46
परमप्रभु आंइ नेक्था बाक्ब
कुम्सो पपाइक्ब कली अलामोथ कुम्सो आ लायो। कोराह आ तौ आन कुम्सो।
1 परमप्रभु आंइ ख्रुइश्शा बाक्तीके नु आंइ सक्ति बाक्ब। गो श्येत जकानु, गेना हना यो आंइ नेक्था बाक्शा वारच पाइब बाक्ब।
2 मोपतीके गो महिंनीकी। रागी नु डांडापुकी हिम्सीशा समुन्द्रम ग्रुम्तेक्म हना यो गो महिंनीकी।
3 मिनु समुन्द्र ग्रीशा, बोग्यो पोक्तु हना यो नु ब्रुइश्शा कुशा, डांडापुकी हिम्ताक्व हना यो गो महिंनीकी। ठेयब सेंदा पा।
4 मिनु ठेयब खोला का बाक्ब। मेको रे पा ब्राशो आइक्च खोलापुकीमी परमप्रभु आ बाक्तीके सहर कली ग्येरपाइक्नीम। मेको नेल्ल क्येङा ठेयब आ बाक्तीके सहर बाक्त। यसैया १२:५
5 मिनु परमप्रभु मेको सहरम बाक्ब। मिनु मेको महिम्सीब। परमप्रभुमी मेको सहर कली नां सोव़म रेन वारच पाइब।
6 मिनु रागी रागी ङा मुरपुकी जिशा खेशा पाइनीम। राज्यपुकी क्याम्चा पुंइसीनीम। परमप्रभुमी आ सेंदा नेंपाइक्तु हना, रागी नेल्ल याइनीम।
7 मुर नेल्ल आन परमप्रभु यावे गोपुकी नु बाक्ब। याकूब आ परमप्रभु आंइ बोल्यो दरवार बाक्ब। ठेयब सेंदा पा।
8 परमप्रभु यावे आ ठेयब गेय कोव़थ जाक्कीन। मेकोमी रागी खतम पोक्शो कोव़ङीन। २राजा १९:३५
9 मेकोमी नेल्ल क्येङा ङोन रागी सम्म ङा लडाइ तेक्ब। मेकोमी लिब्रा जिक्शा नु तूतीक नेल्ल टुक्रा टुक्रा सेल्ब। तेक्तीके नेल्ल मीम हुम्ब। भजन संग्रह ७६:४
10 मेकोमी “सिक्सी पा बाक्कीन। गो परमप्रभु नङ, दे तुइक्तीन। गो रागी रागी ङा मुर आन दातेमी ठेयब दुम्नुङ। गो रागी नेल्लेमी नेल्ल क्येङा ठेयब दुम्नुङ” देंत।
11 मुर नेल्ल आन परमप्रभु यावे गोपुकी नु बाक्ब। याकूब आ परमप्रभु आंइ बोल्यो दरवार बाक्ब। ठेयब सेंदा पा।