20
बेन-हादादम लडाइ तोशो
1 अराम ङा पिप बेन-हादादम आ लडाइ पाइब नेल्ल आन कली खुप्तीमी बाक्त। मिनु मेकोमी ३२ जना पिप, मेको आन शारा नु बग्गीपुकी लाइश्शा, सामरीया सहर कली पुम्शा लडाइ तोवा बाक्त।
2 मेकोमी लोव़ कुरब आन कली सहरम सोइश्शा, इस्राएल ङा पिप आहाब कली “बेन-हादाद आ लोव़ नेनीन,
3 ‘इन सुन चांदी आं के नम। इन नेल्ल क्येङा दारशो मीश नु इन तमी तौ यो आं केन नम’ देंत” देनीन, दे सोइक्तीमी बाक्त।
4 मिनु इस्राएल ङा पिपमी मेको आन कली “आं प्रभु, पिप इन देंशो खोदेंशो पा ‘गो नु बाक्शो मारेइ मारेइ इन केन नम, देंत’ मतीन” दे सोइक्तीमी बाक्त।
5 मिनु लेंशा बेन-हादादमी लोव़ कुरब सोइश्शा “इन सुन चांदी, इन मीश नु इन तमी तौ नेल्ल आं कली गेन।
6 गो दीसा एं ना आं गेय पाइब आन कली, इन खिं नु इन ठेयब गेय पाइब आन खिंमी इन शुश क्येट लाइब थोव़क ब्रथ सोइक्नुङमी। मेकोपुकीमी आन दाक्शो मारेइ मारेइ लाइक्नीम” दे लोव़ कुरब सोइक्ता बाक्त।
7 मिनु इस्राएल ङा पिपम आ रागी ङा खाल्पा नेल्ल आन कली ब्रेश्शा, मेको आन कली “गे तुइश्शो बाक्नीनी। मेको मुरुम लडाइ पचा कली खुज्री माल्ना माल्न बाक्ब। मेकोम आं मीश, आं आलपुकी नु आं सुन चांदी आ केन नम देंमेनु यो, गो मारेइ मदेंङ” देंमाक्त।
8 मिनु खाल्पा नु मुर नेल्लेमी मेको कली “मेको आ लोव़ मनेनीन। गे मेको आ देंशो मबिस्सीन” देंमा बाक्त।
9 मोपतीके मेकोमी बेन-हादाद आ लोव़ कुरब आन कली “आं प्रभु पिप कली ‘आं ठेयब पिप आ ङोंइती पुंइशो नेल्ल गेनुङ। तन्न मुल इन पुंइशो लोव़ गो गेने मचाप्नुङ’ मुल लशा गेपुकीम बेन-हादाद कली एको लोव़ मतीन” दे माइश्शा सोइक्तीमी बाक्त। मिनु मेको लोव़ कुरबपुकी लशा, आन होव़प बेन-हादाद कली शोव़ङमे बाक्त।
10 मिनु बेन-हादादम आहाब कली “गो नु शुश लडाइ पाइब बाक्नीम। आं लडाइ पा ग्राशो सामरीया ङा फुरक, आं लडाइ पाइब आन कली योल का का गेचा कली यो मगाप्ब। मेको गाप्त हना, देवतापुकीम आं कली खतम पोय्यीमील” देंथ मुर सोइक्ता बाक्त।
11 मिनु मेको आन कली इस्राएल ङा पिपमी “मेको कली ‘लडाइ ग्राचा गेना गेना, मुल कना मार ठेयब लेश्शो लोव़ पाइनेवे’ देंत, मतीन” दे सोइक्तीमी बाक्त।
12 मेना बेन-हादाद नु अरु पिप आन बाक्तीकेम शांबु दुक्शा बाक्मानु, मेको लोव़ नेना बाक्त। मिनु मेकोमी रीब पा आ लडाइ पाइब आन कली “लडाइ पचा ठीक दुमीन” दे हुकुम गेमी बाक्त। मिनु मेकोपुकी मेको सहर कली लडाइ तोचा कली ठीक दुम्मा बाक्त।
आहाबमी बेन-हादाद कली फ्रुशो
