। मो मपाइतीनी हना, गो इन कली साइक्नन्नी। मिनु इन कली सुइमी प्रोंइने मचाप्नीम।
23 सु सुमी ‘गे रिम्शो पाइब बाक्नीनी’ देंनीमी, मेकोपुकीमी आं कली ठेयब सेल्नीम। मिनु गो मेको आन कली लां सेल्नुङ। गो मेको आन कली आं पाप रे प्रोंइतीके कोंइनुङमी” दे परमप्रभुमी देंत।