147
परमप्रभु कली ठेयब सेल्शो
1 परमप्रभु यावे कली ठेयब सेलीन। मारदे हना आंइ परमप्रभु कली ठेयब सेल्तीक कुम्सो पचा रिम्शो नु शिरशो बाक्ब। भजन संग्रह ९२:२
2 परमप्रभु यावेमी यरूसलेम कली सेल्ब। मेकोमी इस्राएल रे खेरशो ब्रशा बाक्शो मुर आन कली खुप्ब।
3 मेकोमी थुं जिक्शो आन कली सापाइक्ब। मिनु मेको आन कली वाम फ्रेंब। यसैया ६१:१
4 मेकोमी सोरुल आन कली हिक्शा, का का पा आन नें वोइक्ब। यसैया ४०:२६
5 आंइ परमप्रभु ठेयब बाक्ब। मेको आ सक्ति नेल्ल क्येङा ठेयब बाक्ब। आ रुप्तीक सक्ति सुइम तुइक्ने मचाप्नीम। लूका १:५२
6 परमप्रभु यावेम श्येत जाइब आन कली कोव़ब। तन्न आ अरेशो मटीब आन कली खपीम ताइक्ब।
7 गे परमप्रभु यावे कली ठेयब सेल्तीक कुम्सो पने। तार पाइश्शो ताप्तीके ताप्शा आंइ परमप्रभु कली कुम्सो पा ठेयब सेलीन।
8 मेकोमी सरीङ कली गोस्सुम सुम्पाइक्ब। रागी कली रेउ यिपाइक्ब। मिनु डांडाम घांस वापाइक्ब।
9 मेकोमी जन्तु नु बी ब्यफ आन कली थुल्ब। खद आन चाइक्ब आन कली यो जचा गेब। अय्युब ३८:४१
10 मेको शारा आन सक्ति तशा मग्येरसीब। मुर आन रीब पा दोरशो मारेइ ममिम्ब।
11 तन्न परमप्रभु यावेमी आ कली मान पा हिंब नु आ गेना हना यो दाक्तीके कली रिम्ब आन कली दाक्ब।
12 यरूसलेम, परमप्रभु यावे कली ठेयब सेलो। सियोन, इ परमप्रभु कली ठेयब सेलो।
13 मारदे हना मेकोमी इ सहर ङा लाप्चोपुकी बोल्यो सेल्शो बाक्ब। मिनु इ आगाम बाक्ब आल आन कली आसीक गेब।
14 मेकोमी इ सांदमी लडाइ मदुम्पाइक्ब। मेकोमी इ कली रिम्शो चेरबीम रूपाइक्ब।
15 मेकोमी आ शेंतीके रागीम सोइक्ब। मेको आ लोव़ रीब पा तेइ ते ब्राइब। अय्युब ३८:२२-३०
16 मेकोमी ऊन खोदेंशो पा फुं यिपाइक्ब। मिनु पुलु खोदेंशो पा फुरश यिपाइक्ब।
17 मेकोमी फुल्लु खोदेंशो पा मुप्स यिपाइक्ब। मेको आ काइश्शो फशेमी सु राप्ने चाप्बा ङा?
18 मेकोमी लोव़ पा फुरश यपाइक्ब। मेकोमी फश पपाइक्ब। मिनु ब्वाक्कु शाइक्पाइक्ब।
19 मेकोमी आ लोव़ याकूब कली शेंब। मिनु इस्राएल कली आ फुल्लुम मुशा ब्रेक्शो लोव़ नु आ पतीक लोव़ शेंब। ब्यवस्था ४:८; प्रेरित १४:१६; रोमी ३:२
20 मेकोमी अर्को रागी ङा सुइ मुर आन पर्बम मोदेंशो मपावो। मिनु मेकोपुकीमी आ पतीक लोव़ मतुइक्नीम। परमप्रभु यावे कली ठेयब सेलीन।