13 मेना परमप्रभु यावे आ लोव़ पाइब का इस्राएल ङा पिप आहाब आ बाक्तीक जाक्शा, मेको कली “परमप्रभु यावेमी ‘मार, गे एको ठेयब हुल लडाइ पाइब आन कली तवी? कोव़ङो, गो मुलाक्तीन मेको आन कली इ गुइमी गेनुङ। मिनु गोन परमप्रभु यावे नङ, दे तुइक्नेवे’ देंत” देंमाक्त।
14 मिनु आहाबमी “तन्न मेको सुम पाइबा?” दे हिल्लो पवा बाक्त। मिनु परमप्रभु यावे आ लोव़ पाइबमी “परमप्रभु यावेम ‘हुकुम पाइब ठेयब मुर आन गेय पाइब ठिटापुकीम लडाइ पाइनीम’ ” देंमाक्त। मिनु पिपमी “लडाइ सुम गोचा माल्बा?” दे हिल्लो पवा बाक्त। मिनु मेको परमप्रभु यावे आ लोव़ पाइबम “गे गोचा माल्नीनी” देंमाक्त।
15 मिनु आहाबमी मेको हुकुम पाइब ठेयब मुर आन गेय पाइब सहे निक्शी ३२ जना ठिटा आन कली खुप्थ सोइक्तीमी बाक्त। मिनु नोले इस्राएली नेल्ल आन कली पुक्मी बाक्त। मेको नेल्ले ७ हजार बाक्मा बाक्त।
16 मिनु नाक्त उइक्थ दुम्मेनु, बेन-हादाद नु मेको आ वारच ३२ जना पिप आन बाक्तीकेमी दुक्शो बाक्मा ना मेकोपुकी ग्रूमा बाक्त।
17 मिनु मेको हुकुम पाइब आन गेय पाइब ठिटापुकी ङोंइती बारमा बाक्त। मेना बेन-हादादमी क्यारी पाइबपुकी सोइश्शो बाक्माक्त। मिनु मेकोपुकी जाक्शा “सामरीया रे मुरपुकी पिशो बाक्नीम” देंमा बाक्त।
18 मिनु बेन-हादादम “मेकोपुकी गारचा कली जाक्शो बाक्तेक्म हना, मेको आन कली सेसीन ग्याइक्तीन। लडाइ पथ जाक्शो बाक्तेक्म हना यो, सेसीन ग्याइक्तीन” दे माइक्मी बाक्त।
19 मिनु मेको हुकुम पाइब ठेयब मुर आन गेय पाइब ठिटापुकी सहर रे लाङगा ग्रूमानु, आहाब आ अरु लडाइ पाइबपुकी मेको आन नोले खोइश्शा ग्रूमा बाक्त।
20 मिनु नेल्लेमी आन जोरी सत्रु आन कली सदमे बाक्त। मिनु मो दुम्मेनु अरामी प्रोक्मा बाक्त। मिनु इस्राएलीपुकीम मेको आन कली खेदा पामे बाक्त। तन्न अराम ङा पिप बेन-हादाद आ शारा ङोइश्शा, अरु शारा ङोइक्बपुकी नु प्रोक्माक्त।
21 मिनु इस्राएल ङा पिप ङोंइती बारशा, शारा नु बग्गी आन कली ग्रामाक्त। मिनु अरामी शुश आन कली साइक्मी बाक्त।
22 मिनु नोले मेको परमप्रभु यावे आ लोव़ पाइब इस्राएल ङा पिप आ बाक्तीक जाक्शा, मेको कली “इन लडाइ पाइब आन कली ठीक पा वोतीन। मार पचा माल्बा, मेको रिम्शो पा मिम्तीन। मारदे हना मुल जाक्शो बर्सम अराम ङा पिपम लेंशा गेपुकी नु लडाइ पाइब” देंमाक्त।
23 मिनु अराम ङा पिप आ गेय पाइबपुकीम आन पिप कली “मेको आन देवता पहाड ङा देवता बाक्नीम। मोपतीके मेकोपुकी इं क्येङा शुश बोल्यो बाक्नीम। मुल गोपुकीम मेको आन कली दिंमम लडाइ पाइतय हना, थमा पा गो मेको आन क्येङा बोल्यो दुम्नय।
