31
परमप्रभु कली जिम्मा गेंसीशो
कुम्सो पपाइक्ब कली दाऊद आ कुम्सो।
1 परमप्रभु यावे गो इन कली जिम्मा गेसीनुङ। गो गेनायो मुने मदोक्ङल। इन ठीक पतीकेमी आं कली प्रोंइयीनी।
2 इन नोफा दाइक्तीने, आं कली रीब पा प्रोंइयीनी। गे आं ख्रुइक्तीक सेरथे फुल्लु नु आं कली प्रोंइब बोल्यो दरवार दुमीन। भजन संग्रह ७१:३
3 इन नें आ पर्बम आं कली शेंशा, लां कोंइदीनी। मारदे हना गे आं सेरथे फुल्लु नु आं बोल्यो दरवार बाक्नीनी।
4 मेकोपुकीमी आं कली मतचा ङा पा ब्वारद दाइक्ताक्म। आं कली प्रोंइयीनी। मारदे हना गे आं सक्ति बाक्नीनी।
5 आं सोक्त इन गुइमी जिम्मा गेनुङ। परमप्रभु यावे, गे आं कली श्येत रे प्रोंइतीनी। गे इन मुर आन कली दाक्शा मप्रोंइब परमप्रभु बाक्नीनी। लूका २३:४६
6 गो शोर गाक्शो मूर्ति आन कली सेउ पाइब आन कली ग्रांग्रा दित्नुङमी। गो परमप्रभु यावे इन कली जिम्मा गेसाक्यी।
7 इन गेना हना यो दाक्तीक तशा, ग्येरना ग्येरन बाक्ती। मारदे हना गे आं श्येत तशा, आं थुं लुक्च लशो तुइश्शो बाक्नीनी।
8 गे आं कली आं जोरी सत्रु आन गुइमी मगेनी। गे आं कली रिम्शो ठेयब बाक्तीकेमी बाक्पाइक्तीनी।
9 परमप्रभु यावे, आं कली शिशी पाइय्यीनी। मारदे हना गो श्येत जशो बाक्नुङ। आं थुं लुक्च दुम्तीके आं मिक्च ओव़शो नु आं रां सोव़शो बाक्ब।
10 आं थुं ग्येत्थ लुक्च लतीके, गो बेक्चा चिक्शो बाक्ती। हुकयी पतीकेमी आ ब्रोंइतीक नाक्ती योल्तेक्म। आं ठीक मपशोमी आं बोल नेल्ल ग्युम्शो बाक्ब। मिनु आं रुश नेल्ल मुक्शो बाक्नीम।
11 आं जोरी सत्रु आन क्येङा आं नेक्था ङा मुरपुकीमी शुश शुक्शी पाइक्चा पुंइसीब दुम्ती। आं तुइश्शो मुर आं कली तशा हिंनीम। आं कली लांम ग्रुम्ब मुरपुकी आं कली तशा हिंशा प्रोक्नीम।
12 बेक्शो मुर खोदेंशो पा सुइमी आं कली ममिम्नीम। गो ब्रोल्शो गर खोदेंशो दुम्ती।
13 गो ते लती हना यो हिंतीके ला बाक्ब। मारदे हना शुशेमी आं पर्बम जोल पा लोव़ पशो नेंता। मेकोपुकी बुक्शा, आं कली साइक्चा कली सल्ला पाम्तेक्म। येरमीया २०:३
14 तन्न परमप्रभु यावे, इन कली जिम्मा गेंसीशो बाक्नुङ। गो “गे आं परमप्रभु बाक्नीनी” देंती।
15 आं ब्रोंइतीक नाक्ती इन गुइमीन बाक्ब। आं जोरी सत्रु नु आं कली खेदा पाइबपुकी रे प्रोंइयीनी। भजन संग्रह १३९:१६; उपदेसक ३:१-८
16 इन छेङछेङ ङा कुल इन वाइल तारी वोतीन। इन शिशी पतीकेमी आं कली प्रोंइयीनी। भजन संग्रह ८०:४; गन्ती ६:२५
17 परमप्रभु यावे, गो मुने मदोक्ङल। मारदे हना गो इन कली “वारच पने” दे पुंइता। इन अरेशो मटीबपुकी मुने दोक्मल। मेकोपुकी बेक्शो मुर आन बाक्तीकेम सिक्सी पा बाक्मल।
18 ठेयब लेश्शो मुरपुकीम ठीक पाइब आन कली आइक्च सेल्शा, मरिम्शो पाइनीम। जोल पा लोव़ पाइनीम। मेको आन शोव़ ख्रेप्तीन।
19 गे इन कली मान पा हिंब आन कली गेना हना यो शुश दाक्नीनी। इन कली जिम्मा गेंसीब आन कली दाक्तीके मुर आन ङोंइती कोंइनीनी।
20 इन मुर आन कली मरिम्शो मुर आन क्येङा प्रोंइचा, दे इन बाक्तीकेमी ख्रुइक्नीनी। गे इन मुर आन कली मरिम्शो लोव़ पाइब आन क्येङा ख्रुइक्नीनी। भजन संग्रह २७:५
21 परमप्रभु यावे ठेयब बाक्ब। आं कली बोल्यो सहरम पुम्शो खोदेंशो पा आ छक लाक्चा ङा दाक्तीके कोंइताक्यी।
22 ङोंइती गो हिंशा “गे आं कली मताइनीनी” देंती हना यो “वारच पाइय्यीनी” दे आं पुंइशो लोव़ नेंतीनी।
23 परमप्रभु यावे आ मुर नेल्लेमी परमप्रभु कली दाक्तीन। परमप्रभु यावेमी आ कली थमा सुइक्ब आन कली कोव़ब। ठेयब लेश्शो आन कली आन क्येक्क लेप्ब।
24 परमप्रभु यावे आ लां कोव़शा रिम्बपुकी, सक्ति पाइश्शा, ठेयब थुं पाइश्शो दुमीन।