108
ठेयब सेल्तीक कुम्सो
दाऊद आ कुम्सो।
1 परमप्रभु, गो थमा सुइक्ब दुम्ती। गो थमा पा इन नोले खोइक्ब दुम्ती। गो ताप्तीक ताप्शा कुम्सो पाइनुङ। आं थुं मुल सेंसो! भजन संग्रह ५७:८-१२
2 ठेयब तार पाइश्शो ताप्तीके नु बीना बोक्कीस। गो सुनी कली सेंपाइक्नुङ।
3 परमप्रभु यावे गो जात जात ङा मुर आन दातेमी इन कली “गे रिम्शो पाइब बाक्नीनी” देंनुङ। मिनु रागी रागी ङा मुर आन दातेमी इन कली ठेयब सेल्शा कुम्सो पाइनुङ।
4 मारदे हना इन गेना हना यो दाक्तीक सरीङ खोदेंशो ठेयब बाक्ब। मिनु इन दाक्शा मप्रोंइतीके गोस्स खोदेंशो पा इर ङोन लाइब। भजन संग्रह ३६:६; भजन संग्रह ५७:११
5 परमप्रभु, गे सरीङ क्येङा यो ठेयब बाक्नीनी। इन छेङछेङ रागी नेल्ल आन तार बाक्ल।
6 मिनु इन सक्तिमी आंइ कली वारच पने। मिनु आं लोव़ लेत्तीनी। इन दाक्शोपुकी ब्रोंइमल। भजन संग्रह ६:७-१४
7 परमप्रभुमी आ बाक्तीक रे “गो ग्येरसीशा शेकेम कली योक्नुङ। मिनु सुक्कोथ ङा दिंम पुक्शा, योक्नुङ।
8 गिलाद आं के बाक्ब। मिनु मनस्से यो आं केन बाक्ब। एफ्राइम आं फलाम के ताकी बाक्ब। यहूदा आं राज दन्ड बाक्ब।
9 मोआब आं ब्वाक्कु तेम्तीक बोस बाक्ब। गो एदोम तार आं जुत्ता ब्वारनुङ। गो पलिस्ती आन कली ग्राशा, ग्येरशा ग्रीनुङ” देंत।
10 सुम आं कली गारो हिरशो सहर सम्म चाक्दीप्बा? सुम आं कली लां कोंइशा एदोम सम्म चाक्दीप्बा?
11 परमप्रभु गे आंइ कली प्रोंइतीनी। मुल गे आंइ लडाइ पाइब नु मगाक्नीनी।
12 गे आंइ जोरी सत्रु आन कली फ्रुचा कली वारच पने। मारदे हना मुर आन वारच पशो शोर गाक्शो बाक्ब।
13 गो परमप्रभु आ वारच पशोम ला ग्रानीकी। मिनु मेकोमी आंइ जोरी सत्रु आन कली दिम्ब।