24 मुल गे मार पचा माल्नीनी देंशा हना, एको पिप आन कली लडाइ पाइब आन ठेयब मुर रे ग्रुंइदीन। मिनु मेको आन पा ङा अर्को मुर योव़ङीन।
25 ङोंइती बेक्शो लडाइ पाइब आन खोदेंशो पा, अर्को लडाइ पाइब आन हुल का सेलीन। शारा ङोइक्ब आन कली शारा नु बग्गी ङोइक्ब आन कली बग्गी ठीक पने। मिनु नोले गो इस्राएली नु दिंमम लडाइ पथ लय। मिनु गो थमा पा मेको आन क्येङा बोल्यो दुम्नय” देंमा बाक्त। मिनु बेन-हादादमी मेको आन सल्ला बिश्शा, मेको आन देंशो खोदेंशो पवा बाक्त।
26 मिनु मेको जाक्शो बर्सम बेन-हादादम लडाइ पचा कली अरामी आन कली पुक्मी बाक्त। मिनु इस्राएली नु लडाइ पचा कली अफेक सहर गे लमा बाक्त।
27 मिनु इस्राएली यो खुम्सीशा, जशा तूशा, मेको नु लडाइ पचा कली हुल हुल पा ग्रूमा बाक्त। इस्राएलीम अरामी आन ङोंइती गे आन बाक्तीक सेल्मे बाक्त। मेकोपुकी क्यारश आन आइक्च हुल निक्शी खोदेंशो बाक्मा बाक्त। तन्न अरामी चहिं मेको रागी ङा दिंम एर ओंथ नेल्ल ब्रीशा बाक्मा बाक्त।
28 मिनु परमप्रभु आ मुर का इस्राएल ङा पिप आ बाक्तीकेम जाक्शा, मेको कली “परमप्रभु यावेम ‘अरामीपुकीम परमप्रभु यावे, इस्राएली आन परमप्रभु पहाड ङा देवता ला बाक्ब। बेंसी ङा देवता ममाइ, दे मिम्शो बाक्नीम। मोपतीके गो एको ठेयब हुल लडाइ पाइब आन कली इ गुइमी गेनुङ। मिनु गे गोन परमप्रभु यावे नङ, दे तुइक्नेवे’ देंत” देंमाक्त। प्रस्थान ७:५
29 मिनु मेको आन ङोंइती आन बाक्तीकेम कोव़मुशा ७ नाक्त सम्म बाक्मा बाक्त। मिनु नोले ७ नाक्तीम लडाइ पामे बाक्त। मिनु इस्राएलीपुकीम काबुम अरामी आन खोइलीम गाक्ब लडाइ पाइब लाख का आन कली सदमे बाक्त।
30 मिनु मेको आन दाते ङा लीशोपुकी अफेक ङा सहरम प्रोक्मा बाक्त। मिनु मेकेर ङा गारो ब्रेश्शा १७ हजार आन कली चिप्ता बाक्त। बेन-हादाद चहिं सहर ओव़शा, ख्रुइश्शा बाक्माक्त।
31 मिनु मेको आ गेय पाइबपुकीम मेको कली “गोपुकीमी इस्राएल आ खिं ङा पिपपुकी दा शिशी पाइब बाक्नीम देंशो लोव़ नेंशो बाक्नीकी। मोपतीके क्रातोम अरन्डी फेक्सीय। मिनु पियाम डोरी फ्रेंसीशा इस्राएल ङा पिप आ बाक्तीक लय। मिनु मेकोम इन कली ब्रोंइचा गेबा कों?” देंमा बाक्त।
32 मोपतीके मेकोपुकीमी आन क्रातोम अरन्डी फेक्शा, आन पियाम डोरी फ्रेंसीशा इस्राएल ङा पिप आ बाक्तीक लशा मेको कली “इन वाइल बेन-हादादम ‘गो आं कली ब्रोंइचा गेयीमी’ देंशो बाक्ब” देंमा बाक्त। मिनु पिपमी “मार, मेको मुल यो सेसीन बाक्मे? मेको आं लोक्ब बाक्ब” देंमाक्त।
