110
परमप्रभुम पिप कली अधिकार गेब
दाऊद आ कुम्सो।
1 परमप्रभु यावेमी, आं परमप्रभु कली “गे आं ग्युरा गे निस्सो। मिनु गो इ जोरी सत्रु आन कली इ खोइल थेक्तीके सेल्नुङमी। मत्ती २२:४४; प्रेरित २:३४; हिब्रू १:१३; १कोरिन्थी १५:२५; फिलिप्पी २:८-११; हिब्रू १०:१२-१३
2 परमप्रभु यावेमी सियोन रे पा इन सक्ति ङा राज दन्ड दिंब। मिनु गे इन जोरी सत्रु आन कली सासन पने” देंत। भजन संग्रह २:६
3 गे लडाइ पनी नाक्ती इन मुर आन थुंम ग्येरशा इन नोले खोइक्नीम। सुनी ङा सीत खोदेंशो पा इन रागी ङा ठिटापुकी खुम्सीशा इन नेक्था जाक्नीम।
4 मिनु परमप्रभु यावेमी “गे मेल्कीसेदेक खोदेंशो पा गेना हना यो चढ़ेब दुम्नेवे” दे कसम जाप्तु। मेकोमी आ थुं मफाइक्ब। उत्पत्ती १४:१८-२०; हिब्रू ५:६,१०; हिब्रू ६:२०; हिब्रू ७:१७,२१
5 परमप्रभु इन ग्युरा गे बाक्ब। मेको गाइक्ता नाक्ती पिप आन कली खतम पोक्ब। भजन संग्रह २:२,५,९
6 मेकोमी रागी रागी ङा मुर आन कली निसाफ पाइब। मिनु मेको आन रागी बेक्शो मुरुम प्रिंब। मिनु बेक्शो मुर आन पिया रागी मेर फ्राइब। दानीएल २:४४
7 मेकोमी लां आ नेक्था ङा खोला ङा ब्वाक्कु तूब। मोपतीके मेको सक्ति पाइश्शो दुम्शा ग्राब।