33 मिनु मेको मुरपुकीम पिप आ लोव़ रिम्शो बाक्माक्त दाप्शा “ओं, इन लोक्ब बेन-हादाद मुल यो सेसीन बाक्ब” देंमा बाक्त। मिनु पिपमी मेको आन कली “लशा, मेको कली एक चाक्कीन” देंमाक्त। मिनु बेन-हादाद ग्रूशा जाक्मेनु, आहाबम मेको कली आ बग्गीम ङोइक्पदा बाक्त।
34 मिनु बेन-हादादमी मेको कली “आं आफोम इन आफ रे ग्राशो सहर नेल्ल गो लेश्शा गेनन्नी। मिनु आं आफोम सामरीयाम पशो खोदेंशो पा, गे यो दमस्कसम ग्याप्तीक लेयतीक सेल्ने चाप्नीनी” देंमाक्त। मिनु इस्राएल ङा पिप आहाबमी “मेको सल्लाम पतीके गो इ कली प्रोंइनन” देंमाक्त। मोपा आहाबमी दुचा आ पर्बम लोव़ पा, मेको कली प्रोना बाक्त।
आहाब कली दोस गेशो
35 मिनु परमप्रभु यावे आ लोव़ पा, मेको आ लोव़ पाइब आन दाते ङा काम आ वारच का कली “आं कली तुब्यी” देंमाक्त। तन्न मेकोमी तुप्ने मबिस्से बाक्त।
36 मिनु मेको परमप्रभु यावे आ लोव़ पाइबमी “गे परमप्रभु यावे आ अरेशो लोव़ मटितीके आं कली प्रोंइशा लवे चोटीन इ कली गुप्स काम साइक्ब” देंमाक्त। मिनु मेको लम नोले गुप्स काम थिश्शा, मेको कली सदा बाक्त। १राजा १३:२४
37 मिनु मेको परमप्रभु यावे आ लोव़ पाइबमी अर्को मुर का कली ग्रुम्शा, मेको कली “आं कली तुब्यी” देंमाक्त। मोपतीके मेकोमी मेको कली तुप्शा, गार सेला बाक्त।
38 मिनु मेको परमप्रभु यावे आ लोव़ पाइब लशा, मतुइक्पांइसीचा ङा पा आ मिक्चीम वा फ्रेंशा पिप कली लांम रिम्दा बाक्त।
39 मिनु पिप मेको आ नेक्था रे लमेनु, मेकोमी पिप कली ब्रेश्शा “गो इन वाइल लडाइ पतीकेम जाक्दीश्शो नङ। मिनु मेकेर लडाइ पाइब मुर काम फ्रेंशो मुर का चाक्शा आं बाक्तीक जाक्त। मिनु मेकोमी आं कली ‘एको मुर जिम्मा ब्रावो। एको मुर दोकका पा प्रोक्त हना, एको आ पा ङा गे बेक्चा माल्नेवे कि टलेन्ट का चांदी थाप्चा माल्नेवे’ देंत। टलेन्ट का ३४ किलो बाक्ब।२राजा १०:२४
40 मिनु गो, इन वाइल, गेय पा बाक्ङा सम्म, मेको ग्याइश्शो मुर प्रोक्माक्त” देंमाक्त। मिनु इस्राएल ङा पिपमी मेको कली “गे इ निसाफ आंमान पाप्तीवी। मेकोन इ कली पतीक निसाफ बाक्ब” देंमाक्त।
41 मिनु मेको परमप्रभु यावे आ लोव़ पाइबमी रीब पा आ मिक्चीम फ्रेंशो वा प्रुदा बाक्त। मिनु इस्राएल ङा पिपम मेको कली परमप्रभु यावे आ लोव़ पाइब का बाक्त, दे तुइक्ता बाक्त।
42 मिनु मेकोमी पिप कली “परमप्रभु यावेमी ‘गो साइक्चा कली ठीक पशो मुर कली गे प्रोंइतीवी। मोपतीके मेको आ पा ङा गे बेक्चा माल्नेवे। मिनु मेको आ मुर आन पा ङा इ मुर बेक्चा माल्नीम’ देंत” देंमाक्त।
43 मिनु इस्राएल ङा पिपमी “मार लोव़ पवा?” दे गाइश्शा, आ खिं सामरीयाम जाक्माक्त।